युहन्ना 10
10
रेम्का घोका
1इसु दोअ्हि, “जातिङको, का नेलाइहेङ दोअ्खा, जाइ भेरा खोतारको फिनुसो लिअ्ता मादुल्सिङ भेनेङपाहासो ताङतेङ दुल्खे, इङकोचाहिँ खुका रो डाका। 2कालाउबुङ फिनुसो लिअ्ता दुल्काचाहिँ भेरा घोका। 3द्वारपाल वाको भाअ्सिङ फिनु हेपिखे। भेरागेलाइ वाको गाला हिङखे रो वा ताइको भेरागेलाइहेङ मिङ ल्होपितेङ काइखे, कालाउ एम्बालाइहेङ बाहार चुम्पुखे। 4जेलाउ वा गोताङ भेरागेलाइहेङ बाहार ओल्हिपालिदोखे, वा एम्बालाइको आगाआगा तेखे रो भेरागेलाइ वासेहेङ पिताइखे, हाइदोनु एम्बालाइ वाको गाला नाल्खे। 5कालाउबुङ मानाल्का खामालहेङ एम्बालाइ मापिताइखे, भुरुङ इङकोसो खाअ्खे। हाइदोनु मानाल्का खामालको गाला एम्बालाइ मानाल्खे।” 6इसु एम्बालाइहेङ इदोइ उदारनको रुपता दोअ्हि, कालाउबुङ वा एम्बालाइहेङ दोअ्का काथा एम्बालाइ मागिहि।
इसु जातिङको फिनु
7इदोइभाअ्सिङ इसु आरोङ एम्बालाइहेङ दोअ्हि, “जातिङको, का नेलाइहेङ दोअ्खा, भेरागेलाइको फिनु काआङ। 8काखान्तेङ लाम्फा लोका झाराङ खुका रो डाकागेलाइ, कालाउबुङ भेरागेलाइ एम्बालाइको काथा माहिङहि। 9फिनु कादोङ, एदि हासुङ द्याङ कासो लिअ्ता दुल्हि पानु इङको सिन्हुपावा, कालाउ लिअ्ता बाहार लोलि हानिलि पावा रो चरनता चारेलि निनावा। 10खुका ते खुलि, सेअ्लि रो मुअ्पालि खिनिङ लोखे। काते नेलाइ जिबन निनाको रो इङको हेन्जा निनाको दोअ्तेङ लोघा।
इसु रेम्का घोका
11 “का रेम्का घोका। रेम्का घोका ताइको भेरागेलाइको भाअ्सिङ ताइको पारान चार्हाइखे। 12जेलाको द्याङचाहिँ ताइकोङ घोकाभाइका माको। इङकोते झारखियाहेङ लोका तिङतेङ भेडागेलाइहेङ लाअ्तेङ खाअ्खे। इङकोन्हुअ्सो झारखिया भेरागेलाइहेङ झाअ्मेरेतेङ चुम्पुखे रो इसोओसो पापिखे। 13इङको खाअ्खे, हाइदोनु इङको जेलाको द्याङ, इङको भेराहेङ हाइदोङ वास्ता मापाखे।
14 “का रेम्का घोका, का ताइको भेरागेलाइहेङ नाल्खा रो काङको भेरागेलाइ कासेहेङ नाल्खे। 15जेसापा आबा कासेहेङ नाल्खे, का आबाहेङ नाल्खा। कालाउ का भेरागेलाइको भाअ्सिङ ताइको पारान चार्हाइखा।#मत्ति ११:२७; लुका १०:२२
16 “काङको बो भेरा हि, जाइ इदोइ खोतारको माको। एम्बालाइहेङ बुङ का चुमालिगोइका हि। एम्बालाइ काङको गाला हिन्हावा रो एम्बालाइ एलोङदोङ जेर ज्यावा रो एलोङदोङ घोका ज्यावा। 17आबा कासेहेङ इदोङभाअ्सिङ माया पाखे, हाइदोनु का ताइको जिबन आरोङ निङलिको भाअ्सिङ चार्हाइखा। 18हासु बुङ कासो काङको पारान र्हुलि माद्वावा, कालाउबुङ का ताइकोङ इछाहोइ ताइको पारान चार्हाइखा। ताइको पारान चार्हाइका खाबारा कादोसा हि, कालाउ आरोङ र्हुका खाबारा बुङ कादोसा हि। इदोइ हुकुम का काङको आबासो निङका हिघा।”
19इदोइ बचनको भाअ्सिङ यहुदिगेलाइको माझाता आरोङ बिभेद जेङहि। 20एम्बालाइता हेअ्मि दोअ्घाखे, “यासेहेङ मासान खोअ्का हि रो याते पागालाजेङका हि। नेलाइ याको काथा हाइपालि हिङसुखेना?”
21आधिमि दोअ्घाखे, “मासान खोअ्का द्याङको काथा इस्का माजेङखे। हाइ मासान कान्हाको मि हेपिलि दोखे कुनु?”
यहुदिगेलाइको आगुवागेलाइ इसुहेङ मासाअ्का
22यरुसलेमता थान चार्हाइका पारबा हिघाहि। 23इदोइ चुङदिङको पहर हिघाहि। इसु थानलिअ्ता सोलोमनको धाअ्ता हिगिल्दोङघाहि। 24यहुदिगेलाइ वाको चारबितिङ जोम्तेङ दोअ्हि, “हेअ्लाउथिकापा ना केलाइहेङ दोमनता ताअ्ताना? ना ख्रिस्ट हिन्हा पानु केलाइहेङ माम्होअ्सिङ दोअ्पि।”
25इसु एम्बालाइहेङ दोअ्हि, “का नेलाइहेङ दोअ्पिहोइका, कालाउबुङ नेलाइ खान्धुर मापासुखेना। काङको आबाको मिङता जेदोङ काम का पाखा, इङकोङ काङको दासि पिखे। 26कालाउबुङ नेलाइ कासेहेङ खान्धुर मापासुखेना, हाइदोनु नेलाइ काङको भेरा माको। 27काङको भेरागेलाइ काङको गाला हिङखे, का एम्बालाइहेङ नाल्खा रो एम्बालाइ कासेहेङ पिताइतेङ लोखे। 28का एम्बालाइहेङ हेअ्लाउ मामुअ्का जिबन प्याङका। एम्बालाइ हेअ्लाउ मुअ्तेङ मान्हावा रो हासु बुङ एम्बालाइहेङ काङको खुरसो घिङतेङ माचुमप्वावा। 29काङको आबा इङको पिका हि, वा झाराङखान्तेङ बारका हि। आबाको खुरसो हासु बुङ नेलाइहेङ घिङतेङ चुम्पुलि माद्वावा। 30आबा रो का एलोङदोङ।”
31यहुदिगेलाइ वासेहेङ तोलि दोअ्तेङ आरोङ उन्ठुइ तोल्हेहि। 32इसु एम्बालाइहेङ दोअ्हि, “का नेलाइहेङ काङको आबासो हेन्जाङ रेम्का काम तिम्पाघा। इङकोता हिदोइ कामको भाअ्सिङ नेलाइ कासेहेङ उन्ठुइ तोलि भोसुखेना?”
33यहुदिगेलाइ वासेहेङ दोअ्हि, “रेम्का कामको भाअ्सिङ केलाइ नासेहेङ उन्ठुइ तोलि माभोन्हाखे, कालाउबुङ परमेस्वरको बादानामि पानाङसिङ केलाइ नासेहेङ उन्ठुइ तोलि भोन्हाखे, हाइदोनु ना द्याङ जेङतेङ बुङ ताइमिहेङ परमेस्वर बान्हाइखेना।”#लेबि २४:१६
34इसु एम्बालाइहेङ दोअ्हि, “हाइ नेलाइको न्यामता ‘नेलाइ दिरगेलाइ’ दोअ्तेङ लेखिका मान्थु कुनु?#ले ८२:६ 35एदि जाइदोफा परमेस्वरको बचन लोहि, एम्बालाइ दिरगेलाइ दोअ्न्हावा दोअ्नु (धरमकिताब आसत्ते जेङलि मादोखे), 36आबा पुनित बान्हाइतेङ दुनियाता दिङगिल्का खामाल ‘का परमेस्वरको चान’ दोअ्लाउ हेसापा परमस्वरको बादानामि ज्यावा? 37एदि का काङको आबाको काम पाका मान्थुघा पानु कासेहेङ खान्धुर मापासु। 38कालाउबुङ एदि का आबाको काम पाखा रो बुङ नेलाइ कासेहेङ खान्धुर मापास्वाना पानु इदोइ कामगेलाइर्हुता खान्धुर पासु। कालाउ खिनिङ नेलाइ गिलि दोस्वाना, आबा काङकोता हि रो का आबाता हिघा।” 39एम्बालाइ आरोङ वासेहेङ रिम्लि भोहि, कालाउबुङ वा एम्बालाइको खुरसो पुच्काहि।
40इसु आरोङ यरदन ओदोइपार इङको थामेता हानिहि, जेता युहन्ना लाम्फा चिभुअ्लि पिघाखे रो वा इन्ताङ हि।#युहन्ना १:२८ 41हेन्जाङ द्याङगेलाइ वाकोता लोलि तेङहि रो एम्बालाइ दोअ्हि, “युहन्ना हिदिङ चिनोगेलाइ मापाहि, कालाउबुङ युहन्ना याको बारेता जेदोङ जेथे दोअ्का हिघाखे इङको सत्ते हिखाखे।” 42कालाउ इन्ता हेन्जाङ द्याङगेलाइ वासेहेङ खान्धुर पाहि।
Zvasarudzwa nguva ino
युहन्ना 10: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.