Haɡae 2
2
Korowii Dea baa kwaara ma jirima wa
1A ɡɛ bena#2:1 A ɡɛ bena nɔ dɛ baɡle Koojen Dareɔs kora dii saŋ wa. la korobie anuanɛ tɔpera fifraanɛ dɛ beŋkpoŋ ta la, Korowii berɔ che o keame Haɡae nɛɛ dɛ bol waa ŋɔ, 2ó bɔɔ Juda harɛ nomoa Sɛrobabɛl, ne Sɔfonomoa Josua dɛ harɛ la ta nɛra baa kaa la ŋɔ, 3“Umee ta kaa dɛ́ lii n Dea nɔ jirima o fa aa dɔa ɔ? Taraken, ɛrɛɛ hɛɛ nao wɔ? O berɛ kompɛɛ bɛl he siwi ta naa?#Ɛsr 3:12; Sek 8:9 4He bɛlbwa bɛ ɡel o bwara yɔr, hé ɛ toma la, n ja he nɛ. 5Haa le Ijipt harɛ ta la, n baɡɛ heyaa nyoa ŋɔ mɛɛ ja he nɛɛ saŋ bɛlbwaa. N ta ja he nɛ, he bɛ ɔmɛ.”
6Koranar Bwa Kooro bol Haɡae be ŋɔ, “A ka tamaa ken mɛɛ yiiɡi nyundua ne harɛɛ dɛ mpo.#Hib 12:26-27 7Mɛɛ chɔɡ nɛŋhɔɔhra baa wola Korowii tomɛ kpeɡri bwaa, ásɛ ba kpɔ kwaa a yoɡ aa kpeɡa kohona ba o bini, ásɛ n ɡel kondɔɔh ba su n Dea la bwa. Men Koranar Bwa Kooroo bola. 8Harɛ nɔ suuɡapoŋa ne suuɡaswɛm bwa ɛ n kwa. 9Jirima taraken n Dea nɔ aa dɛ ba dɔe la, ɛɛ ɡwaa wubwa kon laanee. Ásɛ dɛ tɛ n nɛra deŋnesɔɔhna bela. Men Koranar Bwa Kooroo bola.”
Andɛɛɡa soŋa dɛ́ tɛ nɛra baa kah doŋa
10Koojen Dareɔs aa di kora bennɛɛte ta korobie anuanaarɛ, o tɔpera fifraanɛ dɛ anaarɛ taa Korowii Waa Ɛ Koranar Bwa Kooro bol waa keame Haɡae be ja ŋɔ, 11“Bɔɔ sɔfore la ɡɛ Mmara la aa dɛ baɡle waa maa dɛ ba he bɔɔra nɔ. 12Dɛ nomɛl kpoŋe ol baa kpɔa ɛ saraha tɛ men Korowii, o do wer ne dii do o batakaare bini, asɛ dɛ kpɔ batakaare la ka leɡe paanoo, ne kondikwaa baa daala kɛɛ sen, kɛɛ no, kɛɛ kondikwaa bɛlbwa naa, a ɡelɔ a ɡɛ kondikwaa la ɛɛ do ɡoroŋ aa?”
Asɛ sɔfore la ŋɔ, “Akai.”
13Anee Haɡae ŋɔ, “Dɛ nomɛl lawɛ lale dɛ kah doŋa, dɛ ka leɡe ɡɛ kwaa la bɛlbwa naa, dɛ doŋa la ba a ta naa?”
Sɔfore la ŋɔ, “Ɔɔh, dɛ doŋa lɔ a ta.”#Kur 19:11-12
14Ate, Haɡae berɛ ŋɔ, “Korowii ŋɔ, ɡɛ tentenee nɛra baa lɔ ɡɛ harɛ nɔ ta ne wobɛlbwa baa dɛ ɛ bwa do, waa an lɛ. Komɛlbwa baa kpɔa dɛɛ ba kon baa dɛ ɛ saraha o ta la kah doŋa.”
15Korowii ŋɔ, “He ta waa aa pu heyaa nɔ nae yaa? Mɔɔ he pa mun dɛ́ do n Dea la, 16nomɛl kpɔ kon dɛɛ la ka maɡɛ mea kuruwa dela fifraanɛ bela aa wara chɔ aa, kuruwa dela fii wɛɛ dɔ. Nomɛl la bela baa dɛ harame ɡrepo, dɛ ŋɔ o dɛ la ka ɛ sen vii dela fifraanue naa, vii dela fifraanɛɛ wɛɛ dɔ. 17N ɡelɔ peuwɔb ne dombwea ba chɔɡ he kwaa haa dua bwa, kɛ he ta he liire charɛ dɛ ba n be. Men Korowiirii bola. 18Hé nyiŋi le fini dɛɛ kaa, korobinuanaarɛ nɔ tɔpera fifraanɛ dɛ anaarɛ nɔ haa pa Korowii Dea nɔ mun nɔ, dɛ́ na waa aa dɛ ba bala. 19Mea tonɔ, asɛ ɡrepo ne fiɡ daa, ne pɔmeɡranet dɛ ɔleve daa ta nɔnɛ mɔɔ, kɛ le fini dɛɛ la mɛɛ swee andɛɛɡaa tɛ heya.”
Korowii nyoa waa baɡɛ Sɛrobabɛl
20Korowii berɔ bol waa o keame Haɡae be korobie la tɔpera fifraanɛ dɛ anaarɛ ta nɛɛtena ja dɛ ŋɔ, 21“Ŋɔ Juda harɛ ta nomoa Sɛrobabɛl be ŋɔ, ‘Mɛɛ yiiɡi nyundua ne harɛɛ. 22Mɛɛ lɛ koranar kpeɡri ba bee, dɛ́ ɡel harɛre kora kpeɡri ba a jaɡa. Dɛ beɡre torɔɡore baa vɔwa dɛɛ pɛl jaɡre piiɡi. Jaɡre ɛɛ choɡluu, ásɛ nɛra baa dɛ so a ta kpoo dɔŋa keri ne.
23Awola tɔpere la, mɛɛ le hen Sɛrobabɛl haa ɛ n bonɔɔnee, ásɛ hɛɛ nyiŋi harɛ la ta n sɔn ta, henee ń le. Men Koranar Bwa Kooroo bola.’ ”
Trenutno izabrano:
Haɡae 2: mzw
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.