ISAYA 33
33
Lisaala liu Khukhonywa
1Wooyi! Yivi mutivitsi, uli khu vutiinyu,
yivi ushili khutivitswa!
Wooyi! Yivi mutsami, wa mundu ashili khutsamakhu,
uli khu vutiinyu!
Lwa uliitsa khulekha khutivitsa,
nalwo lwa yivi mwene uliitsa khutivitswa;
Lwa uliitsa khulekha khutsama vandi,
nalwo lwa yivi mwene uliitsa khutsamwa.
2Yivi Mwami Nyasaye, ukhuvele tsimbavasi;
nivi wa khwaramu lisuuvilitswa lieru.
Ukhulinde shia mu mavwevwe,
ukhuhonyinye nu khuli mu vutiinyu.
3Lwa ukhukwanilanga, vandu vi tsimbia tsindi vilukhanga;
Lwa wusinjilanga nukwana, vandu vasalananga.
4Vindu viayaaywa khuli lisaa livunjelitsanga vindu;
khuli lwi tsisichi tsisila silanga, nindio khandi vasilanga khulio.
5Mwami Nyasaye akhuminywangwa,
neye wumenyanga ikulu mwikulu.
Neye uchilanga vwatoto nende likhola liu vulunji khwikholekha mu vunyishi mu Sayoni.
6Munyi vandu va Yerusalemi,
Mwami Nyasaye aliitsa khuchila mumenye mu vulindi vulahi,
aliitsa khumuhonyinya, khumuha vusitsa nende vucheli.
Livishilu lienyu likali nu khuha Mwami Nyasaye luyali.
7Hulishitsi, vasikali vi tsingulu valililanga mu tsinjila tsi litaala likali;
vandu venyelitsanga milembe vikhulanga nivanyakhana vululu muno.
8Mihaanda mikali chiarikala miele;
vandu vali khu luchendo vayilukha khu muhaanda.
Lilakano liamenekwa vutswa,
vashiahidi vachaywangwa.
Mundu avulakhuho uheendelanga mwoyo vulamu vu mundu.
9Shivala shikhulanga khandi shiarikala shiele;
miliru chia Lebanoni chiayumakana,
Luhoongo lulahi lwa Sharoni lwakwa shiangalangwi,
Masambu kavungulukha khu misala mu shivala shia Bashani nende Shikulu shia Karameli.
Mwami Nyasaye Achelihitsanga Vatsiku Veve
10Mwami Nyasaye avoolanga,
“Niitsa khukhola likhuva.
Niitsa khumanyinya khuli lwandi ni tsingulu;
nzitsanga khuheelwa vukhumi nunundi.
11Muloshitsanga khukhola vindu vitamanu,
khandi shia shindu shiosi shia mukholanga ni shikhaya.
Muya kwanje kuli khuli mulilu kusambanga nu kumulaalitsa.
12Vandu valiitsa khulolekha khuli valaalitswa vakwa likooshe,
khuli mavwa kareemwa, nu khusambwa mu mulilu.
13Munyi va muli ihale wene, hulili kakholi;
munyi va muli himbi, mumanye vunyali vwanje!”
14Vakholi vu vwoni mu Sayoni varitsanga;
vandu vatamanu vakorwa Nyasaye vatechelitsanga, nivavoola,
“Ni viina khu khutsi unyala khumenya nu mulilu kulaalitsanga?
Ni viina khu khutsi unyala khumenya niyasambwa nu mulilu mihika ni mihika?”
15Nu mundu wi likhola liu vulunji khandi wi lilomoloma liatoto,
wambakhananga khulomba vukhala munjila yu khutambitsa vandi,
wambakhananga khuheelwa asoya,
wambakhananga khuhulishitsa shindu shiosi khuli shisahi shisuundulwangwa,
khandi walekhana ni likhola litamanu.
16Mundu khuli mwenoyo aliitsa khumenya ikulu;
aliitsa khwilushila mu tsimbinga tsiu lwanda;
aliitsa khuheelwa shiukhulia nende matsi ku khung'wa.
Matukhu Malahi Kaliitsa Khuvaho
17Muliitsa khulola mwami mu likoondo lielie liosi;
muliitsa khulola shivala shia yamihanga,
shivambalalu khandi shitukhanga ihale wene.
18Muliitsa khukanakana makhuva shichila matiinyu kakholekha khale nu khwireeva,
“Ni hena ha mundu wa valitsanga ali?
Ni hena ha mundu wasololanga vushuru ali?
Ni hena ha mundu wavalitsanga minaara ali?”
19Muliitsa khuvula khulolakhu vandu vilola,
valomolomanga lulomolomo lwa khwakorwa,
vang'ung'unilanga mululomolomo lwa mwakorwa.
20Lolikhu litaala likali lia Sayoni,
mwa khukholelanga milukha chieru chiu khwikhoya!
Muliitsa khulola litaala likali lia Yerusalemi,
havundu hi milembe, liheemo likhanyala khutendehitswa tawe.
Vikinji vialio shivinyala khwihikha,
inoho mikoye chialio khukutuulwa tawe.
21Navutswa Mwami Nyasaye aliitsa khukhumanyinyayo tsingulu tsietsie.
Khuliitsa khuvayo na havundu hi michela mikali nende michela mitititi,
ha tsimeli tsi liihe tsiliitsa khuvula khuvirila,
inoho tsimeli tsingali khwinjililamu;
22shichila Mwami Nyasaye neye mukhalachi weru,
Mwami Nyasaye neye mwamihi weru;
Mwami Nyasaye neye mwami weru;
aliitsa khukhuhonyinya.
23Yivi Sayoni, mikoye chiochio chiatehitswa;
shichinyala khuvoha shindu inoho khusinjilitsa tawe.
Navutswa vindu viayaaywa mu vunyishi viliitsa khukavulwa;
khali valeme valiitsa khunyola shitonye shiavo.
24Mundu avulakhuho umenyayo uliitsa khuvoola,
“Ndwalanga”;
vandu vamenyayo valiitsa khusemehwa khurula mu vwoni vwavo.
© The Bible Society of Kenya, 2013