ISAYA 36
36
Khuli Senakeribu Yasiomeela Yerusalemi
(2 Vami 18:13-27; 2 Tsiny 32:1-19)
1Khumuhika kwi likhomi na chine, kwa Mwami Hezekia yamihanga Yuda, Mwami Senakeribu wa Ashuria yakwana mataala koosi kali ni kumbakhwa ni tsimbinga ka Yuda. Yakavukula ni tsingulu. 2Nalwo lwa Mwami wa Ashuria yaruma mwimilili wa vasikali halala na vasikali khurula mu litaala lia Lakishi, khutsia khukwana Mwami Hezekia mu Yerusalemi. Mwimilili mwenoyo, yasinjila himbi ha mutaalo kwi litivwi khuluveka luli ivuluka khu muhaanda kwinjilanga mu Mulimi ku Mufuyi wi Tsinguvu. 3Eliakimu mwana wa Hilikia, wasinjililanga inzu yu vwami yitsa khumulola; Shebuna wali nali mukarani, nu muhandichi Yoha mwana wa Asafu vitsayo khandi.
4Nalwo lwa mwimilili wi vitsiili via Ashuria yavavoolela, “Simushi mutsi khuvoolela Mwami Hezekia ndi Mwami wa Ashuria areevanga: Ni shina shiulimu ni lisuuvilitsa shichilanga nuva ni ikholo yirio? 5Ukanakananga makhuva vutswa, nako vucheli nende tsingulu tsinyala khukhukhola khukwana? Khu, ni shina shiusuuvililamu shichilanga numbinjitsa? 6Lolakhu! Usuuvililanga mu Misri, uli khuli shitunda shiatong'olwa shitsitsanga khurootsa mundu wa niyitiile khushio. Nindi Mwami wa Misri avetsanga khu mundu uli ni lisuuvilitsa muye. 7Navutswa khali nikava mulambolela, ‘Khwasuuvilila mu Mwami Nyasaye, uli Nyasaye weru,’ khu shiali neye mulala mwele wa Hezekia yapomolanyinya vwaali vwevwe; khandi navoolela vandu va Yuda nende Yerusalemi, ‘Mulasaalila imbeli wu vwaali yuvu?’ 8Khulwa yako, kholi lilakano nu muruchi wanje Mwami wa Ashuria; inzi mwene namuha tsifarasi tsiheelefu tsivili, niiva munyala khunyola vandu vu khuhila tsifarasi tsienetso. 9Munyala ndina khukhunganyinya mulala khu varumishi vu muruchi wanje uli nu vunyali hasi muno, lwa munyi vene musuuvililanga mu Misri khumuha makaare ki liihe nende vandu vu khuhila tsifarasi? 10Khumeeta khu kenako, mukanakananga niitsa khu munyi, Mwami Nyasaye nakhambele lilako liu khutsa khukwana nu khutivitsa shivala yishi? Mwami Nyasaye neye wambolela, ‘Kwana shivala yishi ma ushitivitse!’ ”
11Nalwo lwa Eliakimu, Shebuna nende Yoha vachipa mwimilili wi vitsili, “Nuyaanza lomoloma na khutsi varumishi vovo mululomolomo lwa Aramaiki, shichila khwalumanya. Lekha khukhulomolomela lulomolomo lwa vandu va Yuda lwa vandu va Yuda vene valomolomanga; shichila vanyala khuhulila ka khuvoolanga.”
12Mwimilili wi vitsili mwenoyo yavavoolela, “Mukanakananga muruchi wanje yanduma khwitsa khuvoolela muruchi wenyu halala na munyi makhuva kenako; navutswa mbuli khuvoolela vandu valiho, vaviritswa valiitsa khutivitswa na munyi lwa valiitsa khulia mavi kavo vene nu khung'wa minyali kavo?”
13Nalwo lwa mwimilili wi vitsili mwenoyo yasinjila, nalaanjilila nu mwoyo mukali navoola Muluhebrania, “Muhulishitsi makhuva ku Mwami wa Ashuria alomolomanga! 14Avoolanga: Muvuli khuhuchililakhu khukaatwa na Hezekia, shichila avula vunyali vu khumuhonyinya. 15Muvuli khuhuchililakhu amukhole khusuuvilila mu Mwami Nyasaye; lwa avoolanga, ‘Ni kilikali, Mwami Nyasaye aliitsa khukhuhonyinya; Mwami wa Ashuria shialiitsa khuvukula ni tsingulu litaala likali yili tawe.’ 16Mukhahulishitsi Hezekia tawe; shichila Mwami wa Ashuria avoolanga: Lombi milembe ninzi, khandi mwilakhuli khwinzi. Nalwo lwa shia mulala khu munyi aliitsa khuliakhu mwene matunda keke ki misabibu, makhuyu keke nu khung'wakhu matsi khurula mu isieveye yeye mwene, 17nishili khwitsa nu khumuhila mu shivala shisasanga khuli shienyu yishi, shivala shia varaakamu imu khandi shia valombamu idivai, shivala shia vakandamu mikati khandi varaakamu misala chi misabibu. 18Muvuli khuhuchililakhu Mwami Hezekia khumukoyanyinya lwa avoolanga, ‘Mwami Nyasaye aliitsa khukhuhavina!’ Khulikhuho na nyasaye wosi mu vanyasaye vi tsimbia tsindi wahonyinyakhu vandu veve khurula khu Mwami wa Ashuria? 19Ni hena ha vanyasaye vi litaala lia Hamaatsi nende Arapadi vali? Ni hena ha vanyasaye va Sefaravahimu vali? Alikhuho wahonyinyakhu Samaria khurula khwinzi? 20Ni nyasaye shina mu vanyasaye venavo voosi wahonyinyakhu vivala viavo khurula khwinzi? Ni shina shikhukholanga nuva ni lisuuvila ndi Mwami Nyasaye aliitsa khuhonyinya Yerusalemi khurula khwinzi?”
21Nikhali vandu venavo vahonjela vutswa, nivavula khuvoolakhu shindu shiosi, shichila Mwami Hezekia yali uvooli, “Muvuli khumuchipakhu.” 22Nalwo lwa Eliakimu mwana wa Hilikia, wasinjililanga inzu yu vwami, halala nu mukarani Shebuna nende Yoha mwana wa Asafu wali nali muhandichi, vasimukha nivatsia khulola Mwami Hezekia, nivarandushi tsinguvu tsiavo. Vavoolela Mwami Hezekia makhuva ku mwimilili wi vitsili yali navavoolele.
© The Bible Society of Kenya, 2013