TƏ́DA 5
5
Tə̄ɓān̄ de kə́ majaĺ tákə̄də́ gə̄ kɔ̄ɔ́ kem ɓēé
1Kɔ́ɔ̄ɓē əda Moijə na:
2Ə́dá ngán Israel gə̄ ādə̄ tə̄ɓān̄ de kə́ majaĺ tákə̄də́ gə̄ kɔ̄ɔ́ kem ɓēé, de kə́ ngé bānjə̄ gə̄ ō, ngé bájal gə̄ ō, de gə̄ ń ɔdən̄ nīń ní ō. 3De kə́ beé gə̄ ní ká i dəngam aké i dəyá̰ gē anī, ā ī-tə̄ɓāīdə́ kem ɓēé kɔ̄ɔ́, na sōgə́ majaĺ tákə̄ ɓē yā ngán Israel gə̄ ń m̄-ndi dɔ dáńdə́ tə́ ní. 4Ngán Israel gə̄ rāān̄ yá̰á̰ ń Kɔ́ɔ̄ɓē əda Moijə ní. Nin̄ tə̄ɓān̄ de kə́ majaĺ tákə̄də́ gə̄ malang kem ɓēé kɔ̄ɔ́.
Nge rāā yá̰á̰ kə́ gōtə́ aĺ a əgā kə̄rān
5-6Kɔ́ɔ̄ɓē mēr̄ Moijə kəda ngán Israel gə̄ najə̄ ń toō: Ré de kə́ dəngam aláa de kə́ dəyá̰ rāā yá̰á̰ kə́ gōtə́ aĺ kə madə̄neé anī ni-rāā i kə Kɔ́ɔ̄ɓēé, adə̄ najə̄ i dɔn tə́. 7A ɔr̄ gíŕ yá̰á̰ ń rāā ní ō, a tél kə yá̰á̰ ń ni-ənge kə ta róbə́ kə́ gōtə́ aĺ ní yā kadə̄ kɔ́ɔ̄n gogə́ ō, a ənī manə̄n#5.7 Ənī manə̄n: Ré nar gíŕ yá̰á̰ ní i kə́ kēgə̄ naā tə́ gír loo mí anī, kutə nar kə́ gíŕ kógə̄ḿ a asən̄ naā kə kutə nar ń ni a ənī dɔ yá̰á̰ kə́ kənge kə ta róbə́ kə́ gōtə́ aĺ ní yā kadə̄ń kɔ́ɔ̄ gogə́. dɔ tə́ ō. 8Ré kɔ́ɔ̄ yá̰á̰ ní oy kɔ̄ɔ́ ō, ngeen de kə́ ngɔr ngá̰ý kə́ yā taā gotən tə́ gətóo ō anī, i yā téləń kadə̄ Kɔ́ɔ̄ɓē, adə̄ i yā nge tun̄ yá̰a̰. Deē ń najə̄ i dɔn tə́ ní a adə̄ bal batə̄ kadə̄ nge tun̄ yá̰a̰ utə̄ń dɔ majaĺ yān. 9Yá̰a̰ malang ń ngán Israel gə̄ a ndējə̄n̄ Kɔ́ɔ̄ɓē ní i yā nge tun̄ yá̰a̰. 10Yá̰á̰ kə́ kɔr̄ kam̄ tām̄ yā Kɔ́ɔ̄ɓē tə́ ní a adə̄n̄ i nge tun̄ yá̰a̰. Yá̰á̰ ń deē adə̄ nge tun̄ yá̰á̰ ní i tām̄ yān tə́.
Ndū najə̄ kə́ dɔ jang tə́
11-14Kɔ́ɔ̄ɓē mēr̄ Moijə kəda ngán Israel gə̄ najə̄ ń toō, əda na:
Dəyá̰ kə́ rāā háĺ kə́ gōtə́ alé kə ngaaneé, tām̄ ni ɓīī kə dəngam kə́ rangaá loo mundə̄ tə́ əlań rɔ̄sɔl̄ dɔ rɔ̄n nəkɔ́ tə́ kanjə̄ kadə̄ deē a̰a̰də́ ō, kanjə̄ kadə̄ deē əhɔdə́ dɔ naā tə́ ō. Ngaan ger̄ gō alé ba kemən tɔ́sə̄n dɔ tə́. Aláa dəyá̰ ní ɓīī kə dəngam kə́ rang loo mundə̄ tə́ alé, adə̄ əla rɔ̄sɔl̄ dɔ rɔ̄n tə́ alé, ba kem ngaan tɔ́sə̄n dɔn tə́ anī, 15a aw̄ seneé rɔ̄ nge tun̄ yá̰á̰ tə́ ō, a əhɔ ndujə̄ ɔ́rjə#5.15 Ɔ́rjə: I kōō kə́ to tītə̄ gémē. kə́ yā ndə̄jə̄ tām̄ yā jang tə́ kem lāngá mətá jīn tə́ ō. Ni a ur yibə̄ dɔ tə́ aĺ ō, a ɓōkə́ kajaja dɔ tə́ aĺ ō, tɔdɔ̄ i yá̰a̰ ndējə̄ kə́ tām̄ yā kem tɔ́sə̄ tə́, kə́ yā teēń kə gír de kə́ rāā yá̰á̰ kə́ gōtə́ aĺ ndágá. 16Nge tun̄ yá̰a̰ a aw̄ kə dəyá̰ ní ta kum Kɔ́ɔ̄ɓē tə́. 17A ɔdə man̄ kə́ táĺ yā ɓōkə́ kem jóó nánjə́ tə́, ba a ɔy bumbə́ru kem kújə yā Nə́ɓā tə́ yā ɓōkə́ kum tə́. 18A tútə nənga dɔ dəyá̰ ní yā kəya̰ dɔɔ́, ba a ənī yá̰a̰ ndējə̄ kə́ tām̄ yā kem tɔ́sə̄ ní tə́ jī dəyá̰ ní tə́. Nge ń noó i yá̰a̰ kɔr̄ gír deē. Nəkɔ́ a əhɔ man̄ kə́ katə̄ kárárá ń#5.18 Man̄ kə́ katə̄ kárárá: I man̄ ń ɓōkə́ bumbə́ru kum tə́ ní., a reē kə ndɔ̄l dɔ deē tə́ ní jīn tə́. 19Ni a mēr̄ dəyá̰ ní túbə, a ədan na:
Ré dəngam kə́ rang ɓīī seí aĺ ō, ī-sāā dəngam kə́ rang gidə ngaaí tə́ ə́lań rɔ̄sɔl̄ dɔ rɔ̄í tə́ aĺ ō anī, ādə̄ man̄ kə́ katə̄ kárárá ń toō reē kə ndɔ̄ĺ dɔí tə́ alé. 20Ba ré ī-sāā dəngam kə́ rang gidə ngaaí tə́ rɔ̄kum ə́lań rɔ̄sɔl̄ dɔ rɔ̄í tə́, ré dəngam kə́ rang ɓīī seí anī, 21ādə̄ Kɔ́ɔ̄ɓē rāāī yá̰á̰ kə́ tōr̄ tām̄ yā yá̰á̰ kə́ majaĺ kə́ ī-rāā tə́. Ādə̄ Kɔ́ɔ̄ɓē rāā adə̄ ī-tél dəyá̰ kə́ kujə ō, rāā adə̄ kemií tíī ō, yā kadə̄ de gə̄ kə́ kem ɓē yāí tə́ gə̄ a unən̄ i rīí n a túbənə̄ń ní. 22Ādə̄ man̄ kə́ a reē kə ndɔ̄ĺ dɔ deē tə́ ń toō udə kemií tə́ tíī kemií ō, ɔgī kojə ngōn̄ ō. Dəyá̰ ní a ndigə, a əda na:
Rɔ̄kum, ādə̄ i tītə̄ ń noō.
23Nge tun̄ yá̰a̰ a ndang najə̄ gə̄ ń ndɔ̄ləń dəyá̰ ní. Gō tə́ anī a tə́go kum man̄ kə́ katə̄ kárárá ní tə́. 24Kété pá tá kadə̄ nge tun̄ yá̰a̰ adə̄ dəyá̰ ní man̄ kə́ katə̄ kárárá ngeé ń toō kadə̄ aȳ kadə̄ aw̄ kemən tə́ ní, 25ni a taā yá̰a̰ ndējə̄ kə́ tām̄ yā kem tɔ́sə̄ tə́ ń to jī dəyá̰ ní tə́ ní yā ndējə̄ Kɔ́ɔ̄ɓē kə gō looneé pá tá a aw̄ń dɔ loo tun̄ yá̰á̰ tə́ ɓáý. 26Ni a ndégə̄ dɔ ń i yá̰á̰ kə́ ɔjə kadə̄ yá̰a̰ ndējə̄ ní i kə́ kadə̄ kə taá malang ní yā róō horoó dɔ loo tun̄ yá̰á̰ tə́. Gō tə́ anī ni a adə̄ dəyá̰ ní man̄ kə́ katə̄ kárárá ní kadə̄ a̰ȳ. 27Ba yá̰á̰ ń a rāā yá̰á̰ ní n toó: Ré dəyá̰ ní sāā dəngam kə́ rang gidə ngaan tə́ əlań rɔ̄sɔl̄ dɔ rɔ̄n tə́ rɔ̄kum anī, man̄ kə́ katə̄ kárárá ń a reē kə ndɔ̄ĺ dɔ deē tə́ ní a udə kemən tə́ yā tíī kemən ō, yā kɔgə̄n kojə ngōn̄ ō. Loo ń noō tə́ ré de kə́ kem ɓē yān tə́ gə̄ a túbən̄ anī a unən̄ i rīn n a túbənə̄ń. 28Ba ré dəyá̰ ní əla rɔ̄sɔl̄ dɔ rɔ̄n tə́ alé, ré najə̄ gətóo dɔn tə́ anī, ndɔ̄ĺ a reē dɔn tə́ aĺ ō, ni a ojə ngán gə̄ ō.
29 Ndū najə̄ kə́ dɔ jang kə́ rāā dəngam tām̄ yā dəyá̰ kə́ sāā dəngam kə́ rang tə́, 30aláa kə́ dɔ kem dəngam kə́ tɔ́sə̄n tām̄ yā nə̄yá̰n tə́ n noó. Dəngam ń kemən tɔ́sə̄n ní a aw̄ kə nə̄yá̰neé ta kum Kɔ́ɔ̄ɓē tə́ kadə̄ nge tun̄ yá̰a̰ rāā ī bēl̄ loo rāā yá̰a̰ gə̄ malang ń ndū najə̄ yā Nə́ɓā əda ní dɔ dəyá̰ ní tə́. 31Loo ń noō tə́ najə̄ a gətóo dɔ ngaa dəyá̰ ní tə́. Banī dəyá̰ ń najə̄ i dɔn tə́ ní, yá̰á̰ kə́ tōr̄ tām̄ majaĺ yān tə́ a rāān i nəkɔ́.
Zvasarudzwa nguva ino
TƏ́DA 5: SARDC
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bibəl ta Sar̄ © L'Alliance Biblique du Tchad, 2006, 2010.