2 SAMWELI 6
6
Lisanduku li Lilakano Lialerwa mu Yerusalemi
(1 Tsiny 13:1-14; 15:25—16:6,43)
1Daudi yalaanga halala khandi vasikali vali nivamanya khukwana va Israeli; voosi vali himbi vandu tsiheelefu makhomi kavaka. 2Ye mwene nende vasikali veve venavo, vasimukha nivatsia mu litaala lia Bahala, lili mu lusomo lwa Yuda khurulitsayo Lisanduku li Lilakano lia Nyasaye, liali niliakulikhwa lira liu Mwami Nyasaye wi Mikaanda Chiliihe, wikhalanga khu shisoko hakari wi vilombe vi tsimbaha. 3Valirulitsa mu inzu ya Abinadabu yali nili khu shikulu, nivalivikha khu likaare liyia. Uza nende Ahio, nivali vaana va Abinadabu, navo vimililanga likaare lienelo, 4Ahio neye wali imbeli wi Lisanduku lia Nyasaye. 5Daudi nende Vaisraeli voosi vimbanga tsinyimbo nivasieva ni tsingulu tsiavo tsiosi khuha Mwami Nyasaye luyali. Vakhuvanga vilili, vukhana, tsindumba, tsikengele nende manyanga.
6Lwa vali nivakhatukha havundu ha vasielelanga imu halaangwangwa Nakoni, tsihili tsisikarila. Uza yinyiila mukhono, nakumila khu Lisanduku li Lilakano lia Nyasaye. 7Mwami Nyasaye yalolela vurima Uza; khandi namwiirilaho, shichila yambakhana khumuha luyali. Uza yakhutsilaho himbi ha Lisanduku li Lilakano lia Nyasaye. 8Daudi yali nu vurima shichila Mwami Nyasaye, yali usalilitsi Uza khuvirila mu vurima vwevwe; khali nunundi havundu henaho halaangwangwa Perezi Uza #6:8 Perezi Uza: livoolanga ndi Uza yalolelwa vurima.
9Khulitukhu lienelo, Daudi yaria Mwami Nyasaye, navoola, “Nyala khuvukula munjila shina nunundi Lisanduku li Lilakano liu Mwami Nyasaye?” 10Daudi shiyali ni lienya liu khuvukula Lisanduku li Lilakano liu Mwami Nyasaye, khulihila mu litaala likali lia Daudi tawe. Nikhali, yalivukula, nalihila haluveka mu inzu ya Obedi-edomu, wi litaala lia Gatsi. 11Lisanduku li Lilakano liu Mwami Nyasaye, liatsililila khuva mu inzu ya Obedi-edomu, wi litaala lia Gatsi khumieli chivaka; ma Mwami Nyasaye nakasitsa vandu voosi vi inzu yeye.
12Nalwo lwa Mwami Daudi yavoolelwa, “Mwami Nyasaye umali khukasitsa vandu vi inzu ya Obedi-edomu, halala ni vindu viosi viali navio; shichila Lisanduku li Lilakano lia Nyasaye.” Daudi yakholomokha natsia khurulitsa Lisanduku li Lilakano lia Nyasaye, mu inzu ya Obedi-edomu, nalihila mu litaala likali lia Daudi, nu khwikhoya khunyishi muno. 13Lwa vandu vali nivachinji Lisanduku li Lilakano liu Mwami Nyasaye, vali nivamali khuchendakhu vilenje sita, Daudi yasinza shihunwa nende shimoli shikhomeelu, khuli shihanwa shiu musango. 14Daudi yasieva, khuha Mwami Nyasaye luyali, niyifwali shiambala shilavu. 15Daudi nende Vaisraeli voosi vavukula Lisanduku li Lilakano liu Mwami Nyasaye, nivahila mu Yerusalemi nivalaanjililanga, nivakhuva visiliva.
16Lwa Lisanduku li Lilakano liu Mwami Nyasaye, liali nililerwangwa mu litaala likali lia Daudi, Mikali wali mwana wi shikhana wa Saulu, yaheenzela khuvirila mu litirisha; nalola Mwami Daudi, nasievanga narumachila mulisieva litakatifu. Yasiinyikha mu mwoyo kwekwe shichila Daudi. 17Valera Lisanduku li Lilakano liu Mwami Nyasaye, nivalivikha havundu halio mu Lihemo lia Daudi, yali niyaliumbashila. Yakhola misango khandi nahaana vihanwa viu khulera milembe khu Mwami Nyasaye. 18Lwa yali niyakhamala khukhola misango, yakasitsa vandu khuvirila mu lira liu Mwami Nyasaye wi Mikaanda Chiliihe. 19Nalwo lwa Daudi yakavulila vandu voosi, vandu vasatsa nende vakhali, mukati, inyama, nende lukhovi lwi tsikeki tsiuminywa tsiali ni tsialombwa khu matunda ki misabibu; ma vandu voosi nivatsia ingo.
Mikali Yalomoloma na Daudi
20Lwa Daudi yakalukha ingo wewe, khukasitsa vandu vi inzu yeye, Mikali wali mwana wa Saulu, yitsa namwakanila. Mikali yamuvoolela, “Mwami wa Israeli wilombele mwene lira nunundi! Uvele wilavushitsi khuli mundu muyiingwa, imbeli wa varumishi vakhana va varumishi veve!”
21Daudi yachipa, “Nasievanga khulu khuha Mwami Nyasaye, wali niyandovola luyali. Shiyarovola tata wowo nende vandu vu munzu mwenyu khuva vimilili va Israeli tawe; navutswa ninzi wa yarovola. Natsililila khusieva, khulu khuha Mwami Nyasaye luyali, 22nu khwikhola mwene hali khanyishi khene khuva muyiingwa. Utsitsanga khumbukula khuli ndi shindu shikhaya vutswa, navutswa vakhana yavo valatsililila khumba luyali!”
23Mikali wali mwana wi shikhana wa Saulu, yali nashili khwivulakhu mwana wosi, khali khutukha khulitukhu lia yakhutsa.
© The Bible Society of Kenya, 2013