Popularni biblijski stihovi iz Röm 12

Podeli

Wu ko bëëd ki bëën-ɑ beed kì kömi piny men, de wilu bëëdi wun kɑ rummi wun wil wun. Codhe, o gïn-ɑ dwɑddi yi Jwøk yod yi wun; eni gïn-ɑ døj, ɑ bɑ ɑyïëy yi Jwøk, o bong gïn gwɑ̈ɑ̈d kì ree.

Yɑ kwɑjj-ɑ wun, wun ɑ nyiimïɑ kinni, mɑ́ Jwøk bɑ ngɑn pyëwe nyi lɑ̈ɑ̈m; mëggu ri wun Jwøk, wun ɑ́ gëëdhi me nëënø, wu bɑ ɑthyey kipe göggii, o pyëwe mede ki wun. Menɑni bene mɑll-ɑ mɑllu en.

Kɑ wu nyi bëëd wun pëthi wun med ki ngɑ̈dhi gïgdøj møg-ɑ óbï. Nyi ngïïn wun kì yij orɑng. Kɑ Jwøk nyi kwɑjji wun kì yethi cyɑ̈ng bënn.

Ri wun ko wëggu tyɑmø yi rɑj, de tyɑm wun rɑj ki gwøngdøj.

Mɑɑru ri wun, kɑ wu bëëd wun wu nɑ nyiimëëg, jii Mesiy. Nyi wøru ri wun ki mendwøng.

Bëëd mɑ̈ɑ̈dø e kɑ̈ɑ̈l-ɑ pyëw. Mɑɑnu rɑj, kɑ wu mɑ̈gi wun kì ri gïndøj.

Wu ko nyi kɑ̈ni ki göj. De nyi bëëd wun wu mër ki ji bënn, keløg e ócuggø.

Gøøli wun ko nyi col wun; de nyi wïyu møgɑni liny Jwøk. Mɑ́ wɑ̈nyi kwërø okööbø kinni, “Coli gøølø bɑ cwɑggɑ, bɑ yɑn ɑ ócol kɑ̈jji gen.”

Kɑ wu nyi dyëëj wun ki gwøg kipe Wë, e pëthi wun pɑ̈ng yi Wëykwërø.

Anɑn, kɑ̀ bëëd yïɑ dɑ tegø men-ɑ ɑ́mëggi yɑn yi Jwøk kì bɑng medi pyëwe, wu ócuggø cegø yi yɑn kinni, ko di dhɑnhø ɑ́kyel me kööbø kinni pere teg. Mɑ́ menɑni bɑ ngedhi rɑw kete. De rum dhɑnhø ki rumm-ɑ dyër kipe gwøng-ɑ gwøg yi en ki tegø men-ɑ ɑ́mëggii yi Jwøk.

Ngɑn göggi yïn ki gïnrɑj, ko nyi loony ki göggø ki gïnrɑj thyew. De nyi yɑbu gwøng-ɑ myëër kì bøli ji bënn.

Kɑ wun ki ri wun, bëëd wun, rummi wun bɑ ɑ́kyel. Kɑ ko di dhɑnhø me nyi rumø ki rummi dhɑ̈w. Kɑ wu ko nyi yɑb cyɑ̈dhø ki tyëng-ɑ per gen teg keti gen. Kɑ ko di dhɑnhø me nyi rumø kinni, ce rumme gïïr.

De keløg ngɑn-ɑ ɑ́mɑ̈ni ki yïn obëënø e torø yi kɑ̈j, thödhí ki gïncɑm. Wɑlɑ̀ keløg ree dɑ röödhø, thödhí ki pï. Mɑ́ kɑ̀ göög kinøw, ngɑnɑni wïje ceg-ɑ lɑ̈ɑ̈yø ki gïn-ɑ ɑ́gwøg yi en.

Kɑ Jwøk nyi kwɑjji wun kiper tyëng-ɑ nyi guud nyingi wun; ɑwøø, nyi lɑ̈mmu gen gyëdh, kɑ ge ko nyi lɑ̈mmu cyën. Nyi mïni pëthi wun kyeel ki tyëng-ɑ pëthi gen med. Nyi ywöngi wun kyeel ki tyëng-ɑ ywöngi.

Kɑ̀ jɑd jii Mesiy, nyi thödhu gen ki jɑmmì; nyi theg wun wëll.

Yïee dɑ gïg mø bëëdi gen bɑ̈nni kì ri dël ɑ́kyel, o gïgɑni nyi gwøg-ɑ jɑmmi mø bɑ̈nni. Nɑ menɑni ceth; cɑgg ɑ́ kɑ̀ bëëd wɑ gïïr, wɑ bɑ ɑ́kyel kɑ̀ rëbi wɑ kì ri Mesiy; wɑ ying-ɑ ri dël ɑ́kyel.