الأمثال 8
8
نداء الحِكّمة
1چى الحِكّمة ما تنادي؟ والفطنه ما ترفع صوتها؟ 2فوق التلال و المرتفعات تلقاها واقفة بجنّب الطريق، و عند تقاطعات الشّوارع. 3جنب أبواب المدينة في المدخل، واقفة وتصرخ بأعلى صوتها و تقول: 4يا ناس هداني أرفع صوتي وأناديكم وكل البشر. 5يا سفيهين تعلموا النباهة ويابهايم اكسبوا الفهم. 6إسمعوني عدل لإني بنطق بكلام عظيم، و أفتح شفايفي بكلام الحق. 7لأن لساني ما يتكلم إلا بالصّدق، و شفايفي تكره الشر. 8كل كلام يطلع من لساني عادل و ما فيه لا لف ولا دوران. 9كلام واضح عند الفهيم، و في الصميم للي عندهم معرفة. 10إخّتاروا تعليمي بدل الفضّة، و المعرفة بدل الدهب الخالص. 11لأن الحِكّمة أحسن من اللؤلؤ، و كل شي تشتهيه نفسك ما يعادلها.
12أني الحِكّمة أسكن ويا العقل المستقيم، و أمّلِك المعرفة و التمييز. 13الخوف من الرب يعني كره الشر. و إني كرهت التكبّر و الغرور و طريق الشر و كلام المكر. 14عندي المشورة و الرأي السّليم، و عندي الفِطنة و القوّة. 15بعوّني يحكم الملوك، و يصدر الحُكّام قوانينهم بالعَدل. 16بعوّني يتسيد الرؤساء و الأشراف و كل القُضاة في الأرض. 17أحب إلا يحبوني، وإلا يتعب حاله ويدوّر عني يلاقيني. 18عندي الغِنى و المجد و الشَرَف الدّايم و الصَّلاح. 19و ثمري أحسن من الدهب الخالص، و أغلى من الفضّة الصّافية. 20أمشي في طريق الصَّلاح، و في طريق الحق تلقاني. 21عشان أوهب إلا يحبني الغِنى، و أترسّ خزاينهم بالكنوز.
22الرب شكّلني من يوم بدأ خلق الكون، قبل ما يبدي أعماله القديمة. 23من زمان أول أني موجودة، أول شي قبل ما تنخلق الأرض. 24إنّولدت قبل ما تنخلق البحور و الأنهار و الينابيع الغزيرة. 25مولودة قبل الجبال و التلال. 26حزتها ما إنخلقت لا الأرض، و لا البراري و لا حتى تراب هالعالم. 27كنت موجودة لما ثبت الرب السما، و لما رسم دائرة الأفق حوالي وجه المحيطات. 28و لما ثبّت الغُيوم في الأعالي، و أسسّ ينابيع المحيطات و البحور. 29لما حطّ حدود لماي البحر عشان ما يتجاوز و لا يتعدى على أمر الرب، و لما رسم أساسات الأرض، 30كنت حزتها جنب خالق الكون المُبدع، و كنت فرحته كل يوم، و كنت ممتلية و فايضة بالفَرحة و دايماً قدّامه. 31سعيدة بين خليقته، و فرحانة ويا بني آدم.
32و الحين إسمعوني يا أولادي، هَنِي له إلا يتصرف حسب شوري و تعاليمي. 33إسمعوا لتوجيهي، و خلكم حكيمين ولا تحتقروه. 34هَنِي له إلا يسمع إليي، و يحرص على السّهَر عند بيباني، و يحرس مداخل مكاني. 35لأن إلا يحصلني يحصل حياة، و يفوز برضا الرب. 36و إلا يضيعني يأدي روحه، و إلا يكرهني يحب الموت.
Zvasarudzwa nguva ino
الأمثال 8: QNAV
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Qatifi New Arabic Version © 2024 Strategic Resource Group