YAKOBO 1
1
1Ninzi Yakobo, murumishi wa Nyasaye nende Mwami Yesu Kristo;
Mbananga milembe chianje khu vandu voosi va Nyasaye, vasalana shia havundu hosi mu shivala.
Lisuuvila nende Vusitsa
2Vasuuvili vashianje, muve nu vuyaanzi vwatoto, khali niiva muvirilanga mu machelitso manyishi lukanu na lukanu, 3shichila mwamanya ndi khuchelitswa khwi lisuuvila lienyu, khumulombanga khunyola tsingulu tsiu khwikhutsila. 4Muchelitsi khulola ndi kilikali, khwikhutsila khwenyu khumukhonyanga khutsililila imbeli, vuchila khukalukha inyuma. Muve vaseletse khandi vatoto, vuchila khucheheelwa mu shindu shiosi. 5Navutswa niiva mulala khu munyi avula vusitsa, asaale khu Nyasaye, unyala khumuha; shichila Nyasaye ahaananga nu mwoyo mulala, khandi kwi tsimbavasi khu voosi. 6Navutswa lwa mwenyanga khusaala, musuuvili vuchila khuhaya haya khwosi. Mundu uhaya hayanga, ali khuli maruundu mu inyanza kahuutswangwa, khandi ki imbuutsa ihuutsa huutsanga iyi neyo. 7Mundu khuli mwenoyo aleshe khukanakanakhu ndi aliitsa khunyolakhu shindu shiosi khurula khu Mwami. 8Mundu khuli mwenoyo ahaya hayanga; khandi wakhaywa khuva musuuvilwa mu likhola lielie.
Vumanani nende Miandu
9Musuuvili uli mumanani, yenyekhanga asangale, lwa Nyasaye avetsanga namuchinguli mu limenya; 10khandi musuuvili muhinda, yenyekhanga asangale, lwa Nyasaye avetsanga namukholi mumanani. Muhinda aliitsa khuvungulukha khuli liwua li shiraakwa shiumbulimu. 11Liuva liakhanga vululu, ma shiraakwa shienesho shiumakana; masambu ki shiraakwa shienesho kavungulukhanga, ma shiraakwa shikhutsa. Nindio khandi mundu muhinda aliitsa khwononyinywa, lwa aliitsa khuva nakholanga muhinzilu kwekwe.
Lichelitsa nende Lichelitswa
12Ali ni ikhaavi mundu wikhutsilanga mu machelitso, shichila niyakhamali khukuura machelitso kenako, aliitsa khunyola itaachi yu vulamu, ya Nyasaye yalaaka aliitsa khuha yavo vamuyaanza. 13Niiva mundu anyala khuchelitswa khuvirila mu machelitso khuli kenako, aleshe khuvoola, “Nyasaye neye unjelitsanga.” Nyasaye shianyala khuchelitswakhu ni vindu vitamanu, khali ye shiachelitsanga mundu tawe. 14Navutswa shia mundu wosi achelitswangwa, lwa akaatilitswangwa khandi lwa alondanga mwene likomba litamanu liu mmbili kwekwe. 15Nalwo lwa likomba litamanu lielie lishilanga liva linyishi, malilera vwoni; khandi vwoni, nuvumali khwikhitsula mu mwoyo kwekwe, vuleranga likhutsa.
16Vasuuvili vashianje va nayaanza, muvuli khukaatwa! 17Shia shihanwa shiosi shilahi, khandi shiseletse shirulanga mwikulu; shirulanga khu Nyasaye, uli Muloonji waloonga vulavu vwakhanga mwikulu; neye unyala khuvula khukalukhana inoho khulomba shisuundi khuvaho lwa akalukhananga. 18Neye wakhurovola, khu akhuhe vulamu vuyia khuvirila mu likhuva liatoto, khu khuve vu khuraanga mu vindu viosi via yaloonga.
Khuhulila nende Khukhola
19Vasuuvili vashianje va nayaanza, mwenyekhanga mumanye makhuva yaka! Shia mundu wosi ave mwangu mulihulishitsa, navutswa wakalaha mulilomoloma khandi wakalaha, khulu khuvukulila vandi vurima. 20Vurima vu mundu ali navwo, vumwikalilanga khukhola lienya lia Nyasaye liu vulunji. 21Khulwa yako, mulekhane nu mwiima kwi shifwavi kwosi, inoho vindu vitamanu viamanyikhana havulavu, khandi mwirulitsi nu mwoyo kwosi khuhuchilila likhuva lia Nyasaye yaraaka mu mioyo chienyu, lili nu vunyali vu khumuhonyinya. 22Muvuli khwikaata vene, lwa muhulishitsanga likhuva lia Nyasaye lionyene; navutswa mukhole ka likhuva lienelo livoolanga. 23Mundu uhulishitsanga likhuva lionyene, navutswa yambakhananga khukhola ka likhuva lienelo livoolanga, ali vutswa khuli mundu wiheenzelanga mwene mushilolelo, malola likoondo lielie khuli asasanga. 24Yikolanga mwene munjila indahi yene, khandi lwa arulaho mwene yivililanga vwangu khuli asasanga. 25Navutswa mundu uheenzelanga vulahi vwene mu lilako liu vuseletse, lichilanga vandu nivavohololwa, khandi atsililila khukhola ndio, vuchila khwivilila ka yahulila, navutswa mundu wu kholanga shikholwa shienesho -- aliitsa khukasitswa mu shia shindu shiosi shia kholanga.
26Niiva mundu akanakananga wasuuvila mu idini, navutswa avula khuli anyala khwilinda munjila indahi yene mulilomoloma, yikaatilanga mwene khandi idini yeye ili shikhaya khuye. 27Idini ya Nyasaye, uli Tata weru ahuchililanga khuva indahi, khandi yatoto nu khulinda vavisandu nende vakhutsakhali mu vutiinyu vwavo; khandi khwilinda mwene munjila indahi khuvula khukoyanyinywa ni vindu viu mu shivala.
© The Bible Society of Kenya, 2013