2 SAMWELI 11
11
Daudi nende Betsisheba
1Lwa muhika kwali nu kuli himbi khuvwa, mumatukhu ka vami vatsitsanga khukwana mu liihe, Daudi yaruma Yohabu nende varumishi veve nende vasikali va Israeli voosi, khutsia khukwana. Vakuura Vaamoni, nivavotokhana litaala lia Raba, navutswa Daudi yatsililila khurikala mu litaala lia Yerusalemu.
2Litukhu lindi, lwa vwali nuvwakhenya khwila, Daudi yavukha mu tsindolo khurula khu shitali shieshie, nasimukha natsia ikulu wi inzu yeye yu vwami. Lwa yali nachenda chendayo, yalola mukhali niyisinganga. Mukhali mwenoyo yali wakaasa likoondo muno. 3Daudi yaruma mundu khutsia khulola ye ni viina, navoolelwa ndi mukhali mwenoyo, alaangwangwa Betsisheba, mwana wi shikhana wa Eliamu yivula khu mukhali wa Uria wali Muhitse. 4Daudi yaruma varumwa khutsia khuvukula mukhali mwenoyo. Yitsa khuye, nakona naye. (Yali umali mulukha kwekwe kwa shia khu mweli ku khwinihitsa.) Manakalukha ingo. 5Mukhali mwenoyo yavelekha, naruma likhuva khu Daudi, navoola, “Mbelitsi mwana.”
6Nalwo lwa Daudi yaruma mundu khuvoolela Yohabu, “Ndumila Uria, uli Muhitse.” Yohabu yamuruma khu Daudi. 7Lwa Uria yatukhaho, Daudi yamureeva niiva Yohabu nende vandu vatsilililanga khuva valamu, khandi khuli liihe liatsilililanga. 8Daudi yavoolela Uria, “Simukha utsi ingo, khandi uhulushi hatititi vutswa.” Uria yarulaho, Mwami Daudi namurumila shihanwa ingo wewe. 9Navutswa Uria yali nashili khutsia ingo; nikhali yakona ha shilivwa shi inzu yu vwami, halala na varumishi vu Mwami Daudi. 10Lwa Daudi yahulila ndi Uria yambakhane khutsia ingo, nalwo lwa yamureeva, “Urula khu luchendo; shichila shina nuvula khutsia ingo?”
11Uria yamuchipa, “Vandu va Israeli nende Yuda vatsia khukwana mu liihe, khandi vali ni Lisanduku li Lilakano. Mwimilili wa vasikali vaanje Yohabu nende varumishi veve, vasimiikha maheemo kavo ku khumenyamu muvikuri. Mbele natsia ndina ingo, khutsia khulia nu khung'wa, khandi ngone nu mukhali wanje? Nzisuuhanga khuvirila khu shia shindu shiosi shitakatifu, shinyala khukhola shikholwa khuli shienesho tawe!”
12Nalwo lwa Daudi yamuvoolela, “Khola nushiva hanu litukhu liosi, nzitsanga khukhuruma mukamba khutsiayo.” Uria yatsililila khuva mu Yerusalemu khulitukhu lienelo nende khulitukhu lialondakhu. 13Daudi yamwinjilitsa khwitsa khulia shiukhulia shia halukolovo, namukhola khutanda. Navutswa Uria yambakhana khutsia ingo, khali khulitukhu lienelo vutukhu; nikhali yakona khu mulinjeti kwekwe, halala na varumishi vu Mwami Daudi.
14Litukhu lialondakhu mu mavwevwe, Daudi yahandichila Yohabu ibarwa naha Uria achihile khuye. 15Yahandikamu makhuva kavoolanga, “Vikha Uria imbeli wene, havundu ha liihe lituumanga muno, khandi wilushi khumulekha yiirwi.” 16Lwa Yohabu yali navotokhananga litaala, yaruma Uria khutsia havundu ha yali namanyi mutsiku ali ni tsingulu tsinyishi muno. 17Lwa vandu vi litaala vitsa nivakwana Yohabu, valala khu varumishi va Daudi viirwa. Khali ndio, Uria wali Muhitse yiirwa khandi.
18Nalwo lwa Yohabu yavoolela Daudi shia shindu shiosi khulondokhana khu liihe, 19naha murumwa mivaalo, “Lwa uliitsa khuva numali khuvoolela Mwami Daudi makhuva khulondokhana khu liihe, 20aliitsa khuva nu vurima khandi akhureeve, ‘Shichila shina, numutsia himbi mu litaala khuvakwana? Munyala khuva mwali mwakorwa ndi vanyala khulesa mivanu khurulila mu masisi? 21Munyala khwitsushitsa khuli Abimeleki mwana wa Gidioni yiirwa? Kikholeshela mu litaala lia Tsebezi, wa mundu mukhali yamulesa ni lichina liu khusia khuvirila mulisisi namwiira. Khulwa yako, shichila shina numutsia himbi khu lisisi?’ Niiva Mwami Daudi alakhureeva makhuva kenako, umuvoolele, ‘Murumishi wowo Uria, uli Muhitse umali khandi khukhutsa.’ ”
22Murumwa mwenoyo yasimukha, natsia khulola Daudi, namuvoolela shia shindu shiosi, shia Yohabu yali namuvoolele avoole. 23Murumwa mwenoyo yavoolela Daudi, “Vandu venavo vali ni tsingulu tsinyishi khukhuvira khutsi, nivitsa khukhukwana mushikuri; navutswa khwa vakhunganyinya, nivakalukha mu vwinjililu vwi shilivwa shi litaala. 24Nalwo lwa vakhulesa khutsi varumishi vovo ni mivanu khuvirila mu lisisi. Valala khu varumishi vovo yivi Mwami Daudi, vamali khukhutsa; khali murumishi wowo Uria, uli Muhitse umali khukhutsa.”
25Daudi yavoolela murumwa mwenoyo, “Tinyilitsa Yohabu, umuvoolele avuli khuheendakhu mwoyo, shichila shiunyala khumanya mundu unyala khukhutsila mu liihe tawe. Muvoolele akwane litaala lienelo, nu khulivukula ni tsingulu.”
26Lwa mukhali wa Uria yahulila ndi musatsa wewe umali khukhutsa, yamwikhula. 27Lwa yali namali khumwikhula, Daudi yarumana likhuva mukhali mwenoyo, alerwi munzu yeye yu vwami. Yakwa mukhali wewe niyivula khuye mwana wi shiyayi. Navutswa Mwami Nyasaye, shiyali wayaanzitswa ni shikholwa shia Daudi yali nakholi tawe.
© The Bible Society of Kenya, 2013