2 TSINYINGA 3
3
1Nalwo lwa Mwami Solomoni yaraanga khumbakha Litempeli liu Mwami Nyasaye mu Yerusalemi khu Shikulu shia Moria, nali havundu wu Mwami Nyasaye yali niyalolekha khu tata wewe Daudi. Naho havundu ha Daudi mwene yali niyarovola liliumbakhwa, havundu ha vahulachilanga imu mu mulimi kwa Oranani, wali mundu Muyeebusi. 2Mwami Solomoni yaraanga khumbakha Litempeli khu mweli kwa khavili khumuhika kwa khane mumatukhu ka yamihanga. 3Nindi Mwami Solomoni yapima khuli Litempeli lia Nyasaye liumbakhwa: lienyekhanga live nu vuraambi tsimita 27 nende vukalamu tsimita 9, khulondokhana khuli vapimanga mumatukhu kenako. 4Vwinjililu vwali inusu yu vukalamu vwi Litempeli: tsimita 9 nende vuraambi khutsia khwikulu tsimita 54. Mukari mwavinjililanga mwali mwavekhwa itsahabu indahi yonyene. 5Havundu ha kali hene mu Litempeli hali halombwa ni misala chi mitarakwa, khandi havekhwa itsahabu indahi yonyene. Hali hasiaywa ni vindu vialolekhanga khuli misala chia mashindu nende minyololo. 6Mwami Solomoni yasiaya Litempeli na machina ku vukuuli vululu muno; khandi itsahabu inyukhu khurula mu shivala shia Paravahimu. 7Mwami Solomoni yavekha itsahabu khu masisi ki Litempeli lienelo liosi, milondi, tsifulemu, nende miliango. Yalomba vindu vialolekhanga khuli vilombe vi tsimbaha khu masisi kalio. 8Yalomba Havundu Hatakatifu Hene: vuraambi vwali shilala nu vukalamu vwi litempeli; hali nu vuraambi tsimita 9 nende vukalamu tsimita 9. Yavekha masisi ka Havundu Hatakatifu Hene ni itsahabu inyukhu tsitani tsinyishi khuvira 20. 9Vulitoho vwi misumari chialombwa khu itsahabu vwali tsiguramu tsimia 570; khandi yavekha itsahabu inyukhu mu vwiyangu vwi inzu yikolofa.
10Mwami Solomoni yalomba Havundu Hatakatifu Hene vindu vivili khu musala vialolekhanga khuli vilombe vi tsimbaha. Yavivekha ni itsahabu inyukhu. 11Tsimbaha tsivili tsi vilombe vi tsimbaha tsiali nu vuraambi tsimita 4.4: shia livaha liali nu vuraambi tsimita 2.2, manulutiila khu lisisi li litempeli; nikhali livaha lindi liatiilanga khu shilombe shi tsimbaha shindi liali nu vuraambi khandi tsimita 2.2; 12khali ndio, livaha lilala li shilombe shi tsimbaha shia khavili, liali nu vuraambi tsimita 2.2, navutswa liatiilanga khu lisisi lindi li litempeli; livaha li shilombe shi tsimbaha shindi liali nu vuraambi 2.2, navutswa liatiilanga khu livaha li vilombe vi tsimbaha. 13Tsimbaha tsi vilombe vi tsimbaha tsienetso, tsiali tsindambi ni tsimita 4.5. Vilombe vi tsimbaha tsienetso tsiasinjilitswa nitsiheenzelele ilwanyi wi Litempeli lienelo. 14Yalomba luvaala lwa Havundu Hatakatifu Hene khu machoro malahi khandi khu machoro kandi, kali ni katsukanyinywamu bulu, sambarau, nende vumuuchi, khandi nalomba vindu vialolekhanga khuli vilombe vi tsimbaha mukari mwalwo.
Tsirilu Tsivili Tsialombwa khu Mukasa
(1 Vami 7:15-22)
15Mwami Solomoni yalomba tsirilu tsivili; shia irilu yali ni tsimita 15.5, manatsivikha imbeli wi Litempeli. Shia irilu yali nu mulondi khutsia khwikulu tsimita 2.2. 16Yalomba vindu vialolekhanga khuli ni minyololo, navutswa viasasanga khuli matongolo khwikulu khwi tsirilu tsienetso; nalomba matunda ka pomenguraneti imia indala; yavikha matunda ka pomenguraneti kenako khu minyololo. 17Yarechekha tsirilu imbeli wi litempeli: irilu indala khuluveka luli ikuvanda, khandi yindi khuluveka luli ivuluka. Yakulikha irilu khuluveka luli ikuvanda lira Yakini inoho Nyasaye neye uraanjitsanga. Yakulikha yeyo yali nili khuluveka luli ivuluka lira Boazi, nakhwo khuvoola “Tsingulu tsili muyo.”
© The Bible Society of Kenya, 2013