Matthew 1
1
1အယ်မိုကြောရာဟ အာဗြံဟံန ဘုရင်ဒါဝိဒ်ရဲ့ မျိုးရိုးဟနေ ဆင်းသက်လာဝို ကိုယ်တော်ယေရှုရဲ့ မျိုးရိုးစဥ်ဇက် စာရင်းဖြစ်ရယ်။ 2အာဗြံဟံဟ ဣဇက် ဖ၊ ဣဇက်ဟ ယာကုပ်ဖဖြစ်ပီး ယာကုပ်ဟ ယုဒ န သူ့ညီကိုဒွေရဲ့ဖ ဖြစ်ရယ်။ 3ယုဒဟ ဖာရက်န ဇာရဒို့ရဲ့ ဖဖြစ်ပီး သူ့နို့နှေ့ယော့မိဟ တာမာဖြစ်ရယ်။ ဖာရက်ဟ ဟေဇရုံရဲ့ ဖဖြစ်ပီး ဟေဇရုံဟ အာရံရဲ့ဖ ဖြစ်ရယ်။ 4အာရံဟ အမိနဒပ်ရဲ့ဖ၊ အမိနဒပ်ဟ နာရှုန်ရဲ့ဖ ဖြစ်ပီး နာရှုန်ဟ စာလမုန်ရဲ့ဖဖြစ်ရယ်။ 5စာလမုန်ဟ ဗောဇရဲ့ဖဖြစ်ပီး မိဟ ရာခပ် ဖြစ်ရယ်။ ဗောဇဟ ဩဗက်ရဲ့ဖဖြစ်ပီး မိဟ ရုသဖြစ်ရယ်။ ဩဗက်ဟ ယေရှဲရဲ့ဖဖြစ်ရယ်။ 6ယေရှဲဟ ဘုရင်ဒါဝိဒ်ရဲ့ဖဖြစ်ပီး ဒါဝိဒ်ဟ ရှောလမုန်ရဲ့ ဖဖြစ်ရယ်။ ရှောလမုန်ရဲ့မိဟ ဥရိယရဲ့မယားဖြစ်ရယ်။ 7ရှောလမုန်ဟ ရောဗောင်ရဲ့ ဖဖြစ်ပီး ရောဗောင်ဟ အဘိယရဲ့ဖဖြစ်ရယ်။ အဘိယဟ အာသရဲ့ဖဖြစ်ရယ်။ 8အာသဟ ယောရှဖတ်ရဲ့ဖဖြစ်ပီး ယောရှဖတ်ဟ ယောရံရဲ့ဖဖြစ်ရယ်။ ယောရံဟ ဩဇိရဲ့ဖဖြစ်ရယ်။ 9ဩဇိဟ ယောသံရဲ့ဖဖြစ်ပီး ယောသံဟ အာခတ်ရဲ့ဖဖြစ်ရယ်။ အာခတ်ဟ ဟေဇကိရဲ့ဖဖြစ်ရယ်။ 10ဟေဇကိဟ မနာရှေရဲ့ဖဖြစ်ပီး မနာရှေဟ အာမုန်ရဲ့ဖဖြစ်ရယ်။ အာမုန်ဟ ယောရှိရဲ့ဖဖြစ်ရယ်။ 11ယောရှိဟ ယေခေါနိနညီကိုဒွေရဲ့ ဖဖြစ်ရယ်။ အဲခီမှာ သူ့နို့ဟ ဘေဘီလုံဝို သုံ့ပန်းဒွေဖြစ်န ခေါ်ဆော်ဇာခံရရယ်။ 12သူ့နို့ဘေဘီလုံဝို ရော့ပီးနော့မှာ ယေခေါနိဟ ရှာလသေလရဲ့ဖဖြစ်ပီး ရှာလသေလဟ ဇေရုဗဗေလရဲ့ ဖဖြစ်ရယ်။ 13ဇေရုဗဗေလဟ အဗျုဒ်ရဲ့ ဖဖြစ်ပီး အဗျုဒ်ဟ ဧလျာကိမ်ရဲ့ ဖဖြစ်ပီး ဧလျာကိမ်ဟ အာဇော်ရဲ့ဖဖြစ်ရယ်။ 14အာဇော်ဟ ဇာဒုတ်ရဲ့ဖဖြစ်ပီး ဇာဒုတ်ဟ အာခိမ်ရဲ့ဖဖြစ်ရယ်။ အာခိမ်ဟ ဧလုဒ်ရဲ့ဖဖြစ်ရယ်။ 15ဧလုဒ်ဟ ဧလာဇာရဲ့ဖဖြစ်ပီး ဧလာဇာဟ မဿန်ရဲ့ဖဖြစ်ရယ် မဿန်ဟ ယာကုပ်ရဲ့ဖဖြစ်ရယ်။ 16ယာကုပ်ဟ ခရစ်တော်ဆိုပီးခေါ်ဝို ကိုယ်တော်ယေရှုဝို မွီးဖွားဝို မာရိရဲ့ယော့ကျားဖြစ်သူ ယောသပ်ရဲ့ဖဖြစ်ရယ်။ 17အဲဂျော့ရိ အာဗြံဟံဟနေစပီး ဒါဝိဒ်ထိ မျိုးဆစ် ဆယ့်လေးဆစ်ရှေ့ရယ်။ ဘေဘီလုံဝို ရော့ပီးနော့ ခရစ်တော်ဝို မွီးဖွားထိ မျိုးဆစ် ဆယ့်လေးဆစ်ရှေ့လေရယ်။ 18ယေရှုခရစ်တော်မွီးဖွားဝို ဖြစ်စဥ်ဟ အယ်မျိုးဖြစ်ရယ်။ ကိုယ်တော်ယေရှုမိ မာရိဟ ယောသပ်နစေ့စပ်ပီး ပေါသင်းနေထိုင်ဇာမှေ့ဘဲခီမှာ ဉာဏ်လင်းတော်အားန ကိုယ်ဝန်ရနေဇာဝို သိရလေရယ်။ 19ယောသပ်ဟ ဖြော့မတ်ဝိုလူဖြစ်ရိတွက် မာရိဝို လူဒွေရှေ့မှာ ရှစ်မရစေရှင်ရိတွက် မြင်ဂလာပွဲဝို တိတဆိဖျစ်သီးဝို့တွက် စီစဥ်လေရယ်။ 20အယ်ဘေမဲ့ သူဟ အဲမိုကြောဝို စဉ်းစားဆင်ခြင်နေခီမှာ ဘုရားရှင်ရဲ့နတ်ဒေဝါဘားဟ ယောသပ်ရဲ့အီမက်ထဲမှာ ပေါ်လာပြီး "ဒါဝိဒ်ရဲ့မျိုးဆစ်ဖြစ်ဒဲ့ယောသပ်၊ မာရိရဲ့ကိုယ်ဝန်ဟ ဉာဏ်လင်းတော်အားန ရရှေ့ဇာဖြစ်ရိတွက် သူမဝို သင့်ရဲ့ဇနီးဖြစ်န လက်ထပ်ယူဝို့ ကြော့ပါန။ 21သူမဟ သားယော့ကျားရားယော့ဝို မွီးဖွားလိမယ်။ အဲမိုသားဟ သူ့လူမျိုးဒွေဝို အကုသိုလ်ဒုစရိုက်ပြစ်ဒွေဟနေ ကယ်တံဝို့လူဖြစ်ရိတွက် သူ့ဝိုယေရှုဆိုပီး နော်မယ်ပေးပါ။" ဆိုပီး ပြောလေရယ်။ 22အယ်မိုကြောရာဂူလုံးဟ ဘုရားရှင်ဟ ပရောဖက်ဝို မိဆိုရစ်ဝိုတိုင်း မှန်တဂယ်ဖြစ်လာဇာဖြစ်ရယ်။ အဲမို ပရောဖက်မိဆိုရစ်ဇာဟ 23"နားထော်ဂေ့လော့။ ပျိုတယော့ဟ ကိုယ်ဝန်ဆော်ပြီး သားယော့ကျားရားယော့ဖွားမြင်လိမယ်။ အဲမိုသားနော်မယ်ဝို 'ကျနော်ဒို့န တူတူရှေ့တော်မူဝိုဘုရားသခင်' ဆိုပီး ဓိပ္ပာယ်ရဝို 'ဧမာနွေလ' ဆိုပီး ခေါ်ဆိုဂေ့လိမယ်" ဖြစ်ရယ်။ 24ယောသပ်ဟ အိပျော်ရာဟနေနိုးလာခီမှာ နတ်ဒေဝါမိမှာရစ်ဝိုတိုင်း မာရိဝိုဇနီးမယားဖြစ် လက်ထပ်လေရယ်။ 25အယ်ဘေမဲ့ သူ့နို့ဟ သားဂန်းရားမမွီးခံထိ တူတူအိဂေ့ရ။ အဲနော့ယောသပ်ဟ သားငယ်ရားဝို 'ယေရှု' ဆိုပီး နော်မယ်ပေးလေရယ်။
Zvasarudzwa nguva ino
Matthew 1: ttpv-rv
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.