रोमीकु 6
6
पाप लःअय गोएःग उनी बकिर ख्रीस्त रे जिवी:ड
1दो आबु एतान कंहड़ीयाबु? एतान आबु पाप एकायाबु, ची दया बढ़ाव सेन? 2हिरगीस कोवान! नोःआँ एता लकान हुयाव सकाव कोआ ची आबु, पाप रेनअः बारे रे गोएःग चुकाव तनाबु, होना रे एता लकान जिवीःड कोआबु? 3आपे नोःआँ कापे पाड़ीआ ची आबु जे ईसु ख्रीस्त आला बतिस्मा इदी तदाबु, हुनी आला मराईन रेनअः बतिस्मा होः इदी तदाबु एतान? 4#कोलो 2:12हिना लःअय होना मराईन रेनअः बतिस्मा ईदी केते आबु हुनी लो: गाड़ा नेनाबु, जेकर से जे लकान ख्रीस्त आपा आला महिमा रेनअः दोवासते गोएःग उनकु मेसे जिवीःड नेनाय, हिना लकान आबु होः नावाँ जिनगी रे चलाअबु।
5एता लःअय ची जदि आबु हुनी आला मराईन लकान मराईन नाम केते हुनी लो: मियांड नाबु, दो जरूर हुनी आला जिवीःड-बिरिःड रे होः हुनी लकान मियांड कोआबु। 6एता लःअय ची आबु पड़ीआबु, आबु आला मारी चाईल-चाकर ईसु लोः कुरूस रे रकाःब चुकाव ताना, जेकर से पाप रेनअः होड़ो गोएःग जुनोः आउर आबु फिन पाप रेनअः बंधाउवा रे अलबु ताहिन। 7एता लःअय ची जे गोएःग चुकाव नाय, हुनी पाप रेनअः गुलामी तरअः छोड़ाव नाय।
8आबु के बिसवास एदनाआ ची जदि आबु ख्रीस्त लो: साँघे गोएःग तनाबु, दो आबु हुनी लोः जिवीःड कोआबु। 9एता लःअय ची आबु पाड़ी आबु ची ख्रीस्त गोएःग उनकु मेसे जिवी:ड बिरिडोः तयोम फिन दोबारा एरे गोजोआ। नहाअः दो मराईन रेनअः कबजा हुनी रे कनोआँ। 10जब हुनी गोएःग नेनाय दो पाप रेनअः बारे रे मिखेप गोएःग नाय, आउर नहाअः हुनी जिवीडोअ तनाय दो परमेसर लःअय गी जिवीडोआय। 11आपे होः अपन के निआँ लकान गी समझअपे पाप लःअय गोएःग उनी आउर ईसु ख्रीस्त रे परमेसर लःअय जिवीःड।
12हिना लःअय आपे होड़ो रेनअः मरजी रेनअः कबजा रे आलपे ताहिन, जेकर से पाप, आपे आला गोजोअः वाला होड़ो रे आलुय राईज के। 13आउर ना अपन अंग के पाप लःअय अधरम रेनअः हांथेयार हुयाअः लःअय आलपे जिमाके, बकिर अपन के गोएःग उनकु मेसे जिवीःड उनकु पाड़ी केते परमेसर के जिमाइपे, आउर अपन अंग के धरम रेनअः हंथयार हुयाअः लःअय परमेसर के जिमाई पे। 14आपे रे पाप रअः एतान हक होः एरे ताहिनोआ। एता लःअय ची आपे कनहुन आला कोवान बकिर दया रेनअः कबजा रेपेआ।
धरमिकता रिनी धाँगड़
15दो एतानेआबु? आबु पाप एकायाबु एतान? एता लःअय ची आबु कनहुन रेनअः कबजा रे कनिबुआ, बकिर परमेसर आला दया रेनअः कबजा रे जिवीडोआबु। हिरगीस कोवान! 16एतान आपे कापे पाड़ीआ ची जब आपे जाहें आला हुकूम मनाअ लःअय अपन के बंधाउवा रेनअः भेस रे हुनी के जिमा उइयापे दो आपे बंधाउवा हेके। फिन चाहे आपे पाप रेनअः बंधाउवा बनाअः पे, जे आपे के गोएःग केपेआय, आउर चाहे हुकूम मनाअ रेनअः, जे आपे के धरमिकता पखी इदी केपेआय। 17परमेसर के धन्यवाद हुयाअः ची आपे, जे पहिल पाप रेनअः बंधाउवा थिनापे, नहाअः गोटा मन तरअः होना सिकछा रेनअः नमुना रे चलाव एहेःब नापे, जे आपे के एम लअः एदनाआ। 18आपे के पाप तरअः छुटकानी भेटाव ना आउर धरमिकता रेनपे बंधाउवा पाड़ीअ नापे। 19ईङ आम आला होड़ो रेनअः अबड़ रअः चलते मनवाकु आला कनहुन तरअः बात कंहड़ीईङ, आपे जे लकान पहिल रे अपन होड़ो के अधरम हुयाअः लःअय असुधता आउर गुनाह रअः कबजा रे ताहिलाअपे, हिना लकान नहाअः अपन होड़ो के धरमिकता रअः बंधाउवा केते सोंपाव गोअ तापे, जेकर से पबितर जुनोः।
20एता लःअय ची आपे जब पाप रेनपे बंधाउवा ताहिनापे, दो धरम पखी तरअः निछुंद ताहिनापे। 21होना बेरा आपे के होना काम तरअः एतान फयदा भेटाव नेना? नहाअः होना चलते आपे के लाजोअ हुयाआ, एता लःअय ची होना रेनअः अंत दो मराईन हेके। 22बकिर नहाअः आपे के पाप तरअः छुटकानी भेटाव चुकाव ताना, आउर परमेसर आलकु बंधाउवा बनाव लेनपे हेके, आउर पबितरता रेनअः जोअ सिरजाव दापे जेकर अंत का-अन्तोः जिनगी हेके। 23एता लःअय ची पाप रेनअः बनहिंयारी मराईन हेके, बकिर परमेसर आला बरदान आबु आली परभु ख्रीस्त ईसु रे का-अन्तोः जिनगी हेके।
Zvasarudzwa nguva ino
रोमीकु 6: ASR
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023 NLCI CC BY-NC-ND 4.0