1 Juan 4
4
Kabꞌe wiq Xewbꞌaj: Te qMan Dios ex te tajaw il
1Ayiꞌy werman, nimxix nkꞌuꞌja kyiꞌja. Mi chex kyniminjiꞌy xjal qa: Nchin bꞌeta yolil Tyol Dios, qa chiꞌ. Qalaꞌ nejxix, k-okil kybꞌiꞌn qa toj tumil nyoline, ex qa tukꞌa Xewbꞌaj Xjan nxnaqꞌtzine, mo qa t-xnaqꞌtzbꞌil tajaw il qꞌiꞌn tuꞌn. Nxi nqꞌmanjiꞌy ikyjo, quꞌn nimx te xjal sbꞌul nbꞌeteje yolil tiꞌj qMan Dios, a nya tukꞌa Xewbꞌaj Xjan. 2Nya tzeꞌn k-elile kynikyꞌa te, jun xjal qa at Xewbꞌaj Xjan tukꞌa, mo qa minaj: Qa ma tkujsin qa a Jesucrist ul tzaluꞌn twutz txꞌotxꞌ tzeꞌnku ichin; atzin xjaljo at Xewbꞌaj Xjan tukꞌa. 3Me tkyaqil xjal, a mi nxi tnimin ikyjo, ntiꞌ Xewbꞌaj Xjan tukꞌa, qalaꞌ a xewbꞌaj tzajnin te tajaw il, a ajqꞌoj tiꞌj Klolqe Jesús. Me bꞌiꞌn kyuꞌn qa a xewbꞌaj anetziꞌn, tuꞌn tul kaninxtaq. Ex lu at jaꞌlin twutz txꞌotxꞌ.#Mt. 7:15; 2Jn. 7.
4Ayiꞌy werman, te qMan Diosqiꞌy. Tuꞌn kynimbꞌila, xkubꞌe kyiꞌjjo sbꞌul xjal kyuꞌn, quꞌn nimxixtl tokliꞌn a at kyukꞌiy, a tzeꞌnku toklin tajaw il, a at kyukꞌa sbꞌul xjal twutz txꞌotxꞌ. 5Ayetzin xjal, ayeꞌ nya nimin Dios kyuꞌn, oꞌkxtza nchi yoline tiꞌjjo te twutz txꞌotxꞌ, ikyxjo tzeꞌnku te tajaw il. Ex jniꞌqe xjal nya nimilqe nbꞌaj xi kynimiꞌn jniꞌ nkyqꞌmaꞌn.#Jn. 15:19. 6Me metzin qe te qMan Dios qoqe, ex ayetziꞌn a o tzꞌel kynikyꞌ te Dios nqo kubꞌ kybꞌin. Me ayetzin kye nya te Diosqe, mi nqo kubꞌ kybꞌin kyeꞌ.#Jn. 8:47. Tuꞌntzin ikyjo, k-elile qnikyꞌ te ankyeꞌ a at Xewbꞌaj Xjan tukꞌa, ex ankyeꞌ a at xewbꞌaj te tajaw il tukꞌa.
Oꞌkx te Dios nimxix tqꞌaqꞌbꞌil tkꞌuꞌj
7Werman, nimxix nkꞌuꞌja kyiꞌja. Ex il tiꞌj tuꞌn qkꞌuꞌjlinte qibꞌ qxolile, tzeꞌnku te Dios, nim tqꞌaqꞌbꞌil tkꞌuꞌj qiꞌj. Tkyaqil teꞌ a ntzaj qꞌaqꞌin tkꞌuꞌj tiꞌj juntl, atzin te o tzꞌokjo te tkꞌwal Dios, ex ma tzꞌel tnikyꞌ te Dios. 8Me ankyeꞌ teꞌ ntiꞌ tkꞌuꞌj tiꞌj juntl, naꞌm tel te tnikyꞌ te Dios, quꞌn te Dios nimxix teꞌ tqꞌaqꞌbꞌil tkꞌuꞌj. 9Ex atzin te Dios tqꞌaqꞌbꞌil tkꞌuꞌj ma tzaj tyekꞌin qe, noq tuꞌn Tkꞌwal, a junchꞌin, exsin tzaj tchqꞌoꞌn twutz txꞌotxꞌ. Ex noq tuꞌn, at qchwinqil te jun majx.#Jn. 3:16. 10Ikytziꞌn tqꞌaqꞌbꞌil tkꞌuꞌj Dios qiꞌj: Quꞌn nyaqo xqo ok kꞌuꞌjlinte nej, qalaꞌ ikytzin a saj qꞌaqꞌin tkꞌuꞌj qiꞌj te tnejil, ex saj tchqꞌoꞌn Tkꞌwal tuꞌn tkyim te chojbꞌil teꞌ jniꞌ qil.
11Ayiꞌy werman, nimxix nkꞌuꞌja kyiꞌja. Noq tuꞌn ma tzaj tyekꞌin Dios tqꞌaqꞌbꞌil tkꞌuꞌj qukꞌa, ikyxsin qetz, ex il tiꞌj tuꞌn tten tkꞌuꞌjbꞌil qkꞌuꞌj qxolile. 12Quꞌn mix aꞌl junte ma lonte qMan Dios kyukꞌaxix twutz.#Jn. 1:18. Me qa at qkꞌuꞌjbꞌil qibꞌ qxolile, antza qꞌanchaꞌle qa najle Dios qukꞌa, ex qa a tqꞌaqꞌbꞌil tkꞌuꞌj tzꞌaqleqoxix tuꞌn toj qanmin. 13Ex ikytziꞌn, k-elile qnikyꞌjo te qa najleqo tukꞌa qMan Dios, ex qa najle qMan Dios qukꞌa, noq tuꞌn Xewbꞌaj Xjan, a o tzaj tqꞌoꞌn toj qanmin.#Ro. 8:9; 1Jn. 3:24. 14Me awoqoxixa o lonte, ex nxi qkujsiꞌn qa aku qMan Dios saj chqꞌon teꞌ Tkꞌwal te Kolil kyiꞌj tkyaqil xjal, a kchi xel niminte,#Jn. 3:17. 15ex ankye te kxel niminte qa a Jesúsjo, a Tkꞌwal Dios, ex nbꞌet tzeꞌnku taj Dios, ex najle Dios tukꞌa.
16Ikytziꞌn, ma tzꞌele qnikyꞌjo te, ex ma txi qnimin, qa nimxix tqꞌaqꞌbꞌil tkꞌuꞌj Dios qukꞌa, quꞌn ate Dios nimxix tqꞌaqꞌbꞌil tkꞌuꞌj. Ex ankye qe nchi bꞌet toj tqꞌaqꞌbꞌil tkꞌuꞌj Dios, ex nchi bꞌet tzeꞌnku taj Dios; ayepenkye at Diosjo kyukꞌa. 17Tuꞌn ikyjo, tzꞌaqleqoxix tuꞌn tqꞌaqꞌbꞌil qkꞌuꞌj qxolile, tuꞌntzintla, aj tpon kanin qꞌij tuꞌn qok toj paꞌbꞌin twutz Dios, atitla jun qꞌuqbꞌil qkꞌuꞌj tiꞌj, ex nya tuꞌn qja xobꞌ. 18Qa nqo kꞌuꞌjlin kyiꞌj txqantl, ntiꞌ xobꞌajil, tuꞌn qok twutz qMan toj paꞌbꞌin, quꞌn qa ma tzqetjo qkꞌuꞌjbꞌil qibꞌ, ntiꞌpen te xobꞌajiltz. Quꞌn atzin xobꞌajil ntqꞌmaꞌn qa nya wen qo elile toj paꞌbꞌin. Tuꞌnpetziꞌn, qa at jun a tzunx nxobꞌ, apente naꞌm ttzqet tkꞌuꞌjbꞌiljo. 19Tzeꞌnku qe atqe tkꞌuꞌjbꞌil qibꞌ qxolile, quꞌn ate Dios saj qꞌaqꞌin tkꞌuꞌj qiꞌj te tnejil. 20Tuꞌn ikyjo, qa at jun a qꞌmante: Kꞌuꞌjlinxix weꞌ Tata Dios wuꞌn, qa chiꞌ; exsin n-el tikyꞌin txqantl, jun sbꞌul xjal teꞌ. Quꞌn qa mi nyekꞌin tqꞌaqꞌbꞌil tkꞌuꞌj kyiꞌj txqantl, ¿Tzeꞌntzin ttentz tuꞌn tok tkꞌuꞌjlin Dios, a nya qꞌanchaꞌl? 21Quꞌn ma kyij tqꞌmaꞌn te Dios kyjaluꞌn: Ankyeꞌ n-ok tkꞌuꞌjlin qMan Dios, ex il tiꞌj tuꞌn kyok tkꞌuꞌjlin txqantl t-xjalil.#Mt. 5:44-45; Mr. 12:29-31.
Zvasarudzwa nguva ino
1 Juan 4: mamC
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2003, Wycliffe Bible Translators, Inc. All rights reserved.