ISAYA 31
31
Nyasaye Aliitsa Khulinda Yerusalemi
1Wooyi! Muli khu vutiinyu munyi va mukholomokhanga numutsia mu shivala shia Misri khureeva vukhonyi,
khandi vasuuvililanga mu tsifarasi tsiavo,
vali ni lisuuvitsa mu makaare kavo kiliihe shichila ni manyishi,
mu vasikali vavo vakwanilanga khu tsifarasi shichila vali ni tsingulu tsinyishi;
navutswa mwayambakhana khuheenza
khu Nyasaye Mutakatifu wa Israeli unyala khuvakhonya,
inoho khureeveshitsa khu Mwami Nyasaye!
2Khali ndio, Mwami Nyasaye ali nu vusitsa khandi neye uchilanga matiinyu nikakholekha;
shiakalukhanga inyuma mu kavoolanga tawe,
navutswa wayirechekha khukwana vandu vakholanga vindu vitamanu,
khali khukwana vakhonyani va vandu vakholanga vwoni.
3Navutswa Vamisri ni vandu vutswa, shivali navo Nyasaye tawe;
tsifarasi tsiavo tsili khuli tsinyama tsiu mmbili vutswa,
navutswa shitsinyala khutsililila khuva mwoyo tawe.
Lwa Mwami Nyasaye anyiilanga mukhono kwekwe,
mukhonyani aliitsa khwisikarila,
mundu ukhonywangwa aliitsa khukwa,
khali voosi valiitsa khutivitswa khulala.
Nyasaye Aliitsa Khulinda Yerusalemi
4Mwami Nyasaye yambolela,
“Khuli isimba inoho mwana wi isimba ahuma humanga khulinda shiukhulia shieshie,
khali niiva mukaanda kwa vayi valiitsa khulaangwa khwitsa khuchikwana
shinyala khuria lilaanjilila liavo
inoho khwikosa shichila liyooko liavo tawe.
Nindio khandi Mwami Nyasaye wi Mikaanda Chiliihe aliitsa khwitsa
khukwana Shikulu shia Sayoni nende vikulu viashio.
5Khuli lwa manyonyi kasilanga nikatsia mu vitsu viako,
nindio khandi khuli Mwami Nyasaye wi Mikaanda Chiliihe
aliitsa khulinda litaala likali lia Yerusalemi;
Aliitsa khulilinda nu khulihonyinya,
aliitsa khulihonyinya nu khulihavina.”
Mukalushi khwinzi Mwami Nyasaye.
6Munyi Vaisraeli, kalushi khu woyo,
wa mwahinganyinya muno.
7Matukhu kaliitsa khutukha lwa munyi voosi muliitsa khusiuva ihale wene, misambwa chienyu chialombwa khu ifetsa nende itsahabu, chia munyi vene mwalomba na makhono kenyu, chiachila numukhola vwoni.
8Navutswa Vashuria valiitsa khwiirwa ni shivavi,
navutswa shikali ni shivavi shia vandu valomba shiliitsa khuvativitsa tawe;
nikhali valiitsa khwilukha khurula khu shivavi,
navutswa vayayi vavukha vavo valiitsa khunikwa khukhola muhinzilu.
9Mwami wavo aliitsa khwilukha natechelanga,
khandi vimilili valilekha ipendera yavo shichila khuheenda mwoyo.
Mwami Nyasaye umali khuvoola kenako,
shichila mulilu kwekwe kwakhanga mu Sayoni,
khandi lijiko lielie liu mulilu lili mu Yerusalemi.
© The Bible Society of Kenya, 2013