AYUBU 2
2
Shetani Yachelitsa Ayubu Khandi
1Khulitukhu lindi khandi, tsinjelosi tsitsa khwilavushitsa khu Mwami Nyasaye; khali Shetani yitsaho natsio khwilavushitsa khu Mwami Nyasaye. 2Mwami Nyasaye yavoolela Shetani, “Ni hena urula?”
Shetani yachipa Mwami Nyasaye, “Ndula khuhuhuya khulilova, ninjenda chenda shia havundu hosi.”
3Nalwo lwa Mwami Nyasaye yareeva Shetani, “Unyala khuva walolakhu murumishi wanje Ayubu? Mundu avulakhuho khulilova khunu khuli ye; nu mundu wi likhola liu vulunji khandi vuchila imbala yosi. Neye mundu umbetsanga luyali, khandi waria khukhola vwoni. Nivi wambombelitsa nu wenyanga musalilitsi vuchila shivune shiosi; navutswa Ayubu nu mukololokhu khuli yavetsanga.”
4Nalwo lwa Shetani yachipa, “Mmbili khu mmbili! Mundu aliitsa khumenya niiva aliitsa khulekhana ni vindu viosi mu limenya lielie. 5Navutswa numusalilitsa mmbili kwekwe nunundi -- aliitsa khukhwambakhana havulavu!”
6Mwami Nyasaye yavoolela Shetani, “Nu vulahi, uli nu vunyali khumukhola ka yivi mwene wenyanga, navutswa uvuli khumwiira.”
7Khu, Shetani yasimukha narula imbeli wu Mwami Nyasaye; nalesa Ayubu na mavimba khu mmbili kwekwe kwosi khuraanjila khu vilenje khutukha khu murwi. 8Ayubu yavukula shikonjo shi inyungu shiatikha naraanga khwiyekela, niyikhale mu likooshe. 9Nalwo lwa mukhali wewe yamureeva, “Unyala khu ushili wi likhola liu vulunji khuli wavetsanga toto? Nyeka Nyasaye, nambula wakhutsa.”
10Ayubu yamuchipa, “Ulomolomanga khuli mulala khu vakhali vayiingwa valomolomanga! Lwa Nyasaye akhukholelanga malahi, khuyaanzanga. Khunyala khwililila munjila shina lwa akhulerelanga vutiinyu?” Khali mu kenako koosi, Ayubu yalekha khulomolomakhu shindu shitamanu khulondokhana khu Nyasaye.
Valina va Ayubu Vitsa Khumulola
11Valina vavaka va Ayubu, nivali Elefasi khurula mu litaala lia Temani; Bilidadi khurula mu shivala shia Shuhi, nende Zofari khurula mu shivala shia Nahamatsi, vahulila makhuva khulondokhana khuli Ayubu yali nanyakhananga muno. Varula ha vamenyanga, nivatsia khumulola nu khumuleminya mwoyo. 12Lwa valola Ayubu nali ihale wene khurula khuvo, vakorwa khumumanya. Varanga khulaanjilila nivalila nu mwoyo mukali; varandula tsinguvu tsiavo, khandi niviyuyila lukuushi khu mirwi chiavo. 13Vikhalaho naye mbasu nu vutukhu khumatukhu saba; mundu avulakhuho walomoloma naye, shichila vali valoli khuli anyakhananga muno.
© The Bible Society of Kenya, 2013