MWILWATSI 1
1
Vulamu ni Shikhaya
1Yaka nako makhuva ku mwilwatsi, mwana wu Mwami Daudi wamihanga mu Yerusalemi.
2Mwilwatsi yavoola,
“Shia shindu shiosi ni shikhaya!
Shia shindu shiosi ni shikhaya!
Ni shikhaya vutswa!”
3Nu vukhala shina vwa mundu anyolanga
ni yakhakhola muhinzilu kwosi ni tsingulu tsiosi mu shivala shinu?
4Likhula livetsaho khandi livwaho,
navutswa shivala shitsilililanga khuvaho mihika ni mihika.
5Liuva lirulilanga nu khuyeela,
khandi likalukha vwangu havundu ha lirulilanga.
6Vushindu vuhuutsanga nuvutsia khuluveka luli ikuvanda
nu vukomokha khutsia ivuluka,
vuvotokhananga iyi neyo,
nu vukalukha havundu ha vuvetsanga nuvuranjili.
7Michela chiosi chitsukhanga mu inyanza,
navutswa shiyitsulanga matsi tawe.
Havundu ha michela chitsukhanga naho khandi ha chisenushilanga.
8Vindu viosi viakwa viteteshele;
khali mundu avulakhuho unyala khwivaala makhuva yaka;
tsimoni tsilolanga khandi tsikhaywa khulola,
inoho maroyi kahulilanga khandi kakhaywa khuhulishitsa.
9Shindu shialiho nashio shiliitsa khuvaho,
khandi shindu shikholekhakhu nashio shiliitsa khwikholekha.
Shindu shivulakhuho shicheni mu shivala yishi.
10Khulikhuho ni shindu shia mundu anyala khulomoloma,
navoola, Lolikhu shindu shicheni yishi!
Shialiho khale,
khali mumatukhu ka khwali nu khushili khwivulwa.
11Mundu avulakhuho khali mulala uliitsa khwitsushitsa vindu viakholekha mumatukhu kavira
khali yavo valiitsa khwivulwa valiitsa khuvula khwitsushitsa vindu vienyekhanga khuvaho.
Vusitsa nu vwi Shikhaya
12Inzi, mwilwatsi nali mwami wamihanga shivala shia Israeli, nimenyanga Yerusalemi. 13Ninzi mwene nihaana nu mwoyo kwosi khweka khandi khurunishitsa khuvirila khu vusitsa vwanje shia shindu shiosi shikholekhanga mu shivala shinu.
Nyasaye watiukha vandu musiko mulitoho muno! 14Nalola shia shindu shiosi shikholekhanga mu shivala shinu; shia shindu shiosi ni shikhaya; khandi vili vutswa khuli mundu yilukhanyinyanga vushindu.
15Shindu shiakotoma shishinyala khulunjishitswa,
inoho shindu shikhaliho khuvalitswa tawe.
16Nakanakana mwene, nimbola, “Lolikhu,
mali khukwa mundu mukali;
khandi ndi nu vusitsa vunyishi muno khuvira shia mundu wosi,
wali niyamihakhu Yerusalemi inzi nishili khwamiha.
Namanya katoto kene makhuva khu vusitsa nende vucheli.”
17Nali ni shinani shiu khwenya khumanya makhuva khu vusitsa,
makhuva khu vulalu nende vuyiingwa;
navutswa nanyola ndi khali kenako
kali vutswa khuli mundu wilukhanyinyanga vushindu.
18Vusitsa vunyishi khuli vwenevo vuheenditsanga mundu mwoyo;
khandi mundu utsilililanga khucheliha muno,
ameetanga vuveleli vunyishi mu mwoyo kwekwe.
© The Bible Society of Kenya, 2013