ISAYA 11
11
Vwami vwi Milembe
1Shiseevu shilitsa khuseevukha khurula khu shirina shia Yese,
lusia luliitsa khumeela khu miili chiashio.
2Roho wa Mwami Nyasaye aliitsa khuva naye,
Roho wu vusitsa nende limanya,
Roho wu khukhonya nende wi tsingulu,
Roho wu vucheli khandi uheetsanga Mwami Nyasaye luyali.
3Aliitsa khuyaanza khuha Mwami Nyasaye luyali;
aliitsa khuvula khukhalachila vandu khuli mwene alolanga
inoho khuli lwa ahulilanga vutswa;
4navutswa aliitsa khukhalachila vamanani khuvirila munjila inunji,
nu khukholela vandu vateteshele katoto kenyekhanga.
Alitsa khusalilitsa vandu mu shivala khulondokhana khu lilako lielie,
nu khwiira vandu vakholanga vindu vutamanu khuvirila khu ka mwene avoolanga.
5Katoto kaliitsa khuva khuli lukhanda lwelwe lu khwivoha;
khandi vusuuvilwa vwevwe khuli lukhaanda lwelwe
lu khwivoha mu shisiindi.
6Shihulukhu shilitsa khumenya ni shimeme shi likondi,
khandi ingoi iliitsa khuhulukha ni shimeme shi imbuli;
shimoli nende isimba viliitsa khulia halala;
mwana muti aliitsa khuvimilila.
7Ing'ombe nende likunyuli viliitsa khwaya halala,
vimeme viavo viliitsa khuhulushila halala;
isimba iliitsa khwaya vunyasi khuli ing'ombe.
8Khali mwana muti aliitsa khuvayila ha vwina vwi inzukha,
mwana aliitsa khura mukhono mu vwina vwi inzukha yu vutsiva.
9Shindu shitamanu shivulakhuho shilitsa khusalilitsa mundu inoho khumwononyinya
mu shikulu shitakatifu shia Nyasaye;
shichila vandu voosi mu shivala valiitsa khumanya Mwami Nyasaye
khuli matsi kitsulanga mu inyanza.
Vandu Vali mu Vuhaambe Valakalukha
10Khulitukhu lienelo, shiseevu shia Yese shiliitsa khuva shimanyilu khu vandu vi tsimbia. Vandu vi tsimbia tsiosi valiitsa khumukhava, khandi havundu hamenyanga haliitsa khuheelwa vukhumi.
11Khulitukhu lienelo, Mwami Nyasaye aliitsa khumanyinya tsingulu tsietsie, nu khukalushitsa vandu veve varikala mu vivala via Ashuria, Misri, Patsurosi, Etsopia, Elamu, Babilonia, Hamaatsi, khandi havundu handi hosi khuluchinga lwi inyanza.
12Mwami Nyasaye aliitsa khusinjilitsa ikulu ipendera khuli shimanyilu khu vandu vi tsimbia tsiosi,
khulera halala Vaisraeli vali nivachaywa,
khulera halala vandu va Yuda vali nivasalanyinywa,
nu khuvakalushitsa khurula mu tsimbeka tsiosi tsine khulilova.
13Lishendekha lili hakari ha vandu vuluhia lwa Efurahimu nende Yuda liliitsa khuvwa,
vutsiku vuliitsa khuvula khuvaho hakari ha vandu va Yuda nende Efurahimu.
14Navutswa voosi valiitsa khukhumbila nukhukwana Vafilisti vamenyanga imbo;
voosi valiitsa khuyaaya vindu via vandu vamenyanga khuluveka luli ivukwi.
Valiitsa khukuura Vaedomu nende Vamoabu;
Vaamoni valiitsa khuvaria nu khulonda malako kavo.
15Mwami Nyasaye aliitsa khukhaaminya mulondoli kwi Inyanza Imuuchi;
khandi alilera vushindu vululu muno khuhuutsa khu Muchela kwa Efurate.
Aliitsa khurumishila vushindu vwenovo khukavulanyinya muchela kwenoko mu michela miti saba,
khu vandu valiambushilamu khu vilenje.
16Khuliitsa khuva khandi nu muhaanda mukalamu khurula mu shivala shia Ashuria,
kwa vandu veve varikalamu valondelakhu,
khuli Vaisraeli vachendelakhu
khulitukhu lia varula mu shivala shia Misri.
© The Bible Society of Kenya, 2013