मुध चेलर 3
3
ओरोत लेंगड़ा आलस कोड़े मन्जका
1ओन्द उल्ला पतरुसस अउर युहन्नस उल्ला ही तिन ख़रख़का गोहरारना ही बेड़ा नू धर्मेस ही मन्दिर नू काला लगियर। 2आ बिरिम आलर जन्वारकातिम लेंगड़ा मन्जका ओरोत आलसिन चेड़'आ की ओन्दर'आ लगियर। धर्मेस ही मन्दिर नू कालू बर'उर गने तेम्बा नेक'आ ब'आ की सगरो उल्ला आर सुन्दर बारना बली गुसन उइया चि'आ लगियर। 3एकाबिरी आस पतरुसस अउर युहन्नसिन धर्मेस ही मन्दिर भितरी कोरनन इरियस ताब आर गुसते तिम्बियस। 4पतरुसस अउर युहन्नस दोनो गोड़ेर आसिन बेस्स कुना इरियर अउर पतरुसस आसिन बाचस, “एम्हय तरा एःरा!” 5इदिन मेन्जस की आस एन्दर'अम ख़क्खना ही असरा ती आर तरा एःरा हेल्लरस। 6लेकिन पतरुसस आसिन बाचस, “सोना अउर चँदी तो एंग्हय गुसन मल्ला लेकिन एंग्हय गुसन एन्दरा र'ई, अदिन निंगा गे चि'अदन। नासरत ता येसू ख्रिस्तस ही नामे नू चो'आ अउर कुद्दा-नुङ्गा।” 7पतरुसस आस ही तिना ख़ेक्खन धरचस की उठाबाचस। आ बिरिम आस ही ख़ेड्ड अउर मुका गुट्ठी नू सवंग बरचा। 8अउर आस सेरेतसिना इज्जस की एका हेल्लरस। इकनुम डेगनुम अउर धर्मेस ही महबा नन्तेम आर गने धर्मेस ही मन्दिर नू कोरचस। 9एन्नेकी भितरी कोर'आ हेल्लरस ख़ने बग्गे आलर आस ही एकनन अउर धर्मेस ही ओहमा नन्नन इरियर। 10ताब अबड़ा आलर आसिन धर्मेस ही मन्दिर ही सुन्दर बारना बली नू ओक्का की तिम्बू आलस इसुम हिकदस बाचर की चिन्हचर। “इस एकसे इकू मन्जस?” ब'आ की आर कोहड़े छक्केम मन्जर।
धर्मेस ही मन्दिर नू पतरुसस ही सिखाब'अना
11आ कोड़े मन्जका लेंगड़ा आलस पतरुसस अउर युहन्नस ही ख़ोख़ा-ख़ोख़ा लक्कन इरियर की होरमा आलर कोहड़े हयकट मन्नुम सोलोमन ब'अना पिन्डा नू बुंगनुम बरचर की आर ही चौगुड़ती ख़ोड़रर। 12पतरुसस इदिन इरियस की आरिन बाचस, “इस्रा'एल ता आलरो, निम इदिही पत्त नू एन्देरगे हयकट मन्दर? एम, एम्हय सवंग या भक्ती तिम इसिन एकना जोगे कमचका लेखा एन्देरगे एम्हय तरा एरदर? 13नम्हय पुरखर अब्राहामस, इसाहकस अउर याकुबस ही धर्मेस तंग्हय सेवा ननू येसुसिन महबा नन्जस। निम आसिन पिलातुसस गे सोपचकर अउर पिलातुसस आसिन अम्बा बिद्दियस ख़ने, निम आसिन मल इन्जरकर।#उरख़ाकाना ३:१५ 14आस तो नेम्हा अउर निर्दोस रहचस लेकिन निम आस ही सटा नू आल पिटुसिन अम्बा चि'आ बाचकर।#मत्तिस २७:१५-२३; मरकुस १५:६-१४; लुकस २३:१३-२३; युहन्नस १९:१२-१५ 15जिन्गी चि'उसिन निम पिटकर। लेकिन धर्मेस आसिन केच्चका ती उज्जताचस। एम इबड़ा कत्था ही गोवाह र'अदम। 16येसुस ही नामे नू पत्ताचका करने निम इरका अउर चिन्हचका ई लेंगड़ा आलस सवंग ख़क्खियस। येसुस ती ख़क्खका पत्त'अना ती ई आलस निम्हय होरमर ही अगू नू कोड़े मन्जका र'अदस।
17“अक्कू अना भ'इ-बहिनरो, एन अख़दन का निम येसुसिन बेगर चिन्हम अन्ने नन्जकर अउर निम्हय सासकर हूँ अन्नेम नन्जर। 18ख्रिस्तस दुक्खे खेप'ओस ब'आ की धर्मेस ढेर अगुतिम अगमजानिर ती बाचका कत्थन आस एन्नेकी पुरा नन्जस। 19औंगे निम पाप ती निम्हय जियन किर्रत'आ। होले धर्मेस निम्हय हुरमी पापन छेमा ननोस। एन्नेकी निम धर्मेस ती रिझ ही बेड़ा ख़क्खोर। 20अउर आस निम्हय खतरी अगुतिम चजरका ख्रिस्त येसुसिन त'इय्योस चि'ओस। 21अउर धर्मेस ढेर पहले ती तंग्हय नेम्हा अगमजानिर ही ब'ई ती कच्छनखरका हुरमी कत्था फेर पुना मला कमना गुटी येसू ख्रिस्तस मेर्ख़ा नू मना पड़ार'ओ ब'आ की बाचका रहचस। 22मोसस हूँ एन्ने बाचका रहचस,
‘निम्हय यहोवा धर्मेस एंगन इजताचका लेखा निम्हय भ'इय्योर ही मझी ती ओरोत अगमजानिसिन निम्हय खतरी इज्त'ओस।
आस निमरिन एन्दरा-एन्दरा ब'ओस अबड़ा हुरमी कत्थन निमा गे मेना पड़ार'ओ।#व्यवस्था १८:१५, १८
23आ अगमजानिस ही कत्थन मला मिनुर
धर्मेस ही आलर ती अम्बर'ओर की नास मनोर।’#व्यवस्था १८:१९
24“समु'एलस अउर आस ही ख़ोख़ा ता होरमा अगमजानिर इबड़ा उल्ला गुट्ठी ही पत्तनुम मुन्द तिंगका रहचर। 25धर्मेस तंग्हय अगमजानिर ती निम्हय खतरी गच्छरस अउर धर्मेस निम्हय पुरखर गने गच्छरका निम्हय खतरी हूँ हिके। नम्हय पुरखा अब्राहामसिन धर्मेस ‘निंग्हय ख़द्दर तिम एन ख़ेख़ेल ता होरमा जतियर गे आसिस चि'ओन’ ब'आ की बाचका रहचस।#सिरजन २२:१८ 26अन्नेम धर्मेस निम्हय मलदव नलख ती किर्रताचस की आसिस चि'ओन बाचस की आस तंग्हय सेवा ननू येसुसिन होरमर ती पहले निम्हय गुसन त'इय्यस।”
Zvasarudzwa nguva ino
मुध चेलर 3: KRUX
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Mother Tongue Translators Society and Wycliffe Bible Translators, Inc. All rights reserved.