DANIELI 6
6
Khuli Danieli Yali mu Vwina vwi Tsisimba
1Mwami Dario yaviritsa khurovola vagavana imia indala na makhomi kavili khusinjilila muhinzilu shia havundu hosi mu shivala shieshie shia yamihanga. 2Yarovola khandi vimilili vavaka khusinjilila mihinzilu chia vagavana vakholanga, Danieli nali mulala khuvo khusinjilila makhuva koosi khulondokhana khu vwamihi vwevwe, khuvula khukoyana mulikhola mihinzilu chiechie. 3Danieli yamanyinya havulavu ndi anyala khukhola muhinzilu mulahi khuvira vandi voosi nende vagavana. Khulwa yako, Mwami Dario yaloshitsa khumukhola khuva mwimilili wi shivala shieshie shiosi, shichila yali wacheliha mu muhinzilu khuvira vandu vandi voosi. 4Vimililli vandi voosi nende vagavana vachelitsa khulola niiva shindu shitamanu shilikhuho khulondokhana khuli Danieli yakholanga muhinzilu mu vwami vwi shivala shienesho, navutswa vavulakhu shindu shitamanu shia vanyola; shichila Danieli yali musuuvilwa, khandi shindu shitamanu shivulakhuho shia yakhola inoho vukoyanu vwosi. 5Nalwo lwa vandu venavo vavoola, “Shindu shivulakhuho shitamanu shinyala khukhukhola khuvoole Danieli nu mutamanu, nikakhali likhuva khulondokhana khu malako ka Nyasaye wewe.”
6Vasimukha nivatsia khulola Mwami Dario. Vamuvavoolela, “Yivi Mwami Dario, uhindile! 7Khutsi voosi, nu khuli vimilili vakholanga mihinzilu mu vwami vwi shivala shioshio -- vimilili, vagavana, halala na varumishi vandi voosi -- khuhuchilile ndi yivi Mwami Dario ulahaana lilako khandi likholwi shia havundu hosi. Uhaane lilako khumatukhu makhomi kavaka khwikalila shia mundu wosi khusaala khu nyasaye wosi, inoho khali khu mundu, nikakhali yivi Mwami Dario. Mundu uliitsa khwambakhana khulonda malako kenako, aliitsa khusiuvwa mu vwina vwitsulamu tsisimba. 8Yivi Mwami Dario, nuyaanza uhaane lilako, khandi ure khu lilako lia wahandika lienelo kwokwo, khulu khuvula khukalukhanyinywa. Lilako lienelo lilalondokahan na malako ka Vamedi nende Vaperisia, khulu khuvula khuhinganyinywa.” 9Khulwa yako, Mwami Dario yarakhu muhuli kwekwe nilikwa lilako. 10Lwa Danieli yamanya ndi muhuli kumali khutuuywa khu lilako lienelo, yasimukha natsia ingo. Khwali na matirisha mu inzu yeye yi ikulu kali khuluveka lwa Yerusalemi. Yasikamaho imbeli wa matirisha kali nikikushi, manya lwa kwali mwiima kwekwe, khandi nasaala khu Nyasaye hali khavaka khulitukhu.
11Vandu vali nivaloshitsi khuli vanyala khukhola Danieli vinjilamu, nivamunyola nasaalanga khu Nyasaye wewe, amukholele ka yenyanga. 12Vasimukha nivatsia khu Mwami Dario khumuvoolela vindu vitamanu shichila Danieli khulondokhana khu lilako liali niliatuuywakhu muhuli. Vavoola, “Mwami Dario, nivi watuuya muhuuli kwokwo khu lilako ndi matukhu makhomi kavaka nikashili khuvwa, shia mundu wosi alivula khureevakhu vukhonyi khu nyasaye wewe, inoho khu mundu nikakhali khu yivi Mwami Dario; khandi ndi mundu uliitsa khwambakhana khulonda lilako lienelo, alasiuvwa mu vwina vwitsulamu tsisimba.”
13Nalwo lwa vavoolela Mwami Dario, “Mulala khu vandu varula mu vuhaambe mu Yuda ulaangwangwa Danieli wayambakhana khukhuha yivi Mwami Dario luyali, inoho khulonda lilako lia watuuyakhu muhuli. Navutswa wamenya nasaalanga hali khavaka khulitukhu.”
14Lwa Mwami Dario yahulila ndio, yanyakhana mu mwoyo, khandi nachelitsa khukhava khuli anyala khuhonyinya Danieli. Yatsililila khuchelitsa khuli anyala khumuhonyinya khutukha lwa liuva liali niliyeelanga. 15Khulwa yako, vandi vali nivaloshitsi khuli vakhola Danieli vakalukha khu Mwami Dario. Vamuvoolela, “Mwami Dario, nivi wamanya ndi malako ka Vamedi nende Vaperisia kavoolanga ndi lilako liosi livulakhuho linyala khukalukhanyinywa, liu mwami avetsanga namali khuhaana.”
16Nalwo lwa Mwami Dario yahaana lilako ndi Danieli akumilwi nu khusiuvwa mu vwina vwitsula tsisimba. Mwami Dario yavoolela Danieli, “Lekha Nyasaye wowo, wa wurumishilanga mu vusuuvilwa, akhuhonyinyi!” 17Lichina lialerwa khandi nivakhunikha mu vwinjililu vu vwina. Mwami Dario yatuuya khulio muhuuli kwekwe ku vwami nende mihuuli chia vimilili vamukhonyanga muhinzilu mu shivala shieshie, khulu khwenya mundu khuvula khuhonyinyakhu Danieli. 18Mwami Dario yakalukha mu inzu yeye yu vwami, nahonga mu vutukhu vwosi vuchila khulia; shiyikhoyelakhu shindu shiosi tawe. Khali tsindolo tsiakora mu tsimoni mwemwe.
19Lwa vwali nuvwakhashia mu mavwevwe, Mwami Dario yavukha mu tsindolo, natsia vwangu ha vwina vwenovo. 20Lwa yatukha himbi khu vwina vwenovo, yalaanga nu mwoyo ku vuveleli, navoola, “Yivi Danieli, murumishi wa Nyasaye uli mwoyo! Nyasaye, wa wurumishilanga mu vusuuvilwa, ali nu vunyali vu khukhuhonyinya khurula mu tsisimba?”
21Danieli yachipa, “Yivi Mwami Dario, uhindile! 22Nyasaye yaruma injelosi yeye khwikalila minwa chi tsisimba; nitsivula khunumaka. Yakhola ndio, shichila yali wamanya ndi mbulakhu vutamanu vwosi imbeli wewe; khandi nali nishili khukhukholelakhu yivi Mwami Dario shindu shiosi shitamanu.”
23Khulwa yako, Mwami Dario yasangala khushila muno. Yahaana lilako ndi Danieli akhweseswi khurula mu vwina vwenovo. Lwa Danieli yakhweseswa khurula mu vwina vwenovo, imbala ivulakhuho yanyolekha khuye; shichila yali musuuvilwa khu Nyasaye wewe.
24Mwami Dario yahaana lilako; khandi vandu voosi vali nivalolela Danieli mwoyo mutamanu vakumilwa, nivasiuvwa mu vwina vwi tsisimba. Vo vasiuvwa mu vwina vwenovo, vaana vavo nende vakhali vavo. Khali nivashili khutukha mukari hasi mu vwina vwenovo, tsisimba tsiakwa khuvo, ni tsivalumaka.
25Mwami Dario yahandika tsibarwa khu vandu vi tsimbia tsiosi, vandu va makondo lukanu, khandi khu vandu valomolomanga tsinomonomo tsiosi lukanu. Yavavoolela, “Nyoli milembe minyishi! 26Mbananga lilako ndi shia mundu wosi mu vwami vwi shivala shianje khutukha ave naritsanga, khandi nahaananga luyali khu Nyasaye wa Danieli.
Neye Nyasaye uli mwoyo,
utsilililanga khuvaho mihika ni mihika.
Vwami vwevwe shiuvutivitswa khali hati hene tawe.
Liamiha lielie liliho khumatukhu koosi.
27Nyasaye arulitsanga mundu mu vutiinyu nu khumuhonyinya;
akholanga viloleshitsu nende vindu viu khuchenyinya
mwikulu nende khulilova,
shichila neye wahonyinya Danieli khurula mu tsisimba.”
28Khulwa yako, Danieli yali muhinda mumatukhu ku Mwami Dario nende Mwami Kureeshi wa Perisia vamihanga.
© The Bible Society of Kenya, 2013