الأمثال 3
3
الحِكّمة طريق النجاح
1يا ولدي لا تنسى تعاليمي، و قلبك خلّه على طول يرعي وصايايي. 2لأنها بتمدّ في أيام عمرك، و تزيد سنين حياتك خير و سلام. 3لا تخلي الرَحّمة و الأمانة يفارقوك، خلهم قلادة على رقبتك، و إكتبها على صفحة قلبك، 4عشان تفوز بالرضى و السيرة الحَسنة في عيون الله و الناس.
5توكل على الرب من كل قلبك، ولا تعتمد على فطنتك و فهمك. 6في كل طريق تمشي فيه، إعرف الرب و تدكر إنه وياك و هو بمهّد لك طريقك.
7لا تشوف روحك حكيم في عيونك لكن خلّي عندك مخافة الرب و ابتعد عن الشر. 8عشان تعيش بالصحة و العافية و عظامك تكون قويّة و سليمة. 9أكرم الرب من فلوسك، و من أول ثمر زرعك. 10عشان تنترس مخازنك بالخيرات، و معاصرك تفيض من الخمر.
11يا ولدي لا تحتقر تأديب الرب ولا تكره عقابه، 12لأن إلا يحبّه الرب يأدبه، و يفرح فيه زي ما الأبو يفرح بولده.
13هَنِي الإنسان إلا حصّل على الحِكّمة و للرجال إلا فاز بالفِهم، 14لأنهم إغتنوا بها أكثر من غناهم بالفضّة، و ربحوا منها أرباح تزيد عن ربح الدهب. 15هي أغلى من النفايس، و كل شي غالي تملكه ما يساويها. 16على إيدها اليمين حياة طويلة و على يسارها ثروة و شرف. 17طرقها طرق نعمة، و دروبها دروب سلام. 18هي شجرة حياة للي يتعلق بها، و هني إلي يتمسك فيها. 19بالحِكمة أسسّ الرب الأرض، و بالفِطنة ثبت السماوات في أماكنها. 20بعلمه تفجرت البحور و قطرت الغُيوم الندى.
21يا ولدي، لا تخلي عيونك تغفل عن الحِكّمة و الفِهم، و تصرّف بتدّبير و إتبع الرأي السّليم. 22وهالشي بصير حياة لنفسك، و قلادة تزين بها رقبتك. 23ووقتها تمشي في طريقك آمن و ما تتعرقل رجولك. 24و إدا نمت الخوف ما يقرِّب جنبك، بالعكس تنام متهني بأحلى نومة. 25لا تخاف من أي بلوة تتجيك مرة وحدة، ولا من الشر إلا يجي على الناس الخبيثين. 26لأن الرب هو سندك، و هو من يحفظ رجولك من الفَخّ و الشر.
27لا تمنع الخير عن أهله إدا كنت قادر تسويه. 28ولا تقول لجارك: «روح الحين، بعدين إرّجع لي في وقت ثاني. بكرا أعطيك إلا تبغاه،» دام عندك إلا يبغاه. 29لا تتآمر بالشرّ على جارك إلا ساكِن جبنك و متطمن منك. 30لا تخاصم أحد بدون سبب إدا ما آداك.
31لا تغار من الظّالِم ولا تختار طريقه. 32لأن الأعوج عند الرب نجس، لكن اللي مشاي سيده فهو محل ثقة الرب. 33لعنة الرب تصيب بيت الخبيث، و البركة تجي على بيت الصالحين. 34يسخر من المتكبرين و المغرورين، و يكرم المتواضعين برضاه و نعمته. 35الحَكيمين يورثوا الكرامة، أما السفيهين يلبسوا العّار.
Zvasarudzwa nguva ino
الأمثال 3: QNAV
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Qatifi New Arabic Version © 2024 Strategic Resource Group