Nyɛ̀nɛ̀ŋ 24
24
E keìɛ àŋ naŋ wa gbùwò wo Pɔɔ̀ ɗì lɛ
1Maŋ ɗɔ̀ɔ̀ nɔɔnɔŋ naŋ mààŋ, yèè wo kànà sìèfèìŋ zòòlo gbeeɔ̀ Ananaayà yaà aŋ màmànkùmɛ̀ŋ fuɔŋ nyàŋ bà e kpùlìà wo lɔɔyàa àŋ nyaaŋ wo Tɛtɔlɔ̀ wɔ, naŋ hnè koɓɛ̀ wo Kanaà Filɛ̀ yèè àŋ nauŋ tɔ̀ɔ̀ e zàwè wèè e nànàaŋ wo Pɔɔ̀ naŋ nyiŋ jàà lɛ. 2Àŋ naŋ hìɛ̀ŋ wo Pɔɔ̀ ko fɛɛ̀feìŋ, kpeiŋ wo Tɛtɔlɔ̀ naŋ hèè e zawè nyiŋ nɛ̀ wo Kanaà Filɛ̀ feìŋ wààŋ, “Màŋ nyɛ̀nɛ̀ŋ anyuùŋ wi nyàŋ àŋ nɔ̀ŋ ke jii fàa sùà wèè e teenga mùnlaŋ, yèè esàɓù ke kpèè siaŋ mɔɛ̀ŋ wɔŋ fuɔŋ wiɔ̀ yaà nàaŋ tɛ̀ɛ̀. 3Maŋ jii wi màŋ naŋ fɔ̀ yèè è naŋ niŋ jàà kùàŋ dìì yàwi nààŋ gbiŋ wèè e yèɛ mùŋ naŋ nyɛ̀nɛ̀ŋ lɛ Filɛ̀. 4Miŋ manàŋ wèè kà pɔ̀ɔ̀ è teenga mɔ̀ɛ̀ zimgbe, kɛɛ mìŋ yààùm pɔɔwɔ, kɔ̀nɛɛ̀ŋ wèè maŋ gɔ̀àì jii dìì wèè maŋ wi kumiàŋ eum kìɛ̀ŋ ke jii gbài kpuu. 5Wo felaa wɛɛ̀ yaà wo nyuùŋ dàà ke gbòà yèè ke kpùùnɛɛ̀ wèè aŋ Juùù nyuuŋ nyaŋ e ɗuunyaàŋ gbiŋ sùà. Wò yaà ɓɛìŋ wo ɓɛ̀màŋɗì ke gbòò bà e yìwìà ko Naazɔ̀ɛ̀. 6Wò naŋ ngèè ɓɛìŋ kàmè ɗewe wèè wo hiàŋ e ɓɛ̀ɛ̀pɔ̀ɔ ko Saaŋ Zòòlò Dayài, yèè è nauŋ kùwò. [È naŋ ɗewè wèè euŋ gbaì nààŋ maŋ sàwà yàwi bi màŋ naŋ tɔɔ̀ lɛ, 7kɛɛ wo sìèfèìŋ aŋ kààlòòɗùà nyaŋ àŋ nyaaŋ Lasià naŋ hnè yèè wò naŋ wi wuŋ gè sìwè e gààŋ sùà. 8Yèè wò naŋ woò wààŋ anyùùŋ nyaŋ nauŋ gbòwò e keìɛ nyàŋ aŋ hiàŋ e zawè nyiŋ nɛ̀ ko nɛ̀ɛ̀ŋ muìŋ.] Sèè mùŋ dawadàwà wo felaa wɛɛ̀ muàŋ bì, mùŋ do nàŋ nyìmè kɛ̀ maŋ keì maŋ kinɛiŋ è naiŋ woò kɛ̀ wò naŋ nyɛ̀nɛ̀ŋ maŋ è yaà tɔ̀ɔ̀nyaàŋ.” 9Aŋ Juùù nyaŋ gbiŋ naŋ wa gbùùyè koɓɛ̀ guùŋ yèè àŋ naŋ nyimèè kɛ̀ e yèɛ wo Tɛtɔlɔ̀ naŋ woò lɛ è yaà e tɔ̀ɔ̀nyaàŋ.
Wo Pɔɔ̀ naŋ gbòò wèè wuŋ bi wo Kanaà Filɛ̀ fɛɛ̀feìŋ
10Kpeiŋ wo kanaà naŋ niŋ hàlèè wo Pɔɔ̀ wèè wo gbòà.
Wo Pɔɔ̀ naŋ woò wààŋ, “Kà nyìmàŋ kɛ̀ màŋ nɔ̀ŋ wo kana gbàì keì wɔŋ fuɔŋ wɛɛ̀ŋ diɛŋ wèè maŋ doa jika bà, weètii e zɔlɔ̀ yààìm wèè ka gbaì wèè miàŋ bi ko fɛɛ̀fenùum. 11Sèè mùŋ naŋ ɓɛ̀nɛ̀ŋ maŋ nɔnɔŋ tùaŋ tɛ̀ɛ̀ wèè maŋ niŋ nyìmàŋ muàŋ bi, kɛ̀ maŋ ɗɔ̀ɔ̀ zììyà jɛ̀wɛ̀ tìyèe kòò màŋ mààŋ dai nààŋ mìŋ naŋ mɛ̀iŋ kɔ̀ ko Jùlusɛ̀làm wèè ka zoolò. 12Aŋ Juùù nyaŋ gòim mɛɛ̀ŋ yàwi nyùùŋ gbiŋ è doò nɔ̀ŋ kpaane kpaane kò Saaŋ Zòòlò Dayài. Miŋ gò dàà è gbɔ̀ɔ kò sààŋ zòòlò aŋ Juùù nyaŋ ɔ̀ɔ̀ ko Jùlusɛ̀làm, ko jawa gbeeì. 13Aŋ kuwà kè dòmàŋ tɔ̀ɔ̀nyaàŋ gbiŋ janyai wèè màŋ keì mɛɛ̀ŋ àŋ yààìm yaà gbùwà sùà ɗì maŋ. 14Kà nyimèè kɛ̀ aŋ màmàŋkùmɛŋ nyiŋ nyàŋ gongà kɛ̀ ke Dòmàŋ Kanaà mìŋ naŋ dè maŋjɛ̀wɛ yɛ̀ ke fè kè dòmaŋ kɛnɛɛ̀. Kɛɛ wo Dàyà gunɔ̀ɔŋ nɔŋ aŋ nèwàènèweim nyàŋ zoolà wɔ̀ wuŋ nɔŋ mìŋ zoolà. Mìŋ naŋ hààwè e yèɛ gbiŋ yaà sìnga niŋ maŋ Sàwà maŋ wo Dayà naŋ wa kìɛ̀ŋ wo Mòòze màŋ sùà yèè e yèɛ aŋ wɛ̀ijì nyaŋ naŋ woò lɛ. 15Mìŋ kuwa ke jii tùlia wo Dayà sùà màànààŋ nɔŋ nyiŋ pɛɛ jàà nìŋ kùàŋ dìì lɛ, kɛ̀ anyuùŋ fàa nyàŋ gbiŋ, wo jè tɔ̀ɔ̀nyaàaŋ yèè wo jè maŋ tùwo naanààaŋ do wa nàwèè nàŋ yèwè e fàaà dìì. 16Weètii mìŋ nyɛnɛŋ e tɛ̀ɛ̀tɛ̀ɛ̀ɛ gbiŋ mìŋ naŋ ɓɛ̀nɛ̀ŋ nyɛ̀nɛŋ wèè ka kɛ̀ɛ̀nɛ̀ŋ e gòngo siaŋ koɓɛ̀ Dayài yèè wo nyuùŋkpùuŋ.
17“Nààŋ mìŋ naŋ kɔ̀ maŋ fuɔŋ joo sùà wèè maŋ doa jika, mìŋ naŋ kɛɛ̀ wèè ka hìàŋ manɛ̀ŋ kìɛŋ koɓɛ̀ anyuùŋ pɔ̀ɔ nyàŋ yèè koɓɛ̀ wɔŋ fuɔŋ miɔ̀ŋ yèè wèè ka gè maŋ saàà. 18Aŋ Juùù nyaŋ bà nyiŋ naim yɛmɛ̀ ko jɔ̀ɔ̀lègbèè Zòòlò Dayài, nààŋ mìŋ naŋ kpɛ̀ɛ̀yɛ̀ nyɛ̀nɛ̀ŋ e làngì ke nyɛ̀nɛŋ zɛ̀nɛɛ̀ŋ, ke yèɛ nyɛnɛŋ wo nyùùŋ zɛ̀nɛ̀ŋ. Tɛɛ̀ àŋ naim mɛɛ̀ŋ mìŋ yaà mɛ̀iŋ nyinie ko Saaŋ Zòòlò Dayài. Miŋ gòo kòà kè gbòò ànyùùŋ, e kìlà miŋ gòo dàà kè gbòà. 19Aŋ Juùù nyaŋ bà e yìwìà ko Eesìà yaào dài e teenga lii, yèè sèè àŋ kɛɛnɛ̀ŋ e keì gbiŋ e nyaàiŋ eim dè, kɛ̀ àŋ he weè naàŋ nàŋ nɔ̀ŋ kià. 20Kɛɛ sèè è go yɛi nɔ̀ŋ, kɛ̀ tɔ̀ aŋ felaa nyɛɛ̀ŋ nyiŋ bi aŋ woò e keì naanààaŋ mìŋ naŋ nyɛ̀nɛ̀ŋ nààŋ mìŋ naŋ kɔ̀ anyùùŋ gbèègbèè aŋ Juùù nyaŋ fɛɛ̀feìŋ. 21E keìɛ nɔŋ àŋ naim gbùwà ɗì lɛ nàŋ yaà e yèɛ mìŋ naŋ woò ke miè gbee sùà nààŋ mìŋ sìà nyiìŋ ko fɛɛ̀feìŋ mìàŋ, ‘Mìŋ yaà nàaŋ kɔ̀ɔ̀yɛ̀ e gbài dìì esaɓù kɛ̀ mìŋ naŋ haawè kɛ̀ anyuùŋ fàa nyàŋ do nàŋ yèwè e fàaà dìì wɔŋ nyiiŋ gèeo sùà.’ ”
22Wo Kanaà Filɛ̀, wo yèɔ naŋ wa nyìmè e ɗeweɛ̀ e nyaàiŋ dè ke Dòmàŋ Kanaà Jisɛ̀ wɔ, naŋ nyɛ̀nɛ̀ŋ maŋ nɔnɔŋ tùaŋ yèè wò naŋ hìɛ̀ŋ e keì wòo bi ko dìa. Wò naŋ woò wààŋ, “Mìŋ do nàŋ hàà e kiti mɛ̀ sèè wo Lasià, wo kànà aŋ kààlòòɗùà nyaŋ wò hnàŋ.” 23Wò naŋ wòò wo nyùùŋ gbèè kààlòòɗùàa yaà wa yɛ̀ɛ̀mɛ̀ wo Pɔɔ̀ diɛŋ wɔ̀ kɛ̀ wo yɛmɛ̀uŋ diɛŋ, kɛɛ ɓɔ̀ wò gbìàuŋ kò sààŋ nyìwì yèè kɛ̀ ɓɔ̀ wò keewè àŋ dàwiuŋ nyàŋ kùàŋ feìŋ sèè àŋ mɔnɔŋ wèè auŋ kpuumàŋ.
Wo Pɔɔ̀ kà wo Kanaà Filɛ̀ yaà wo Dɔ̀silà fɛɛ̀feìŋ
24Maŋ ɗɔɔ kpàa bà naŋ mààŋ yèè wo Kanaà Filɛ̀ yaà wo jawèuŋ Dɔ̀silà, wuŋ pɛɛ wò yaà wa wo Juùù, naŋ kɔ̀ koɓɛ̀i wo Pɔɔ̀ yaà wa lɛ̀. Àŋ naŋ tùɔ̀ŋ wèè wo Pɔɔ̀ wèè wo gbòà nyiŋ kɔɔ e nyaàiŋ dè e hààwe kɛ̀ɛ̀nɛŋ wo Jisɛ̀ Kulaì sùà. 25Kɛɛ e jùù naŋ wa nyɛ̀nɛ̀ŋ wo Kanaà Filɛ̀ nààŋ wo Pɔɔ̀ naŋ wòò e kèè e tùwo siaŋ, yèè wo nyùùŋ yɛmɛ̀ wuŋ bi diɛŋ wèè ke kpèèuŋ nɛɛ̀ŋ, yèè ke ɗɔ̀ɔ̀ e gbàiɛ̀ do nàŋ hnè yɛ. Wo Kanaà Filɛ̀ naŋ wòò wo Pɔɔ̀ wààŋ, “E keì wòoɛ̀ yaà naàŋ tɛ̀ɛ̀. Màŋ naàŋ ɓɛ̀nɛ̀ŋ kàa. Kɛɛ sèè mìŋ kɛɛnɛ̀ŋ ɓɛìŋ e ɗewe mìŋ do nàŋ tùɔ̀ŋ weèum.” 26Kɛɛ e tèèngà guùŋ bi sùà wò yaà wa yɛ̀ɛ̀mɛ̀ dòmaŋ wèè wo Pɔɔ̀ wouŋ kìɛ̀ŋ ke nɛɛnɛŋ. Kpeiŋ wò hewa tùàŋ wèè Pɔɔ̀ pɛɛpɛɛ wèè aŋ gbòà.
27Maŋ dòà tìyèe naŋ mààŋ, yèè wo Pɔsiɔ̀ Fɛtɔ̀ naŋ nɔ̀ŋ wo kana ebɛ̀ŋ wo Filɛ̀. Wo Kanaà Filɛ̀ manaŋ wa wo fɔ̀ɔ̀yɛ̀ aŋ Juùù nyaŋ maŋ jii, weètii wò naŋ nyiŋ wa kìɛ̀ŋ wo Pɔɔ̀ yèè wò nauŋ jòò ko sààŋ nyìwìi.
Trenutno izabrano:
Nyɛ̀nɛ̀ŋ 24: WFESD
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Gola New Testament Translation and Literacy Project © Bible Society in Liberia, 2019.