Joel 3
3
BURÂ HI MA DIDININA
(3.1-21)
Sariya d’a Alona mi kat yam andjaf suma dingîd’a
1Ma didina mi dala: Gola! Kur bur máma
an mba ni hulong suma Juda-na
ki suma avo Jerusalem-ma
ata blangâzi ma adjeuna.
2An mba ni tok andjaf suma dingâ pet,
an mba ni izi kur hor ra Josafat-ta.
Ata yi máma an mba ni kazi sariyad’a kazi
yam ahle suma azi lazi mi man suma Israel suma an tazi djonina,
yam ndjoîd’a a ndjoyôzi woi aduk andjaf sumid’a,
yam ambas man nda azi b’rawat teid’a mi.
3Azi le togina yam sum mana,
azi he gor mandjufâ yam gaulangâ,
azi gus gor weid’a süm guguzlud’a á tched’a.
4Agi suma Tir-râ ki suma Sidon-na pet,
agi suma nga yam andaga d’a Filistê-d’ina,
vama ndologi ki an ni me ge?
Agi hal á hlagi atchugulugi ki sed’en ndju?
Le agi hal á hlagi atchugulugi ki sed’enu ni,
an mba ni hulong hlatchugul ndata ki sed’egi atogo zak!
5Agi yogi kawei man ma hapma ki lor manda
kahle man suma djivi suma guzuzi kal teglesâ,
agi igi ki sed’ezi kur gongîyo magi suma tuwal fileina mi.
6Agi guzugi gro suma Juda-na
ki gro suma avo Jerusalem-ma woi
abo suma Gre’â á walazi woi dei kambas mazid’a.
7An nga ni hulongôzï yod’a
ata yima agi guzuzi woi kuana,
an mba ni hlazi atchuguluzi
balum tcho d’a agi lazizid’a.
8An mba ni guzugi grogi suma andjofâ
ki grogi suma aropma woi abo suma Juda-na.
Azi mba hulong guzuzi woi
abo suma Sabe suma sä deina mi.
Wana ni zla d’a Ma didina mi data.
Ayî ma dabid’a ki sariya d’a kad’a
9Ar agi tchagi wala akulo mandjaf suma dingâ ala:
Agi minigi tagi á dur ayîna,
agi zlid’igi grang suma durâ akulo,
ar azigar suma durâ pet a hud’ïya,
a i dur ayîna.
10Agi yogi ad’u kowuyo magina,
agi zlagizi mbuguyo suma fuyogeina,
agi yogi mbaragum magid’a,
agi zlagizi asubiyona.
Ar ma amangeîna pî mi dala:
An ni ma ad’engâ!
11Agi andjaf suma pet, agi b’ad’agi tagiya,
agi mbeyegïya, agi togogi tagiya.
Ma didina, ang sunï grang mang suma durâ ataziya.
12Ar andjaf suma a tchol akulo,
a i kur hor ra Josafat-ta.
Ata yi máma an mba ni kak kua
á ka sariyad’a yam andjaf suma pet
suma a nga nguid’a ata yi mámina.
13Agi yogi mbaragum magid’a,
agi zazi d’igi awu ma mi ne dana na.
Agi mbeyegï mired’eziya,
kayam yima miret guguzlud’a mi oî wa,
zula nga d’i sulul kä woi mi.
kayam asa’at mazid’a ti kal ngola heî.
14Gola! Suma ablaud’a ablaud’a mimiyâk
a nga kur hora á ka sariyad’a,
kayam burâ hi Ma didinina mi ar wa go
á ka sariyad’a kur hor ndata.
15Afata ki tilâ a mbut nduvunda,
tchitchiud’a nga d’i wile d’uo mi.
16Ma didina nga mi oî kur Siyon,
nga mi breî ki delem akulo kur Jerusalem.
Akulod’a kandagad’a a nga zlaga.
Wani Ma didina nga mi ngom sum máma,
mam mi yima ngeid’a hi Israel-lîna.
17Hina wani, agi mba wagi ala
an ni Ma didina Alo magi ma nga kaka
yam ahina man nda Siyon nda a tinit irat vatina.
Jerusalem a mba tinit irat vad’u,
andjaf ma ding mba mi kal kua d’uo d’a.
Suma hAlonina a mba hulong i avogovogo
18Kur bur máma süm guguzlud’a
mba mi djangî kä yam ahuniyôna,
ambira mba d’i djangî kä
akulo yam yima ndingâ,
toliyon nda Juda-d’a pet mba d’i lau mbina,
mbina mba mi lawï
kur gong nga kud’ora hi Ma didinid’a,
mba mi rap yam hor ra Sitim-mba.
19Ezipte mba d’i mbut djona,
Edom mba d’i mbut ni hur fulâ,
kayam murud’um mba azi lat mi suma Juda-na
á tchi suma bei zlad’a kazina
yam andaga mazid’a adjeud’a.
20Wani suma a mba kak kur ambas sa Juda-d’a gak didin,
a mba kak kur Jerusalem atchogoid’a katchogoid’a mi.
21An mba ni hlatchugula buzuwazi
ma an hlum nga atchugulum mbuo tua na.
An Ma didina mba ni kak kur Siyon.
Zvasarudzwa nguva ino
Joel 3: BA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Azumeina Bible © Alliance Biblique du Tchad, 1999.