Santyaw 1
1
Jun qꞌolbꞌil
1Ayiꞌn Santyaw,#Mt. 13:55; Mr. 6:3; Kybꞌi. 15:13; Gal. 1:19. jun taqꞌnil qMan Dios ex ikyx te Jesucrist, a tAjaw Tkyaqil; jun qꞌolbꞌil kyeꞌy, ayiꞌy kabꞌlajaj chꞌuq xjal tzajnin te Israel, a ojtxe qxeꞌchil, ex jaꞌlin kysipin kyibꞌa toj tkyaqil twutz txꞌotxꞌ.#1Pe. 1:1.
Qqanix qnabꞌl te Dios, nya nkaꞌmin qkꞌuꞌj
2Ayiꞌy werman, qa ma tzaj nya bꞌaꞌn kyiꞌja, chi tzalajxa tuꞌn kkyꞌelix kyiꞌja, 3quꞌn tuꞌn bꞌiꞌn kyuꞌn, qa ma nikyꞌbꞌajtz kynimbꞌila tuꞌn Dios. Ikytzin kchi bꞌantilejiꞌy tuꞌn tten nim kykꞌuꞌja tuꞌn kyayoꞌn tiꞌj tkyaqil tajbꞌil qMan. 4Me ikytziꞌn, ilx tiꞌj tuꞌn ttenxix kykꞌuꞌja tuꞌn kyayoꞌn, tuꞌntzin kytijiꞌn ex tzꞌaqle toj kynabꞌla, tuꞌntzin ntiꞌx juntl atx taj toj kynimbꞌila.
5Qa at jun kyxola atx taj tuꞌn tel tnikyꞌ tuꞌn tbꞌet toj tumil, bꞌaꞌn txi tqanin te qMan Dios,#1Re. 3:5-12. ex ok ktzajil tqꞌoꞌn, quꞌn ntzaj tqꞌoꞌn te Dios te qkyaqilx a at tajbꞌin qe, ex mina nqo ok iꞌlin tuꞌn. 6Me atziꞌn, kxel tqanin tukꞌa tnimbꞌil,#Mt. 7:7-11; 21:21-22; Jn. 16:23-24. ex nya nkaꞌmin tkꞌuꞌj tzeꞌnku aꞌ te ttxuyil aꞌ, n-ul piqꞌj ex n-ajl tiꞌj tuꞌn kyqꞌiqꞌ. 7Qa at jun xjal iky t-ximjo, qa nlay tzaj qꞌoꞌn te tuꞌn qAjaw, 8quꞌn jaꞌlin ntbꞌisin jun tiꞌ, ex mikyxiljo nchiꞌj. Nya junxchꞌin tumil nxi tiꞌn.
Jun qꞌinin ex jun yaj kchi kletil, qa ma chi nimin tiꞌj Klolqe Jesús
9Aye yaj nimilqe tzaluꞌn twutz txꞌotxꞌ, bꞌaꞌn tuꞌn kytzalaj, quꞌn japin nim kyoklin tuꞌn qMan Dios. 10Ex ikyx te qꞌinin twutz txꞌotxꞌ tzaluꞌn, bꞌaꞌn tuꞌn ttzalaj, tuꞌn ma kubꞌ tmutxsin tibꞌ twutz Dios; quꞌn ikytzin te qꞌinin ok bꞌajil tzeꞌnku jun t-xmakil kꞌul, ex nlay kubꞌ ten te jun majx. 11Ajtzin tjawil qꞌij, kꞌwel tzqij tqan, ex k-elil tzꞌaq t-xmakil, ex bꞌeꞌx knajiljo tkaꞌybꞌil tbꞌanilxtaq. Ikytziꞌn, atzin qꞌinin at nim tqꞌinimil; me ilxix tiꞌj kyjel, aj tkyim, ikyxjo tzeꞌnku tal t-xmakil kꞌul.#Is. 40:6-7.
Qo weꞌxix twutz jun nya wen, qa ma tzul kanin qiꞌj
12At tkyꞌiwbꞌil qMan tibꞌaj jun nimil qa ma weꞌxix wen, aj tul kanin nya bꞌaꞌn tiꞌj. Ajtzin tikyꞌxtz tuꞌn, ok ktzajil qꞌoꞌn jun oyaj te tbꞌanilx, a chwinqil te jun majx, a o tzaj ttziyin qMan Dios kyeꞌ, a ok kchi okil kꞌuꞌjlinte.
13Qa at jun nnaꞌnte qa n-ok yekin tuꞌn tkubꞌ tbꞌinchiꞌn nya bꞌaꞌn, mi kubꞌ tbꞌisin qa tuꞌn qMan Diosjo luꞌn; quꞌn mina nkubꞌ tbꞌisin te Dios tuꞌn tok tbꞌinchin nya bꞌaꞌn, ex nlay tzꞌok tnikybꞌin te Dios jun aꞌla. 14Qalaꞌ, qa at jun xtnaꞌ jun tbꞌis tuꞌn tkubꞌ tbꞌinchin a nya bꞌaꞌn, ikyxjo tzeꞌnku jun tiꞌ tkuꞌx toj jun tzuybꞌil txuk; ax tbꞌis xkubꞌ sbꞌunte. Ex ikytziꞌn nkubꞌe tzꞌaqe toj il. 15Kyuꞌntziꞌn tbꞌis nya bꞌaꞌn, nkuꞌxa til; ex ajtzin tchꞌiyjo il wen, ikytzin ktzajile kyimiꞌn tiꞌj.
16Werman, nimxix nkꞌuꞌja kyiꞌja, mi txi kyqꞌoꞌn kyibꞌa tuꞌn kykubꞌ sbꞌuꞌn. 17Quꞌn tkyaqil oyaj bꞌaꞌn ex tkyaqiljo tbꞌanilxix, kyja ntzaje teꞌ toj kyaꞌj, a ntzaj tqꞌoꞌn qMan Dios, ajo Bꞌinchil teꞌ twutz kyaꞌj jniꞌjo nbꞌaj qoptzꞌaje. A Dios ntiꞌ jun tiꞌ nkubꞌ ttxꞌixpintl; nya ikyjo tzeꞌnku jun t-xlekemil tiꞌ, a nxi yekj.#Num. 23:19; Mal. 3:6.
18An Diosjo, tuꞌn tajbꞌil, ma tzaj tqꞌoꞌnjo saq chwinqil tuꞌnjo Tbꞌanil Tqanil, a Tyol twutzxix.#1Pe. 1:23. Tuꞌntziꞌn, qokin awo tnejil nimil, jun tnejil oyaj te saq tchꞌiysbꞌin qMan Dios, tzeꞌnku jun oyaj tiꞌj tnejil twutz awal.
Qajsintz tiꞌj tyabꞌ qwiꞌ
19Werman, nimxix nkꞌuꞌja kyiꞌja, kynaꞌntzinjiꞌy luꞌn: Kykyaqilxa nya nej kchi jawil yolbꞌiꞌn tukꞌa tyabꞌ kywiꞌy; qalaꞌ nej k-okil kybꞌiꞌn, 20quꞌn tuꞌn tyabꞌ twiꞌxjal nlay bꞌantjo bꞌaꞌn twutz qMan Dios. 21Tuꞌnpetziꞌn, kytzaqpinkjiꞌy tkyaqiljo il exsin jniꞌ nya bꞌaꞌn, quꞌn oꞌkx te ma chꞌiyxjo kyojjo qꞌij luꞌn, exsin kyniminkujiꞌy Tbꞌanil Tqanil, a o kyij awaꞌn toj kyanmiꞌn; me kyniminkuy tukꞌa kymutxbꞌil kyibꞌa. Atzin Tqaniljo lo at tipin tuꞌn kykleta tuꞌn.
Il tiꞌj tuꞌn tkubꞌ qbꞌinchin a ntqꞌmaꞌn Tyol Dios, ex nya noq tuꞌn tok qbꞌiꞌn
22Ex nya noq oꞌkx tuꞌn tok kybꞌiꞌnjiꞌy Tyol Dios; qalaꞌ il tiꞌj tuꞌn tkubꞌ kybꞌinchinjiꞌy a ntzaj tqꞌmaꞌn. Qatzin qa mikyxi s-oke kyuꞌn, nkubꞌ kysbꞌuꞌn kyibꞌa kyil kyibꞌxa. 23Ankye teꞌ noq oꞌkx nkyjaꞌye tuꞌn ma tzꞌok tbꞌiꞌn, ex mina nkubꞌ tbꞌinchin, ikytzin k-elileꞌ tzeꞌnku jun xjal nkux tkaꞌyin twutz toj jun kaꞌybꞌil wutzbꞌaj. 24Ma ntlon tetz tzeꞌn iky twutz, me ajtzin tel bꞌet, ma tzꞌel naj kaꞌyin twutz toj tkꞌuꞌj. Ikytzin Tyol Diosjo tzeꞌnku kaꞌybꞌil wutzbꞌaj. 25An teꞌ mina n-el naj toj tkꞌuꞌj, qalaꞌ kyja n-oke tnabꞌl wen tiꞌj Tyol Dios, ex tuꞌn tten jikyin toj tchwinqil, ex tuꞌn tbꞌantjo a ntqꞌmaꞌn Tyol Dios, oktzin ktzalajil tojjo tbꞌinchbꞌin. Atzin Tyol Diosjo tzꞌaqlexix wen, a xqo tzaqpet tuꞌn toj qil.
26Qa at jun xjal nkubꞌ tbꞌisin qa nimil, exsin qa nya jkꞌuꞌn ttzi, ax nkubꞌ sbꞌunte tibꞌ tuꞌnjo tbꞌis, ex atzin tnimbꞌil ntiꞌ tajbꞌin. 27Qalatzin teꞌ nimbꞌiltz tbꞌanilx, ex ntiꞌ tkyꞌi twutz qMan Dios, a nmojin kyiꞌj mebꞌe, exqetziꞌn qya, a o chi kyim kychmil, ex aye toj jun kyixkꞌoj iteꞌke; ex mi nxiꞌ yajil tibꞌ toj il tzaluꞌn twutz txꞌotxꞌ.
Zvasarudzwa nguva ino
Santyaw 1: mamC
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2003, Wycliffe Bible Translators, Inc. All rights reserved.