VAKHALACHI 2
2
Injelosi yu Mwami Nyasaye mu Litaala lia Bokimu
1Injelosi yu Mwami Nyasaye yarula Gilugali nitsia mu litaala lia Bokimu, nivoola, “Ninzi wamurulitsa mu shivala shia Misri nimuhila mu shivala shia nali nalaaka niitsa khuha vakuuka venyu. Namuvoolela, ‘Niitsa khuvula khumeneka lilakano lianje lia nakhola na munyi; 2khandi shiumuliitsa khukhola lilakano na vandu vi shivala yishi tawe; navutswa muliitsa khusambulanyinya vwaali vwavo.’ Nikhali mwambakhane khulonda malako kaanje. Ni shina shia mukholi yishi? 3Khulwa yako, muvoolelanga nunundi ndi niitsa khulekha khumukhunjila vandu vi tsimbia tsienetso khurulamu. Valiitsa khuva vatsiku khu munyi, khali valiitsa khumureeka musaale khu vanyasaye vavo.” 4Lwa injelosi yu Mwami Nyasaye yali nimali khuvoolela Vaisraeli makhuva kenako, voosi varaanga khulila tsikhwili. 5Vakulikha havundu henaho lira Bokimu. #2:5 Bokimu: Muluhebrania lira yili livoolanga “Yavo valilanga tsikhwili.” Vaisraeli vakholela Mwami Nyasaye misango havundu henaho.
Likhutsa lia Yoshwa
6Lwa Yoshwa yali namali khuseevula Vaisraeli khurulaho, vasimukha nivatsia khuvukula shivala, shia mundu wosi havundu ha yali niyenyi khumenya. 7Vaisraeli varumishila Mwami Nyasaye, khu matukhu koosi ka Yoshwa yali nashili mwoyo. Lwa yali niyakhutsa vatsililila khukhola ndio, lwa vimilili vali nivashili mwoyo vali nivalolakhu vindu viu khuchenyinya viu Mwami Nyasaye yakholela Israeli. 8Yoshwa mwana wa Nuni, murumishi wu Mwami Nyasaye yakhutsa nali ni mihika imia indala ni likhomi. 9Yoshwa yayeveelwa mu lusomo lu mu shivala shieshie mu litaala lia Timunatsi-heresi mu shivala shi vikulu shia Efurahimu khuluveka luli ivuluka wi Shikulu shia Gahashi. 10Vandu vi likhula lienelo voosi vakhutsa, khandi likhula lialondakhu nivivilila Mwami Nyasaye nende vindu via yali niyakholela Israeli.
Vaisraeli Valekha Khusaala khu Mwami Nyasaye
11Vaisraeli vakhola vwoni imbeli wu Mwami Nyasaye, nivaraanga khurumishila Mabaali. 12Vambakhana khusaala khu Mwami Nyasaye, uli Nyasaye wa vakuuka vavo, wali niyavarulitsa mu shivala shia Misri. Varanga khusaala khu vanyasaye vandi, nivali vanyasaye va vandu va vamenyanga navo himbi. Vavinamila, khali nivakhola Mwami Nyasaye khuvalolela vurima. 13Vambakhana khusaala khu Mwami Nyasaye, nivarumishila Baali nende Vashitarotsi. 14Mwami Nyasaye yalolela Vaisraeli vurima, navalekha khukwanwa na vandu vaseeri khandi khunuulwa vindu. Yalekha vatsiku vamenyanga himbi navo khuvakuura ni tsingulu, khali Vaisraeli nivavula khuva ni tsingulu tsiu khwilinda vene. 15Shia inyinga yosi lwa Vaisraeli vatsitsanga khukwana, Mwami Nyasaye yavalolela vutamanu khuvakuura, khuli lwa yali niyavoola aliitsa khuvakhola. Vaisraeli vavirila mu vutiinyu vunyishi.
16Nalwo lwa Mwami Nyasaye yaha Vaisraeli vakhalachi vavahonyinya khurula khu mikaanda chia vandu va vaseeranga. 17Navutswa Vaisraeli vambakhana khuhulishitsa vakhalachi vavo. Vaisraeli vambakhana khuva vasuuvilwa khu Mwami Nyasaye, nivasaala khu vanyasaye vandi. Vakuuka vavo vali nivasuuvila mu malako ku Mwami Nyasaye, navutswa vandu vi likhula lienelo vambakhana khulonda malako ku Mwami Nyasaye. 18Matukhu koosi ku Mwami Nyasaye yaheetsanga Vaisraeli mukhalachi, Mwami Nyasaye neye wakhonyanga mukhalachi mwenoyo khandi neye wahonyinyanga vandu khurula khu vatsiku vavo, mukhalachi mwenoyo nashili mwoyo. Mwami Nyasaye yavalolelanga tsimbavasi shichila valilanga tsikhwili khurulana khuli vasalilanga khandi nivanyakhana. 19Navutswa lwa mukhalachi yali niyakhutsa, vandu vakalukhanga vamenya limenya liavo lia khale, khali valiitsa khuva nu mwiima mutamanu khuvira mumatukhu ka vakuuka vavo. Varumishilanga vanyasaye vandi khuvakholela muhinzilu khandi va vasikamila; vambakhana khulekha miima chiavo mitamanu chia vakholanga, khali mahaaka kavo. 20Khulwa yako, Mwami Nyasaye yalolela Vaisraeli vurima, navoola, “Vandu yava vambakhane khulonda lilakano lia navoolela vakuuka vavo vatsililile khulonda. Lwa vambakhane khulonda malako kaanje, 21shinzitsanga khukhunga khali lulala khu vandu vi tsimbia tsili mu shivala shienesho, tsia Yoshwa yarikamu namali khukhutsa tawe. 22Niitsa khuvarumishila ndole niiva Vaisraeli valiitsa khulonda makhuva kaanje inoho valeshe khukalonda, khuli vakuuka vavo vakholanga.” 23Mwami Nyasaye yahuchilila vandu vi vivala vienevo khumenya mu shivala shienesho, vuchila khuvakhunga vwangu. Yiima Yoshwa tsingulu tsiu khuvakuura, lwa yali nashili mwoyo.
© The Bible Society of Kenya, 2013