याकूब 2
2
भेदभाबके बारेमे चेतावनी
1हे मेरे बिश्वासी ददाभइयओ, तुम हमरे महिमामय प्रभु ख्रीष्ट येशूके चेला हओ जहेमारे तुममे भेदभाव नाए होबए। 2मानओँकी कोइ आदमी सोनोको अंगुठी और अच्छो लत्ता लगाएके मण्डलीमे आत हए, और एक गरीब फिर फटो-फटाओ लत्ता लगाएके आए। 3और तुम अच्छो लत्ता लगान बारोके जद्धा सम्मान दइके काहे, “तुम अच्छो ठिहामे बैठओ,” और गरीबसे काहे, “तए हुनै ठाणो रहो,” या “मेरे पाउँके तरे भीमे बैठ,” कहात हओ। 4का तुम हियाँ भेदभाव नाए करे? का तुम खराब बिचारसे न्याय करन बारे नाएभए? 5हे मेरे प्यारे बिश्वासी ददाभइयओ, सुनओ, जा संसारके गरीब आदमीनके परमेश्वर बहुत बिश्वास करी। परमेश्वर बे सबके अपनो राज्यमे हकदार होनके ताहीं प्रतिज्ञा करी, कि जौन बाके प्रेम करैगो। 6पर तुम बो गरीबके हेल्हा करत हओ। तुम जानतहओ, कि बेहीं धनी आदमी हएं, जो तुमर उपर अत्याचार करत हएं। बेहीं हएं, जो तुमके जबरजत्ती कचेहेरीमे लैजात हएं। 7बे आदमी बेहीं हएं, जो येशू ख्रीष्टके असल नाउँके बिरुद्ध खराब बात मस्कत हएं, जौनसे तुम सम्बन्ध धरे हओ। 8अगर तुम नेहात्तओ “अपनो परोसीसे अपनए कता प्रेम करियओ,” करके लिखो भओ पबित्र-शास्त्रको सबसे महत्वपूर्ण नियम कानुनके पालन करत हओ कहेसे तुम ठिक काम करत हओ। 9पर, अगर तुम भेदभाव करत हओ कहेसे तुम पाप करत हओ, और मोशाको नियम कानुन तुमके दोषी ठहिरात हए। 10काहेकी जौन फिर एक आज्ञाके तोडत हए, पर बाँकी सब नियम कानुनके पालन करत हए, तहुँफिर बो दोषी मानो जाबैगो 11जहेमारेकी परमेश्वर जौन जा कही, “तए व्यभिचार मत् करीए” बहे जा फिर कही, “तए हत्या मत् करीए” जहेमारे अगर तुम व्यभिचार त नाए करे, पर हत्या करे कहेसे तुम नियम कानुनके तोणन बारो बनैगो। 12बे आदमी हानी बोलओ और ब्यबहार करओ, जौनको न्याय नियम कानुनके अनुसार होबैगो, जो हमके स्वतन्त्र करत हए। 13काहेकी जौन आदमी दया नाए दिखाइ हए, बोको न्याय बिना दयाको होबैगो। अगर तुम दुस्रेके दया करे कहेसे जब परमेश्वर न्याय करैगो, तओ तुमके फिर बा दया करैगो।
बिश्वास और काम
14हे मेरे बिश्वासी ददाभइयओ, अगर कोइ आदमी कहाबैगो, कि मए प्रभु येशू ख्रीष्टमे बिश्वास करत हओं। पर बो आदमी दुस्रेनके ताहीं अच्छो काम नाए करैगो, तओ बोके का फाइदा? का अइसो बिश्वास कभी अपनो उद्धार करपाबैगो? 15अगर कोइ बिश्वासी भइया या बाहिनियाके लत्ताको कमी हए, और रोजदिन खानपिनको कमी हए। 16और तुम मैसे कोइ बोसे कएहए, “शान्तिसे जाओ, तुम लत्ता लगाएके भरक्के बैठियओ, और अघाएके खैयओ,” पर जो चीज शरीरके ताहीं जरुरी हए, और अगर तुम उनके नाए दए, तओ का फाइदा? 17अइसियए जौन बिश्वासी भलाइको काममे प्रकट नाए होत हए कहेसे बो अपनो स्वभाबमे मरो भओ हए।
18पर कोइ कहे सकत हएं, “तए बिश्वास करत हए। मए त भले काम करत हओं।” पर मए कहात हओं, भले काम करे बिना तुमर बिश्वास मोके दिखाबओ, और मए करोभओ भले काम करके मए अपनो बिश्वास दिखात हओं। 19एकए परमेश्वर हए, कहिके का तए बिश्वास करत हए? जा बढिया हए। पर अइसो बिश्वास त भुत फिर करत हएं, और डरसे कांपत हएं। 20पर हे मुरख आदमीउ, का तुम जा फिर नाए जानत हओ, कि भले काम बिना बिश्वास बेकामको हए? 21हमर पुर्खा अब्राहामके बारेमे बिचार करओ। पक्का बो अपनो लौंणा इसहाकके वेदीमे चढानको काम करके परमेश्वरके अग्गु धर्मी ठहिरो रहए। 22तुम देखत हओ, कि बिनको काम सँगए-सँग बिश्वास पक्को रहए, और बोको बिश्वास बोके कामके द्वारा पुरा भओ रहए। 23और पबित्र-शास्त्रको जा बचन पुरा भओ, “अब्राहाम परमेश्वरमे बिश्वास करी, और बोके बिश्वासके कारण परमेश्वर बोके एक धर्मी आदमीके रुपमे मानी” और बो परमेश्वरको सँगी कहोगओ। 24तुम देखलए, कि आदमी बिश्वाससे इकल्लो नाए, पर बो अपने कामके द्वारा एक धर्मी आदमीके रुपमे मानो जातहए। 25वेश्या राहाबके बिचार करओ, कैसे बो काम द्वारा परमेश्वरके अग्गु धर्मी मानी गइ। सुराक लेन जान बारे इस्राएलीनके लुकाएके और दुस्रो डगर पठाएके बो बचाइ। 26जैसे शरीर साँस बिना मरो होतहए, उइसीयए बिश्वास फिर भले काम बिना मरो होतहए।
Zvasarudzwa nguva ino
याकूब 2: THRNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.