ISAYA 42
42
Murumishi wu Mwami Nyasaye
1Mwami Nyasaye, uli Nyasaye weru avoolanga,
“Uyu neye murumishi wanje wambenzakhu,
mundu wa narovola uchilanga ninyanzitswa!
Niitsa khumwitsulitsa Roho wanje,
naye aliitsa khuchila katoto kakholeshe mu vandu vi tsimbia tsiosi.
2Aliitsa khuvula khulaanjilila inoho khulila,
inoho khuyookanila mu tsinjila tsi litaala likali.
3Aliitsa khuvula khutong'ola shitundu shiakotooma,
inoho khutsiminya lutaambi lutuumanga mwooshi;
aliitsa khuchila katoto kakholeshe mu vusuuvilwa.
4Aliitsa khuvula khuvwa tsingulu inoho khurimukha ikholo
nashili khurweshitsa katoto khulilova.
Vandu varulanga mu vivala ihale wene
valindililanga khulonda mechitso keke.”
Vulavu vwa Vandu vi Tsimbia Tsindi
5Mwami Nyasaye, uli Nyasaye,
waloonga likulu, nalivambalitsa khuli liheemo,
walomba lilova nende vindu viosi vimenyamu,
woyo uheetsanga vandu voosi valimu miuya
nu khuvakhola khuva mwoyo avoolanga,
6“Inzi Mwami Nyasaye mali khukhulaanga khuvirila mu likhola liu vulunji;
niitsa khukhukumila mukhono nu khukhulinda;
niitsa khukhola lilakano na vandu voosi shichila yivi;
khandi uliitsa khuva khuli vulavu vwa vandu vi tsimbia tsindi.
7Uliitsa khwikula tsimoni tsia vavekhu,
uliitsa khuvoholola vavohe khurula mucheela,
khandi yavo vamenyanga mu shisuundi uliitsa khuvalera mu vulavu.
8“Ninzi Mwami Nyasaye; nalio lira lianje;
nyasaye wundi avulakhuho wanyala khusanga naye vukhumi vwanje;
inoho khuhuchililwa khwitsominywa ni misambwa.
9Vindu via nali ninavoola nivishili khwikholekha vimali khwikholekha.
Nunundi muvoolelanga makhuva khu vindu viyia
khali nivishili khwikholekha.”
Lwimbo lu Khwitsominya
10Mwimbile Mwami Nyasaye lwimbo luyia,
mumwitsominyile shia havundu hosi khulilova!
Munyi vamwelemanga mu inyanza, mumwitsominye!
Munyi vilombe viosi mu inyanza, mumwitsominye!
Munyi vamenyanga ihale wene khuluchinga lwi inyanza, mumwimbile!
11Leshi shiangalangwi nende mataala kashio khwitsominyi Nyasaye,
leshi vandu vamenyanga mu michitsi chia Kedari vamwitsominye!
Leshi vandu vi litaala lia Sela vamwimbile tsinyimbo tsiu vuyaanzi
khuraanjila khu vutoonje khwi vikulu!
12Leshi vahaane vukhumi khu Mwami Nyasaye,
nu khulanditsa mu vivala vili khuluchinga lwi inyanza khuli yitsominywa!
13Mwami Nyasaye wayirulitsa khuli musikali,
wirecheshe khukwana khuli musikali.
Alaanjililanga mulaango ku khuraanjitsa liihe,
nu khumanyinya khuli ali ni tsingulu tsiu khukwana vatsiku veve.
Khuli Nyasaye Yalaaka Alakhonya Vandu Veve
14Mwami Nyasaye avoolanga,
“Nali nahonjela khumatukhu manyishi;
mbulakhu shia nachipa vandu vaanje;
Navutswa nunundi tsisaa tsiu khukhola likhuva tsimali khutukha.
Ndilanga tsikhwili khuli mukhali uhulilanga isalila yu khwivula mwana.
15Niitsa khutivitsa vikulu nende rukulu,
nu khunialitsa vunyasi nende misala chiosi;
niitsa khuchila michela chilikwa visuulu,
nu khukhaaminya matavalia.
16“Niitsa khwimilila vavekhu khu injila ya vakorwa;
khu muhaanda kwa vashili khulondelakhu.
Niitsa khukalukhanyinya shisuundi shiakwa vulamu imbeli wavo.
Havundu ha makova kali haliitsa khulunjishitswa.
Navio vindu via nzitsanga khukhola,
shinyala khwivilila khuvikhola tawe.
17Navutswa vandu vasuuvililanga mu misambwa,
yavo valaanganga vifwanani via valombwa vanyasaye vavo,
valiitsa khuhonjelitswa nu khuheelwa tsisoni.”
Vaisraeli Vayikala Maroyi khandi ni Vavekhu
18“Mbulishitsi munyi vandu vikala maroyi,
munyi vavekhu, chinguli tsimoni tsienyu nikanyalikha mulole!
19Ni viina wavekhula nikakhali murumishi wanje,
inoho wikala maroyi nikakhali murumwa wanje wa naruma?
Ni viina wavekhula khuli mundu wanje wa narovola,
inoho wavekhula khuli murumishi wu Mwami Nyasaye?
20Munyi mwalola vindu vinyishi,
navutswa shindu shivulakhuho shia mwamanya.
Muli na maroyi ku khuhulila,
navutswa muvula shia muhulilanga!”
21Mwami Nyasaye yayaanzitswa, shichila neye wi likhola liu vulunji,
khwenya khulanditsa mechitso keke khandi khukakhuminya.
22Navutswa ni vandu vahuuvilwa miandu khandi nivayaaywa shia shindu shiosi!
Voosi vakumilwa mu vwina khandi vavohwa mucheela.
Vakwa khuli inyama ya vahitsanga ivula mundu unyala khuchihonyinya;
Vakwa shindu shiu khuyaaywa
khandi mundu avulakhuho unyala khushihonyinya.
23Ni viina khu munyi uliitsa khureeka maroyi wahulila yaka,
khwikhutsila nu khuhulishitsa kaliitsa khwikholekha?
24Ni viina wachila vatsiku nivayaaya vindu via Vaisraeli?
Ni viina wavarika nivanuulwa miandu chiavo?
Mwami Nyasaye neye wakhukholela vutamanu!
Vakuuka veru vambakhana khulonda mechitso keke
khandi nivambakhana khulonda malako keke.
25Khulwa yako, yachila nu khuvirila mu vurima vwevwe vululu,
nakhulekha khukwana mu liihe lilulu.
Vurima vwevwe vwali vululu khuli mulilu mu Israeli,
navutswa khwali khwakorwa kakholekhanga.
Shindu shivulakhuho shia khweka khurulana khu kenako.
© The Bible Society of Kenya, 2013