मत्ती 23
23
सास्तरिऔं और फरीसिऔं कै ईसु की फटकार
(मरकुस 12:38,39; लूका 11:43,46; 20:45,46)
1ईसु नै फिर अपने चेलौ और भीड़ सै कैई: 2“यहूदी सास्तरी और फरीसी मूसा के नियम कै सिकानै के हकदार हैं, 3इसताँई बे लोग जो कुछ तुमसै कैंऐ, बौ करते और मानते रैहऔ, पर उनके हाँई काम मत करिओ। कैसेकै बे कैबै तौ हैं, पर करै ना हैं। 4बे लोगौ के कन्धा मै भारी बोज तौ लाद देवै हैं, पर खुद उसकै उँगरिया सै बी खिसकानो ना चाँहै हैं। 5#मत्ती 6:1बे सैरे काम इसताँई करै हैं कै लोग उनकै देखैं। बे अपने ताबीजौ और लत्तौ की झालरौं कै इसताँई बड़े सै बड़ी करते रैहबैं हैं जिस्सै लोग उनकै धरमात्मा समजैं। 6बे दाबतौं मै सबसै अच्छी जघै पानो चाँहै हैं, और धरम सभाऔं मै ऊँचो आसन। 7बजारौं मै नमस्कार सुन्नो और लोगौं दुआरा गुरूजी किब्बानो जौ सब उनकै भौत परसन्द है। 8पर तुम लोगौ सै अपने आपकै गुरूजी मत किब्बइओ, कैसेकै तुमरो सच्चो गुरू तौ बस एकई है और तुम सब सिरप भईया और बहन हौ। 9धरती मै किसी कै अपनो ‘अब्बा’ ना कैऔ, कैसेकै तुमरो एकई अब्बा है, जो सुरग मै है। 10ना तुम लोगौ सै खुद कै मालिक कैनदो कैसेकै तुमरो मालिक तौ बस एकई है और बौ मसी है। 11#मत्ती 20:26,27; मरकु 9:35; 10:43,44; लूका 22:26जो तुम लोगौ मै सै सबसै बड़ो है, बौ तुमरो नौकर बनै। 12#लूका 14:11; 18:14जो अपने कै बड़ो मानै है, बौ छोटो बनाओ जागो और जो अपने कै छोटो मानै है, बौ बड़ो बनाओ जागो।
(मरकुस 12:40; लूका 11:39–42,44,52; 20:47)
13 “अरे कपटी सास्तरिऔं और फरीसिऔं! तुम्मै धिक्कार है। तुम लोगौ के ताँई सुरग के राज को मौहड़ो बन्द कर देवौ हौ तुम खुद तौ ना जाबौ हौ पर जो जानो चाँहै है, उनकै रोक देवौ हौ। 14#23:14 कुछ यूनानी हस्तलेखौ मै जौ आयत ना मिलै है। 15अरे कपटी सास्तरिऔं और फरीसिऔं! तुम्मै धिक्कार है। तुम लोग एक चेला बनानै के ताँई धरती और समन्दर पार कर जाबौ हौ और जब बौ चेला बन जावै है, तौ बाकै अपने सै बी दुगनो नरक को हकदार बना देवौ हौ। 16अरे अन्धे अगुबौं! तुम्मै धिक्कार है तुम कैबौ हौ अगर कोई मन्दर की कसम खावै है तौ इसको माननो जरूरी ना है, पर अगर कोई मन्दर के सौने की कसम खावै है, तौ बौ बा कसम सै बंध जावै है। 17अरे अन्धे मूरखौं! बड़ो कौन है? मन्दर को सौनो या मन्दर जिसनै बौ सौनो पबित्तर बनाओ। 18तुम जौ बी कैबौ हौ कै अगर कोई बेदी की कसम खावै है तौ कुछ ना, पर अगर कोई बेदी मै रक्खे भए चढ़ाबे की कसम खावै है, तौ बौ बा कसम सै बंध जावै है। 19अरे अन्धौ! कौन बड़ो है? बेदी मै रक्खो भओ चढ़ाबो या बौ बेदी जिस्सै बौ चढ़ाबो पबित्तर बनै है? 20इसताँई जो बेदी की कसम खावै है, बौ उसकी और उसमै रक्खी भई चीजौ की बी कसम खावै है। 21बौ जो मन्दर की कसम खावै है, बौ उसके संग जो मन्दर के भीतर परमेसर रैहबै है बाकी बी कसम खावै है। 22#मत्ती 5:34और जो सुरग की कसम खावै है, बौ परमेसर के सिंगासन और उसमै बैठनै बारे की बी कसम खावै है।
23 “अरे कपटी सास्तरिऔं और फरीसिऔं! धिक्कार तुम लोगौ मै! तुम पोदीना, सौंप और जीरे को दसमो हिस्सा तौ देवौ हौ, पर नियम की खास बात नियाय, दया और बिसवास की बेजती करौ हौ। अच्छो तौ जौ हो कै तुम इनकै बी करते रैहते, और दैनै बारी बात कै बी ना छोड़ते। 24ओ अन्धे अगुबौं! तुम अपने पानी सै मच्छर तौ छानौं हौ पर ऊँट कै निगल जाबौ हौ।
25 “अरे कपटी सास्तरिऔं और फरीसिऔं! धिक्कार तुम लोगौ मै! तुम बिलिआ और थरिया कै बाहार सै तौ माँजौ हौ, पर भीतर बे लूट और छल-कपट सै भरे भए हैं। 26अरे अन्धे फरीसिऔं पैले अपनी बिलिऔं और थरियौं कै भीतर सै साप कर लो, जिस्सै बे बाहार सै बी साप हो जाँय।
27 #
चेलौ 23:3
“अरे कपटी सास्तरिऔं और फरीसिऔं! धिक्कार तुम लोगौ मै, तुम चूना सै लिपि-पुति भई समादी हौ, जो बाहार सै तौ अच्छी दिखै है, पर भीतर सै मुरदौं की हड्डिऔं और हर तरै की गन्दगी सै भरी पड़ी है। 28ऐंसेई तुम बाहार सै तौ धरमात्मा दिखाई देवौ हौ, पर भीतर सै छल-कपट और बुराई सै भरे भए हौ।
(लूका 11:47–51)
29 “अरे कपटी सास्तरिऔं और फरीसिऔं! धिक्कार तुम लोगौ मै! तुम नबिऔ की समादी बनाबौ हौ और धरमात्माऔ की कबरौं कै सजाबौ हौ। 30और कैबौ हौ, ‘अगर हम अपने पुरखौं के बखत जिन्दे होते, तौ हम नबिऔ को खून कन्नै ताँई उनको सात ना देते।’ 31मतलब जौ है कै तुम मानौ हो कै तुम उनकी औलाद हौ जो नबिऔ के हत्तियारे हे। 32तौ, अपने पुरखौं की कसर पूरी कर लो।
फरीसिऔं और सास्तरिऔं कै डन्ड
33 #
मत्ती 3:7; 12:34; लूका 3:7 “अरे साँपौ और साँपौ की औलादौं! तुम लोग नरक की सजा सै कैसे बचौगे? 34देखौ! मैं तुमरे धौंरे नबिऔ, बुद्धिमानौ और सास्तरिऔं कै भेजौ हौं, तुम उनमै सै कुछ कै मार डारौगे और कुरूस मै चढ़ाऔगे, कुछ कै अपने सभाघरौ मै कोड़ा लगाऔगे और एक सैहर सै दूसरे सैहर उनको पिच्छो करते फिरौगे।
35 “जिस्सै धरती मै धरमात्माऔ को जितनो खून बहाओ गओ धरमी हाबिल के खून सै लेकै बिरिक्याह के लौंड़ा जकरयाह के खून तक, जो तुम लोगौ नै मन्दर और बेदी के बीच मार डारो हो, बौ सब तुमरे सिर पड़ैगो। 36मैं तुमसै सच कैरओ हौं इस सब कुछ के ताँई इस पीड़ी के लोगौं कै डन्ड भोगनो पड़ैगो।
ऐरूसलेम के ताँई दुख
(लूका 13:34,35)
37 “हे ऐरूसलेम, हे ऐरूसलेम, तू बौ है जो नबिऔ की हत्तिया करै है और परमेसर के भेजे भए दूतौ कै पत्थरौं सै मार देवै है। मैंनै कितनी दफै चाँहो कै जैसे कोई मुरगी अपने बच्चौं कै अपने पंखौ के नीचे इखट्टे कर लेबै है, बैसेई मैं तेरे बालकौ कै इखट्टे करलौं, पर तुम लोगौ नै ना चाँहो। 38देखौ, तुमरो मन्दर उजड़ो भओ छोड़ दओ जागो। 39मैं तुमसै कैरओ हौं, अब सै तुम मैंकै ना देखौगे, जब तक तुम जौ ना कैऔगे, ‘धन्न है बौ जो परभु के नाम सै आ रओ है।’”
Zvasarudzwa nguva ino
मत्ती 23: TKB
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
New Life Compute Institute [NLCI] - CC BY-NC-ND 4.0