लुका 20
20
इसुको खाबारा बारेता हिअ्का
(मत्ति २१:२३-२७; मरकुस ११:२७-३३)
1एअ्नि इसु थानता द्याङगेलाइहेङ बिद्या पिदोङघाखे रो परमेस्वरको पिगिल्का रेम्काबानाल हिम्पादोङ घाखे। इङको पहर मुल धामि, धरम मास्टरगेलाइ बो आगुवागेलाइदोफाङ मिलितेङ वाकोता लोतेङ दोअ्हि, 2“केलाइहेङ दोअ्, ना हितासो खाबारा निङतेङ इदोइ कामगेलाइ पाखेना? इदोइ खाबारा नासेहेङ हासु पिहि?”
3इसु एम्बालाइहेङ दोअ्हि, “का बुङ नेलाइहेङ एलोङ काथा हिअ्ताङका ते दोअ्सु, 4युहन्ना बुङ चिभुअ्लि पिका खाबारा हितासो निङहि? परमेस्वर पाहासो ना द्याङसो?” 5इदोइ हिङतेङ एम्बालाइ ताताइमिता एसापा काथा पालि तेङहि, “एला केलाइ हाइ दोअ्ताङ? परमेस्वर पाहासो दोअ्ताङ पानु ‘नेलाइ हाइपालि युहन्नाहेङ खान्धुर मापासुन्हा दोअ्तावा?’ 6द्याङसो दोअ्ताङ पानु इदोइ जोम्का द्याङगेलाइ केलाइहेङ उन्ठुइ तोतेङ सेअ्तावा। हाइदोनु एम्बालाइ युहन्नाहेङ परमेस्वर पाहासो धुइका दोअ्तेङ खान्धुर पाखे।” 7इदोइभाअ्सिङ एम्बालाइ इसुहेङ दोअ्हि, “खोइ, वा इङको खाबारा हितासो निङहि केलाइहेङ फोम मान्थु।” 8कालाउ इसु दोअ्हि, “एन्सा जेङनु का हितासो खाबारा निङतेङ इदोइ काम पादोङखा दोअ्तेङ का बुङ नेलाइहेङ मादोअ्ताङका।”
आङगुर बारिको आधियारगेलाइको उदारन
(मत्ति २१:३३-४६; मरकुस १२:१-१२)
9इङकोन्हुअ्सो इसु द्याङगेलाइहेङ उदारनको रुपता इस्का काथा दोअ्हि, “एअ्मि द्याङ ताइको बारिता आङगुर थिङहि। कालाउ ताइको लागाइका आङगुर बारि काम्हाइलि आध्यारगेलाइहेङ पितेङ वा बोमुलुक हानितेङ हेन्जाङ दिनाथिकापा उसोङ हि।#यासाइया ५:१ 10आङगुर मिङकान्हुअ्सो वा एअ्मि कामत्याहेङ ताइको निङका आधिया भाग नाःनि दिङगिल्हि। कालाउ इङको आधियारगेलाइ वासेहेङ हाइदोङ मापिसिङ दान्हाइतेङ घुरिपागिल्हि। 11आरोङ बारिको मालिक ताइको भेनेङ कामत्याहेङ दिङगिल्हि। कालाउ आध्यारगेलाइ वासेहेङ बुङ दान्हाइहि रो लेदेरपातेङ हाइदोङ मापिसिङ गिल्गिल्हि। 12इङकोन्हुअ्सो बारिको मालिक पाकाहेङ बुङ आधियारगेलाइ सिलि तोम्पाङ दान्हाइतेङ आङगुर बारिसो बाहार थाइगिल्हि।
13 “कालाउ आङगुर बारिको मालिक दोअ्हि, ‘एला का हाइ पाङका? ताइको माया पाका चानहेङ दोङ दिङगिलाङका। एम्बालाइ काङको चानहेङ ते एम्बालाइ पाक्काङ मान्याङ वाला।’ 14कालाउ बारि मालिकको चानहेङ दुरेसोङ लोका तिङतेङ इङको आधियारगेलाइ एसा दोअ्तेङ साल्हा पाहि, ‘ला, याते बारि मालिककोङ चान! एला यासेहेङ केलाइ सेअ्ताइने रो वाको आङगुर बारि केलाइको दोङ ज्यावा।’ 15एसा दोअ्तेङ एम्बालाइ वासेहेङ आङगुरको बारिसो घोक्राइतेङ बाहार चुमपुतेङ सेअ्हि।”
इसु एम्बालाइहेङ हिअ्हि, “एला इङको आङगुर बारिको मालिक एम्बालाइहेङ हाइ पावा? 16वा ताइमिङ लोतेङ इङको दुरजन आधियारगेलाइहेङ सेअ्तावा रो ताइको आङगुर बारि बोमिहेङ काम्हाइलि प्यावा!”
इदोइ हिङतेङ द्याङगेलाइ दोअ्हि, “एन्सा ते हेअ्लाउ माज्याको!” 17कालाउ इसु एम्बालाइभारि खाङतेङ दोअ्हि, “एन्सा जेङनु धरमकिताबता लेखिका इदोइ काथागेलाइको माने हाइ कुनु?
‘जेदोङ उन्ठुइहेङ डकरमिगेलाइ काम मालाग्याङ दोअ्तेङ थालगिल्का हिघाहि;
इङको उन्ठुइ दोङ साअ्को जग लागाइलाउ मुल उन्ठुइ जेङलि लोहि।’ #
ले ११८:२२
18 “इङको उन्ठुइर्हुता हुल्का द्याङगेलाइ झाराङ फेअ्न्हातेङ भोयावा। कालाउ इङको उन्ठुइ जाइर्हुता हुलावा ओबालाइ झाराङ धुला ज्यावा।”
तिरो तिरिका बारेता हिअ्का
(मत्ति २२:१५-२२; मरकुस १२:१३-१७)
19धरम मास्टरगेलाइ रो मुल धामिगेलाइ इदोइ काथा ओबालाइकोङ खिलापता दोअ्का गितेङ इसुहेङ एन्सालाउ रिम्लि भोहि, कालाउ एम्बालाइ द्याङगेलाइदोफा थिहि। 20एन्साजेङलाउ एम्बालाइ वासेहेङ सिकापा रिम्लि दाउ भोलि तेङहि। एम्बालाइ वासेहेङ रिम्तेङ रोमि बाराहाकिमको खुरता सोम्पिलि भोघाखे। कालाउ धरमाति भाइपा जेङतेङ एम्बालाइ द्याङगेलाइहेङ टाका पितेङ चेवा हिलि दिङगिल्हि। 21कालाउ चेवाहिका इङको द्याङगेलाइ हानितेङ इसुहेङ हिअ्हि, “मास्टर, केलाइ गिन्हाखे ना ठिकदोङ दोअ्खेना रो ठिकदोङ धिरपाखेना ना द्याङको र्हाइ खान्तेङ हासु भारि बुङ मालागिखेना कालाउ नाते परमेस्वरको सत्ते दामादोङ तिम्पाखेना। 22एला केलाइहेङ दोअ्, हाइ केलाइ रोमि सारकारहेङ पोत तिरिलि यहुदि न्यामता पिखे ना मापिखे?” 23एम्बालाइको मनको केउका काथा गितेङ इसु दोअ्हि, 24“खोइ, कासेहेङ एलोङ रोमि टाका तिम्पासु। इङको टाकाता हासुको मिङ रो छाप लागाइका हि?” एम्बालाइ दोअ्हि, “रोमि राजाको।” 25कालाउ इसु दोअ्हि, “एन्सानु राजाको झोको राजाहेङ दोङ पिसु रो परमेस्वरको झोको परमेस्वरहेङ दोङ पिसु।” 26एम्बालाइ द्याङगेलाइको आगाता इसुहेङ हिदोइ काथाता बुङ फासेपालि मादोहि। कालाउ वाको दोअ्का काथाता एम्बालाइ भारभुसाइतेङ सिकापा हि।
सितेङ सिन्हुका बारेता इसुहेङ हिअ्का
(मत्ति २२:२३-३३; मरकुस १२:१८-२७)
27इङकोन्हुअ्सो आधिमि सदुकिगेलाइ इसुकोता लोहि। एम्बालाइ द्याङ सिकान्हुसो आरोङ सिन्हुतावा दोअ्का काथाता खान्धुर मापाघाखे।#साल्तेङ दिङगिल्का २३:८ 28एम्बालाइ इसुहेङ हिअ्हि, “मास्टर, मोसा केलाइहेङ न्यामता एसापा लेखिपिका हि, ‘जेदोङ वाबाल चानचामिन्दि माजेङपासिङ सिनु, वाको ओने ताइको रान्दि भाउजिदोफा बिहु पाको रो दादाको भाअ्सिङ सान्तान जेङपाको।’#न्याम २५:५ 29एअ् पहरता न्हिअ्मि दादाओनेगेलाइ हिघाहि। जेठा दादा बिहु पाहि रो वा चानचामिन्दि माजेङसिङ सिहि। 30एन्साजेङलाउ वाको माहिला ओने ताइको भाउजिहेङ बिहु पाहि। कालाउ वा बुङ चानचामिन्दि माजेङसिङ सिहि। 31इङकोन्हुअ्सो साहिँला ओनेहेङ बुङ एन्साङ जेङहि। एन्साङ दोङ न्हिअ्मि ओनेदोङ पालाङ पाला भाउजिहेङ बिहु पाहि। कालाउ झाराङ चानचामिन्दि माजेङसिङ सिहि। 32कालाउ आखिरता इङको बेबाल बुङ सिहि। 33एला दोअ्सु, सिकासो सिन्हुका पहरता वा हासुको बेअ् ज्याङ? हाइदोनु वासेहेङ न्हिअ्मि दादाओने दोङ बिहु पाका हिघाहि।”
34इसु एम्बालाइहेङ दोअ्हि, “इदोइ दुनियाता हिका द्याङगेलाइ ना बिहु पाखे ना बिहु दोङ पापाखे। 35कालाउ सिकासो सिन्हुतेङ स्वरग हानिलि भाअ्सिङ योग्य जेङकालाइता बिहु पाका रो पापाका काथा दोङ माजेङखे। 36एम्बालाइ हेअ्लाउ बुङ मास्यावा कालाउ स्वरगदुतगेलाइभाइपाङ ज्यावा। कालाउ एम्बालाइ सिकासो सिन्हुका परमेस्वरको जाहान ज्यावा। 37हाइदोनु सिकालाइ सिन्हुतावा दोअ्का काथाको दासि मोसादोङ पिका हिघाहि। वा जोल्तेङहिका झालासको बारेता लेखिलाउ प्रभु परमेस्वरहेङ, ‘आब्राहामको परमेस्वर, इसहाकको परमेस्वर रो याकुबको परमेस्वर’ दोअ्तेङ दोअ्का हिघाहि।#दामालाअ्का ३:६ 38वा सिकालाइको परमेस्वर माको कालाउ सिन्हुकालाइको परमेस्वर हि! हाइदोनु वाको नजरता झाराङ सिन्हुका हि।” 39कालाउ एअ्मि न्हेमि धरम मास्टरगेलाइ इसुहेङ दोअ्हि, “मास्टर, ना ठिकदोङ दोअ्न्हा।” 40इङकोन्हुअ्सो द्याङगेलाइ वासेहेङ आरोङ हिदि बुङ काथा हिअ्लि लुर दोङ मापाहि।
ख्रिस्ट हासुको खाल
(मत्ति २२:४१-४६; मरकुस १२:३५-३७)
41इसु एम्बालाइहेङ हिअ्हि, “द्याङगेलाइ हाइपालि छुटकारा पिका ख्रिस्टहेङ हेसापा दाउदको खाल दोअ्खे? 42हाइपानु दाउद राजा लेको किताबता एसापा लेखिका हि:
‘परमेस्वर काङको प्रभुहेङ दोअ्हि, ना काङको दाम्पाहा योम,
43 जेलाउथिकापा का नाङको दुस्मनगेलाइहेङ नाङको पाइतालालेता माताअ्ताङका।’ #
ले ११०:१
44 “राजा दाउद ताइमिङ छुटकारा पिका ख्रिस्टहेङ प्रभु दोअ्नाङसिङ एन्सानु हेसापा छुटकारा पिका ख्रिस्टहेङ दाउदको खाल दोअ्लि?”
धरम मास्टरगेलाइको खिलापता चेतानि
(मत्ति २३:१-३६; मरकुस १२:३८-४०)
45कालाउ झाराङ द्याङगेलाइ हिङकाताङ पालाउ इसु ताइको चात्यागेलाइहेङ दोअ्हि, 46“धरम मास्टरगेलाइसो होस पातेङ हिसु। एम्बालाइ तिम्पालि भाअ्सिङ र्हिङका धाबा लागाइतेङ हिगिल्लि मन पाखे। हातेगेलाइता द्याङगेलाइ ताइमिहेङ मान पातेङ सेउपाको दोअ्तेङ इछा पाखे। कालाउ कचहरिसाअ्ता रो भतेरता मान पाका थामेता योम्लि भोखे। 47एम्बालाइ रान्दिको साअ्द्वार घिम्पिखे कालाउ तिम्पालि भाअ्सिङ एम्बालाइ हेन्जा बेलोम्पा पारथाना पाखे। इन्सिका द्याङगेलाइ झाराङखान्तेङ बारका दार निनावा।”
Zvasarudzwa nguva ino
लुका 20: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.