DANIELI 9
9
Danieli Yasaalila Vandu veve
1Khumuhika ku khuraanga muliamiha liu Mwami Dario mwana wa Ahaseru, nali mulala mu vandu vu lwivulu lwa Vamedi, yali nali Mwami wa Vababilonia, 2inzi Danieli nali nisomanga khurula mu vitabu vitakatifu. Nanyola mu vitabu vienevo likhuva khulondokhana khu mihika saba, nichishili khuvira khulondokhana khuli Mwami Nyasaye yali niyavoolela Muprofeti Yeremia, khuli litaala likali lia Yerusalemi liliitsa khutivitswa. 3Khulwa yako, nasaala nu mwoyo kwosi khu Mwami Nyasaye, nimureevanga akhonye khuvirila mu lisaala, nimbonga vuchila khulia, ninzifwala inguvu yalombwa khu likunia, nu khwikhala mu likooshe. 4Nasaala khu Mwami Nyasaye, uli Nyasaye wanje; khandi nimbola havulavu vwoni vwa vandu vaanje vali nivakholi.
Navoola, “Mwami Nyasaye, nivi wi tsingulu tsinyishi, khandi ukhurishitswa. Nivi musuuvilwa khu lilakano liolio khandi umanyinyanga vuyaanzi vwi mihika ni mihika khu vandu vovo vakhuyaanza khandi valondanga malako koko.
5“Khwakhola vwoni, khwakhola vindu vitamanu, khuli vatamanu khandi khwakhuhinjitsa. Khwayambakhana khulonda malako nende mechitso koko; 6khwambakhana khuhulishitsakhu varumishi vovo, nivali vaprofeti, valomolomanga khu vami veru, vimilili, vakuuka veru nende vandu veru voosi khuvirila mu lira liolio. 7Mwami Nyasaye, nivi wi likhola liu vulunji, navutswa khutsi vandu va Yuda nende Vaisraeli nende vandu voosi vamenyanga mu Yerusalemi, yavo varulanga himbi khandi varulanga ihale wene, shia havundu hosi mu vivala via wa khusalanyinyamu khuli mu tsisoni; shichila khwayambakhana khuva vasuuvilwa khu yivi. 8Mwami Nyasaye, khutsi nende vami veru, vimilili veru halala na vakuuka veru khwanyola tsisoni shichila khwakhola vwoni khu yivi. 9Yivi Mwami Nyasaye, uli Nyasaye weru, nu vulahi nukhuvelele tsimbavasi khandi nu khusemehi; shichila khwa khuhinganyinya. 10Khwayambakhana khukhuhulishitsa yivi Mwami Nyasaye, uli Nyasaye weru; lwa wavoola khumenye khulondokhana khu malako koko ka wakhuha khuvirila khu varumishi vovo, nivali vaprofeti. 11Vaisraeli voosi vameneka malako koko koosi, nivambakhana khukhuhulishitsa. Vilaamo nende misuuhitsano viahandikwa mu Malako ka Musa, wali murumishi wowo, vimali khukhukwila; shichila khwakhola vwoni imbeli wowo. 12Umali khurweshitswa makhuva ka wavoola nukhukhole khutsi nende vamihi veru vakhwamihanga, lwa wachila matiinyu makali nikakhukwila. Shindu shivulakhuho shiakholekha shia havundu hosi mu shivala shinu, shinyala khulekhanyinywa khu shindu shiakholekhakhu khu Yerusalemi. 13Matiinyu kamali khukhukwila khuli kahandikwa mu Malako ka Musa. Navutswa khali nunundi, khushili khukhureevakhu vusemehwi khu yivi Mwami Nyasaye, uli Nyasaye weru, khulekhana nu vwoni; khandi khumenya khulondokhana khu katoto koko. 14Khulwa yako, yivi Mwami Nyasaye, uli Nyasaye weru, wali wayirechekha khukhulerela matiinyu, khandi nukhola kenako; shichila nivi wi likhola liu vulunji mu shia shindu shiosi shia wu kholanga, khali niiva khwayambakhana khukhuhulishitsa.
15“Khali ndio, Mwami Nyasaye, nivi mwene warulitsa vandu vovo mu shivala shia Misri khuvirila mu tsingulu tsiotsio, khandi nivi uchilanga lira liolio nilikhuminywa nunundi. Ni kilikali, khwakhola vwoni imbeli wowo, khwakhola vindu vitamanu. 16Yivi Mwami Nyasaye, nuyaanza uvuli khukhusalilitsakhu inoho khulolelakhu vurima litaala likali lia Yerusalemi, nilili khuli shikulu shioshio shitakatifu. Vandu vi tsimbia tsindi vachayanga litaala likali lia Yerusalemi nende vandu vovo, shichila vwoni vweru nende vwoni vwa vakuuka veru vakhola. 17Khulwa yako, yivi Nyasaye, nuyaanza uhulishitsi lisaala lianje inzi murumishi wowo khandi ukholele ka nyenyanga ukhole. Nuyaanza kalushitsa Litempeli liolio liativitswa khuli liavetsanga, nikanyalikha shia mundu wosi amanye ndi nivi Nyasaye. 18Yivi Nyasaye, nuyaanza ukhuhulishitsikhu. Yikukha tsimoni tsiotsio ulole vutiinyu vwa khulimu khandi khuli litaala likali lia vasaalilamu khu yivi linyakhananga. Shikali khusaalanga khu yivi, shichila khuli vandu vi likhola liu vulunji tawe; navutswa shichila tsimbavasi tsiotsio tsinyishi. 19Yivi Mwami Nyasaye, nuyaanza ukhuhulishitsi; ukhusemehe yivi Mwami Nyasaye. Yivi Mwami Nyasaye, nuyaanza ukhuhulishitsi khandi ukholekhu shindu. Yivi Nyasaye wanje, uvuli khuvukula luhono, khu vandu voosi vamanye ndi nivi Nyasaye! Litaala likali yili nende vandu vamenyanga mulio ni vovo.
Khuli Gabrieli Yivaala Vuprofeti
20“Lwa nali ninomolomanga khandi nisaala lisaala lianje, nimbola havulavu vwoni vwanje nende vwoni vwa vandu vaanje Israeli, khandi nindevanga Mwami Nyasaye, uli Nyasaye wanje akhonye, shichila shikulu shieshie shitakatifu; 21lwa nali nishilomolomanga mu lisaala lianje, mundu walaangwangwa Gabrieli, wa nali nalola mu malolo kaanje muliraanga, yitsa vwangu muno ha nali nindi mu tsisaa tsiu khukhola musango halukolovo. 22Yambolela, ‘Danieli, mali khwitsa khukhuha vusitsa nende limanya. 23Lwa waraanga khusaala khu Nyasaye, lichipu lianyolekha. Nakhitsa khukhuvoolela lichipu lienelo, shichila wayaanzwa muno. Nuyaanza mbulishitsa, khandi umanye shia malolo kenako kavoolanga.
24“Mihika saba makhuvi saba nako matukhu ka Nyasaye amali khuviritsa ka avohololelamu vandu venyu nende litaala likali litakatifu lienyu khurula mu vwoni nende vutamanu. Aliitsa khusemeha vwoni, nu khuraanjitsa likhola liu vulunji, khu malolo nende vuprofeti vuliva vwatoto, khandi Havundu Hatakatifu Hene halitakaswa khuva hatakatifu. 25Khulwa yako, khutukha muchelihi khandi mumanye ndi khuraanjila khulitukhu lia lilako lihaanwa liu khumbakha vuyia Yerusalemi, Nyasaye nashili khurovola mwimilili utushili khwitsa, mihika saba makhuvi saba chiliitsa khuvwa. Litaala likali lia Yerusalemi liliitsa khumbakhwa vuyia ni tsinjila tsingali nende tsimbinga; khandi liliitsa khuvaho khumihika saba makhuvi saba na chivili, navutswa vutiinyu vuliitsa khuvaho mumatukhu kenako. 26Lwa mihika saba makhuvi saba na chivili chiliitsa khuva nichiakhavwa, nalwo lwa mwimilili warovolwa aliitsa khwiirwa, khandi mundu uliitsa khwamiha havukono hehe alivula khuvaho. Vandu vu mwamihi aliitsa khwitsa, valiitsa khwononyinya Havundu Hatakatifu Hene nende litaala likali. Shiheeli shilitsa khutukha khuli michelelo chia matsi kahilananga shia shindu shiosi. Maahe kaliitsa khutsililila khuvaho khutukha khumatukhu ki shiheeli, khandi litivitswa liaviritswa liliitsa khuvaho. 27Mwamihi mwenoyo aliitsa khukhola khumihika saba lilakano na vandu vanyishi. Lwa mihika chivaka ni mieli sita chiva nichiakhavwa, nalwo lwa misango nende vihanwa viliitsa khusinjilitswa. Shindu shiu khurishitsa muno shiliitsa khusinjila khu vutoonje vwi Litempeli lili mu Yerusalemi, khandi shitsililile khuvakhu khutukha lwa woyo wa shivikhayo, aliitsa khutivitswa khuli Nyasaye yamulachila.”
© The Bible Society of Kenya, 2013