MWILWATSI 7
7
Khuva nu Vusitsa mu Limenya
1Lira lilahi ni lilahi khuvira makura ku vukuuli vululu;
litukhu liu khukhutsa khuvira litukhu liu khwivulwa.
2Nu vulahi khutsia khwinjila mu inzu ya vikhulamu
khuvira khutsia khwinjila mu inzu ya vakholelamu mulukha kwi lilia;
shichila shia mundu wosi aliitsa khukhutsa;
vandu vashili mwoyo valitsushitsa kenako.
3Nu vulahi khuva nu vuveleli mu mwoyo khuvira khusekha,
shichila khutuunya khuchilanga mundu ava nu vuyaanzi.
4Mundu uli nu vusitsa aheendelanga mwoyo vandu vikhulanga;
navutswa mundu muyiingwa wayaanza limenya liu vuyaanzi.
5Nu vulahi mundu khukondeshelwa na vandu vali nu vusitsa
khuvira khwitsominywa na vandu vayiingwa.
6Lwa mundu muyiingwa asekhanga,
kali vutswa khuli mavwa karulikhanga ni kasambwa mu mulilu;
khali ndio, kenako koosi ni shikhaya.
7Ni kilikali, mundu uli nu vusitsa natambitsa wundi,
yikholanga mwene khuva muyiingwa,
khandi asooya ikoyanyinyanga tsinganakani tsiu mundu.
8Nu vulahi khumala likhuva khuvira khuraanga likhuva;
nu vulahi khwikhutsila khuvira khwilola.
9Uvuli khuva nu vurima vu vwangu;
shichila vurima vwamenya mu mundu muyiingwa.
10Uvuli khwireeva, “Shichila shina vindu viakholekhanga khale
viavira via matukhu kanu?”
Ureevanga lireevo lienelo lwa uvula vusitsa.
11Khuva nu vusitsa nu khulahi khuli khunyola miandu;
vuli nu vukhala khu voosi vashili mwoyo mu shivala shinu.
12Khulinda vusitsa khuli vutswa khuli khulinda tsisenti;
vukhala vu khuva nu vucheli vuli ndi
vusitsa vulindanga vulamu vu mundu uli navwo.
13Kanakanikhu muhinzilu kwa Nyasaye yakhola;
Ni viina unyala khulunjishitsa shia yakotominya?
14Lwa mulolanga vindu nivilolekha khuva vilahi khu munyi vene, khutukha musangale. Navutswa lwa muvirilanga mu vutiinyu, khutukha mwitsushitse ndi Nyasaye neye uchilanga vuyaanzi nende vutiinyu nu vuvaho. Mundu avulakhuho wamanya kaliitsa khwikholekha khuye, namali khukhutsa.
15Mu limenya lianje li shikhaya vutswa yili, namala khulola shia shindu shiosi; khuvela ndi mundu wi likhola liu vulunji akhutsanga, khali niiva akholanga vikholwa viu vulunji; khandi ndi mundu mutamanu atsilililanga khuva mwoyo, khali niiva akholanga vikholwa vitamanu.
16Khulwa yako, uvuli khuva wi likhola liu vulunji mbirilila, inoho khuva nu vusitsa mbirilila. Shichila shina uli ni lienya liu khwitivitsa mwene?
17Uvuli khuva mutamanu mbirilila, inoho khali khuva muyiingwa mbirilila! Shichila shina uli ni lienya liu khukhutsa litukhu liolio liu khukhutsa nilishili khutukha? 18Nu vulahi khuhaanda khu shilala mu makhono khuvira khukoritsa viosi; shichila mundu uheetsanga Nyasaye luyali avula shia aliitsa khukoritsa.
19Vusitsa vuchilanga mundu uli navwo anyola tsingulu tsinyishi khuvira vamihi likhomi vi litaala likali.
20Ni kilikali, mundu wi likhola liu vulunji avulakhuho mu shivala shinu wu kholanga malahi, nu khulekhana nu vwoni.
21Uvuli khuhulishitsakhu shia shindu shiosi, shia vandu valomolomanga. Nikakhali kario, uliitsa mwene khuhulila murumishi wowo nakhunyekanga. 22Khali yivi mwene wamanya vulahi khuli wanyekanga hali khanyishi vandi.
Khureeva Vusitsa
23Nachelitsa shia shindu shiosi khuvirila mu vusitsa vwa ndi navwo; nimbola, “Ndi ni lienya liu khuva nu vusitsa” -- navutswa vuli ihale wene khwinzi. 24Mundu anyala khumanya munjila shina, shivune shichilanga nu khuva nu vulamu? Ni kilikali, kali ihale wene khu khutsi; shiuvuli vutoro khumanya tawe. 25Navutswa khali ndio, inzi mwene nirulitsa khuva nu vucheli khandi khweka. Nali ni lienya likali liu khwenya khumanya makhuva shichila vusitsa, khandi khuli nyala khunyola machipu khu mareevo kandi nako, khali khweka vindu vichilanga nu khukhola vindu vitamanu; khandi khuli vuyiingwa vuchilanga mundu nava mulalu.
26Nanyola shindu shitamanu muno, khali khuvira likhutsa -- mukhali uli khuli mureeko. Vuyaanzi vwa akhumanyinyanga vuchilanga ukumilwa khuli tsisutsi tsikumilwa mu ineti; khandi akhukhumbelelanga khuli umali khuvohwa nu munyololo. Mundu musatsa uyaanzitsanga Nyasaye, anyala khwihonolokha khuye; navutswa akumilanga mundu wu kholanga vwoni.
27Mwilwatsi avoolanga, “Lolikhu! Nako ka nanyola munjila ya kalaha, lwa nali nishikhavanga machipu. 28Mali khurunishitsa machipu kandi, navutswa mbulakhu lia nanyola. Nanyola musatsa mulala mu vasatsa iheelefu indala utushili khuva wi likhola liu vulunji, navutswa mbulakhu mukhali wa nanyola mu vakhali iheelefu indala.” 29Lolikhu! Nako konyene ka nanyola. Nyasaye yalomba mundu khuva mulahi; navutswa vandu vayikhola khuva vacheli mu likhola liavo.
© The Bible Society of Kenya, 2013