ISAYA 55
55
Vwihaani vwa Nyasaye vwi Tsimbavasi
1“Munyi voosi vamuli nu vuluhu, hambi,
hambi mung'wi matsi!
Munyi vamuvula tsisenti tsiosi,
hambi, mukuule nu khulia!
Hambi, mukuule idivai nende maveele
vuchila tsisenti khandi vuchila murungu kwosi.
2Shichila shina mumalilanga tsisenti khu shindu
shia vanyala khuvula khulia?
Shichila shina mumalilanga mushiara kwenyu khu shindu shinyala khuvula khwikuritsa?
Mbulishitsi vulahi vwene, mamulii vili vilahi,
khandi muyaanzilili vene lwa mulia shiukhulia shilahi shene khu viosi.
3Munyi vandu vaanje, mbulishitsi khandi mwitsi khwinzi;
mbulili, khu muve nu vulamu.
Niitsa khulomba lilakano li mihika ni mihika na munyi,
mamuyaanze nu mwoyo kwanje kwosi khuli nali nayaanza Daudi.
4Loli, inzi namukhola khuva mushiahidi khu vandu vi tsimbia tsindi,
mwimilili khandi mwimilili wa vasikali va vandu.
5Loli, muliitsa khulaanga vandu vi tsimbia tsia mwakorwa;
khandi vandu vi tsimbia tsiakorwa shindu khulondokhana khu munyi
valiitsa khwitsa vwangu khu munyi,
shichila inzi Mwami Nyasaye, uli Nyasaye wenyu
khandi lwandi Nyasaye Mutakatifu wa Israeli,
shichila mukholi inzi khuheelwa luyali.”
6Mukhave Mwami Nyasaye nanyala khunyolekha,
musaale khuye lwa ali himbi.
7Vandu vatamanu valeshe vutamanu vwavo,
khandi vandu vakhakholanga ku vulunji valeshe tsinganakani tsiavo;
Leshi vakalushi khu Mwami Nyasaye, khu avavele tsimbavasi,
khandi khu Nyasaye weru shichila aliitsa khuvasemeha mu vunyishi.
8Shichila Mwami Nyasaye avoolanga,
“Likanakana lianje shilili khuli mukanakananga tawe;
khandi likhola lianje shilili nalio likhola lienyu tawe;
9shichila lwa likulu lili ihale wene muno khurula khulilova,
nindio khandi kakholanga kali ihale wene khurula khu ka munyi mukholanga
khandi likanakana lianje lili ihale wene
khurula khu ka munyi mukanakananga.
10“Khuli lwa imbula nende matsi ki imparafu karoonyanga khurula mwikulu,
makakwa khulilova khulishinditsa,
khulikhola khumeela shiraakwa,
khuha mumitsi vukuutsa khandi vandu shiukhulia,
11khu nindio khandi likhuva lirulanga khwinzi livetsanga;
shilinyala khuvula khukhola ka nzikombanga likhole tawe;
navutswa liliitsa khurweshitsa ka nzikombanga likhole
nu khukhola shia shindu shiosi shiachila niliruma.
12“Muliitsa khurula mu Babilonia nu vuyaanzi vunyishi muno,
muliitsa khwimililwa mu milembe;
vikulu nende rukulu viliitsa khureekula tsinyimbo numuhulilanga,
khandi misala chiosi mu milimi chiliitsa khulolekha
khuli chikhuvakanga makhovi.
13Mitarakwa chiliitsa khumeela havundu ha mavwa kenyanga kave nikameela;
manimane chiliitsa khumeela havundu ha maraakalu kameelanga;
nashio shiliitsa khuva shimanyilu shi mihika ni mihika,
shimanyilu shiu khwitsushitsa vindu via inzi Mwami Nyasaye kholanga.”
© The Bible Society of Kenya, 2013