Rome iriniwok 4
4
Abraham ki asperimototawew Kice Manitowa, icikowisk tca ki iterimiko
1Mamitonerimatan kitaniskotape kimocomino Abraham. Tan ka iciwepasitc icikowisk kitci ki iterimikotc Kice Manitowa? 2Kecpin Abraham icikowisk ki iterimikotc osam e ki miro totak, kata ki takonipan kitci ki otci mirwatcimitisospan. Nama aric tekaci kata ki otci ici mirwatcimitiso Kice Manitowa e kanawapamikotc. 3Itasinatew meka Kice Manito Omasinahikanik:
“Abraham ki asperimototawew Kice Manitowa,
icikowisk tca ki iterimiko.” Genèse 15.6
4E otamirotc iriniw, coriariw kanewiw. Nama itakaniwiw: “Oma, ki cawerimitin.” Otcitakotc kicikowakaniwiw aniheriw irikik ka ki ici kackitamatisotc. 5Pitoc aric icinakon apitc awik aka wikokwe totak kekociciriw kitci ki otci kanewitc icikowisk kitci iterimikotc Kice Manitowa. Tepirak asperimototawew Kice Manitowa, wir ka akwacimaritci anihi ka pactatiritci. Icikowisk iteritakosiw anahwe awik, otasperimowin tepirak e kanawapatcikaterik. 6Enko ohweriw ka ki itetc weckatc Okimaw Tapit kaie wir, e arimomaspan e apitc caweritakosiritci kaskina awiriw icikowisk ka iterimikoritci Kice Manitowa, aka e kanawapatamiritci aniheriw e apitc mocak miro totamirikwen kekotc nama. Ohweriw ki masinaham Okimaw Tapit:
7“Caweritakosiwok kaskina ka kasihamawakaniwitcik opactatowiniwaw,
kaie kaskina ka maninikaterik ka ki ici matci totakik.
8Caweritakosiw anahwe iriniw
aka kitci anwerimikotc Kice Manitowa opactatowin otci!” Psaumes 32.1-2
9Tepirak ani Kice Manito otirinima ka ki kicawatocwakaniwitcik ka acterik kitci ici cawerimakaniwitcik kekotc ma peikon kaie aniki aka ka ki otci kicawatocwakaniwitcik kaie wirawaw? Aci aric nit ickwa itwanan: Abraham tekaci e ki asperimototawatc Kice Manitowa, ekoni wetci icikowisk ki iterimikotc. 10Tan ani apitc mia icikowisk ka iterimakaniwitc Abraham, ka ickwa ani, kekotc ma epwamoci kicawatocwakaniwitc? Icikowisk ki iterimakaniwiw epwamoci kicawatocwakaniwitc, nama ka ickwa ani kicawatocwakaniwitc! 11Nanake ki kicawatocwakaniwiw, kitci kiskeritakonik icikowisk e ki iterimikotc Kice Manitowa osam e ki asperimototawatc, mekwata kiapatc aka moci e ki otci kicawatocwakaniwitc. Ekoni wetci iteritakositc Abraham aiamihe otawinan kaskina ka tapwerimatcik Kice Manitowa kaie icikowisk ka otci iterimikotcik, misawatc aka e ki kicawatocwakaniwitcik. 12Iteritakosiw kaie wir Abraham aiamihe otawinan cota iriniwok, ka ki kicawatocwakaniwitcik. Ni wi itwan aniki ka asperimotcik Kice Manitowa, mitowi kotawino Abraham ka ki asperimototawatc epwamoci kicawatocwakaniwitc.
E asperimototawokw Kice Manito ki mirikowinano ka ki ici nespi tapwetc
13Aci weckatc Kice Manito ki ici nespi tapwekopan Abrahama otci, kirika kaskina onitcanica acitc otaniskotape osima, kitci mirakaniwitcik kaskina ota askik. Ki nespi tapwew aniheriw icikowisk e ki iterimatc Abrahama osam e ki kanawapatak otasperimowiniw, nama tepirak e ki nosanetaritci aiamihe irakonikewiniw. 14Kecpin tepirak aniki ka nosanetatcik aiamihe irakonikewiniw ka ki iteritakositcik kitci pe otitikotcik aniheriw ka ki ici nespi tapweritci Kice Manitowa kitci pakitinamiritci, nama wiec kata irapatanipan kitci asperimototawakaniwiritci, kaie nama wiec kata irapatanipan ka ki ici nespi tapweritci. 15Kiciwahakaniwiw meka Kice Manito kecpin aka e nosanehikaterik otirakonikewin. Kecpin aric aka e takok aiamihe irakonikewin, nama awocamec kata ki itactahorakaniwiw awik e ki pikopitak.
16Kaskina iriniwok ka asperimototawatcik Kice Manitowa, enko aniki ka pe otitikotcik aniheriw ka ki ici nespi tapweritci kitci mirikotcik. Nama takoniw ke ki itotisketcik kitci ki kackitamatisotcik; cawerimikowok Kice Manitowa. Kaskina tca Abraham otaniskotape osima kata mirakaniwiwok. Nama tepirak aniki ka ki pe otitikotcik cota aiamihe irakonikewiniw ka mirakaniwitcik aniheriw; peikon aniki ka ki asperimototawatcik ici mirakaniwiwok, mitowi Abraham ka mirakaniwitc. Abraham enko anahwe kaskina ka aiamihe otawiikw. 17Wir tipirawe Kice Manito ki itew Omasinahikanik:
“Ki miritin mitcet iriniwok ke pe tatcik kitci iterimiskik notawinan.” Genèse 17.5
Anahwe tca Abraham iteritakosiw kotawino, osam e ki asperimototawatc Kice Manito, anihi ka apitcipaharitci kaskina iriniwa ka ki poni pimatisiritci, kaie ka ki totak kitci takonik kaskina aka moci ka ki otci otitakotcik kekociciriw.
18 Abraham ki tapwerimew Kice Manitowa kaie asperimopan kotc ka ki itikospan Kice Manitowa, misawatc aka e ki icinakonik kitci isparinik. Ekota ni ka ki otcitciparinik kitci iteritakositc mitcet iriniwok otawiwawa, kotc Kice Manito wir tipirawe ka ki itetc:
“Kata mitcetiwok kitaniskotape kosimak ke pe tatcik.” Genèse 15.5
19Ani apitc ka itakaniwitc aniheriw Abraham, aci orina kiceatisikopan, wiec mitato mitana tato piponesikopan. Aci pecoweritamopan kitci nipotc, kirika okoma Sara nama wiskat ki otci miropariniw kitci taratc awaca. Aric mocak ki asperimototawew Kice Manitowa. 20Nama ki otci ponitaw e asperimototawatc. Nama kaie ki otci anweritam ka ki ici nespi tapweritci Kice Manitowa. Kirawe eckam ki iti mackawariw otasperimowin kirika ki icperimew Kice Manitowa.
21Tekaci ki ketcinawerimew Kice Manitowa e tipi mackawisiritci kitci totamiritci ka ki ici nespi tapweritci. 22Ekoni wetci icikowisk ki iterimikotc Abraham Kice Manitowa, e ki asperimototawatc. 23Itasinatew meka Kice Manito Omasinahikanik:
“Icikowisk ki iterimakaniwiw.” Genèse 15.6
Nama aric ki otci masinihikateriw tepirak Abraham otci. 24Kaie kirano wetci ki masinahikatek anihe, kaie icikowisk kitci iteritakosiikw, kirano ka tapwerimokw Kice Manito, anahwe ka ki apitcipahatc Cecoca Ka Tiperimitokw. 25Ki pakiterimew meka Cecoca kitci nipahakaniwiritci kipactatowininariw otci kirika ki apitcipahew icikowisk kitci ki iterimitokw.
Canadian Bible Society, 2014