2 SAMWELI 8
8
Daudi Yakuura Maahe
(1 Tsiny 18:1-17)
1Lwa matukhu mati kali nikakhavira, Daudi yakwana Vafilisti, navakuura. Yavukula ni tsingulu litaala lia Metsegi-ama khurula khu Vafilisti.
2Daudi yakuura khandi Vamoabu. Yavavoolela vakone hasi khu malova navapima. Yiiranga vavili khuvo, nu khulekha wa khavaka atsililile khuva mwoyo. Daudi yamiha Vamoabu, navo nivamurunga vushuru.
3Daudi yakuura khandi Mwami wa Zoba, mu shivala shia Siria walaangwangwa Hadadezeri mwana wa Rehobu, lwa Hadadezeri yali nali khu luchendo lwelwe, lu khutsia khwamiha khandi lusomo luli himbi khu Muchela kwa Efurate. 4Daudi yakumila ni tsingulu vasikali veve iheelefu indala ni tsimia saba vi tsifarasi nende vasikali veve tsiheelefu makhomi kavili vachendanga khu vilenje. Yavishila vasikali va makaare kiliihe imia indala tsifarasi, nafwokoyitsa tsiali nitsirikale.
5Lwa Vasiria vi litaala lia Damasika varuma vasikali vavo, khutsia khukhonya Mwami Hadadezeri wa Zoba, nalwo lwa Daudi yavakwana khandi niyiira vandu tsiheelefu makhomi kavili na vavili. 6Daudi yaraanjitsa mikaanda chi liihe mu lusomo lwavo, niyamiha Vasiria, navo nivamurunga vushuru. Mwami Nyasaye yaha Daudi tsingulu tsiu khukuura, shia havundu hosi ha yatsitsanga. 7Daudi yavukula tsingavo tsiali ni tsialombwa khu itsahabu, tsiali tsia vimilili va vasikali va Hadadezeri, natsihila Yerusalemi.
8Daudi yavukula khandi mukasa munyishi khurula mu mataala ka Beta nende Berotsahi, mataala kali ka Hadadezeri yamihanga.
9Mwami Toi wi litaala lia Hamaatsi yahulila ndi Daudi, yali umali khukuura vasikali va Hadadezeri. 10Nalwo lwa Mwami Toi, yaruma mwana wewe walaangwangwa Yoramu khutsia khuhaana milembe khu Mwami Daudi nu khumusanditsa, shichila yali umali khukuura Hadadezeri, wu Mwami Toi yali wamenyelela namukwananga. Yoramu yahilila Mwami Daudi, vihanwa vialombwa khu itsahabu, ifetsa nende mukasa. 11Mwami Daudi yakhola vindu vienevo, khuva vitakatifu khu Mwami Nyasaye, khuli yali nakholi ifetsa nende itsahabu yarulanga mu vandu vi tsimbia tsindi, tsia yali niyakuura -- 12Edomu, Vamoabu, Vaamoni, Vafilisti, nende Vaamaleki -- khali vindu vilala via yali nayaayi khurula khu Mwami Hadadezeri.
13Daudi yaheelwa luyali lunyishi lwa yakalukha, namali khwiira Vaedomu tsiheelefu likhomi na munane mu Luhoongo lwi Ichumbi. 14Yraanjitsa mikaanda chiliihe shia havundu hosi mu lusomo lwa Edomu, niyamiha vandu venavo. Mwami Nyasaye yaha Daudi tsingulu tsiu khukuura, shia havundu hosi ha yatsitsanga.
15Daudi yamiha Vaisraeli voosi, nakholelanga vandu veve voosi kali katoto khandi likhola liu vulunji. 16Yohabu, wali na mama wewe walaangwangwa lira Zeruya, neye yali mwimilili wu mukaanda kwa vasikali; Yehoshafati mwana wa Ahiludi, yasinjililanga vitabu viu khuhandikamu. 17Zadoko mwana Ahitubu nende Ahimeleki mwana wa Abiatsari, navo vali vasalisi. Seraya yali mukarani. 18Benaya mwana wa Yehohada, neye wasinjililanga vasikali valindanga Daudi; ma vaana vi shiyayi va Daudi, nivakhola muhinzilu ku vusalisi.
© The Bible Society of Kenya, 2013