साल्तेङ दिङगिल्का 28
28
पावल माल्टा टापुता
1एसापा सिन्हुतेङ काम्बेता लोकान्हुअ्सो इङको टापुको मिङ माल्टा हिघाहि दोअ्तेङ केलाइ गिन्हाहि। 2इन्ताको द्याङगेलाइ हेन्जाङ मिलिसुका हिघाहि। इङको पहर वाइ लोतेङ हेन्जाङ चुङनाङसिङ एम्बालाइ मे धोतेङ केलाइहेङ एम्लि काइहि। 3पावल एअ्बाअ् मिसिङ जोम्पाका हिघाखे रो इङको चुमातेङ मेता जुअ्हि। मेको रापसो एलोङ पुह्याँ ओल्हितेङ लोहि रो वाको खुरता चोतेङ तोइन्हाहि। 4पावलको खुरता चोतेङ एसापा पुह्याँ तोइन्हाका तिङतेङ इन्ताको द्याङगेलाइ एअ्मि भेनेङदोफा इस्का काथा पालि तेङहि, “इदोइ द्याङ पाका बुङ जिउसेअ्का दोङ हिलिगोयाङ। जाहादिसो खाअ्लाउ बुङ दिर यासेहेङ बान्चिलि मापिहि।” 5कालाउ पावल ताइको खुर फेअ्लाउ पुह्याँ मेता धिमन्हाहि। वा पावलहेङ हाइदोङ मापाहि। 6इन्ताको द्याङगेलाइ पावल आसा इघुरिङता बिससो इमतेङ स्यावा दोअ्तेङ खाङतेङहि। कालाउ हेन्जाङ पहरन्हुअ्सो बुङ वासेहेङ हाइदोङ माजेङहि। इदोइ तिङतेङ एम्बालाइ ताइको बिचार फेरितेङ दोअ्लि तेङहि, “याते दिर कि हिनाउ।”
7इङको थामेसो इङको टापुको माझि पब्लियसको मिलिङ भेरपाङ हिघाहि। पब्लियस केलाइहेङ वाको साअ्ता बान्साचालि चुमपुहि रो केलाइ सुम्निथिकापा वाको साअ्ता बान्सालाइ जेङतेङ हिन्हाहि। 8इङको पहर पब्लियसको आबाहेङ मेसाधुअ्का रो मासि खोअ्का हिघाहि। पावल पब्लियसको आबाको कोठाता हानिहि कालाउ पारथाना पातेङ ताइको खुर रोगाइकार्हुता ताअ्कान्हुअ्सो वा एल्हि। 9एसापा एल्का गितेङ इङको टापुता हिका झाराङ रोगाइकालाइ लोहि रो पावल एम्बालाइहेङ बुङ एल्पाहि। 10एम्बालाइ केलाइहेङ हेन्जाङ मान पाहि। जेलाउ केलाइ चिजाहाजता धोलन्हाहि, कालाउ एम्बालाइ केलाइहेङ दामाता गोइका झोको आनेमानेगेलाइ बुङ चिजाहाजता ह्वाअ्पिगिल्हि।
पावल माल्टासो रोम हानिका
11सुम माहिनान्हुअ्सो केलाइ आलेक्जेन्ड्रियाको चिजाहाजता धोलन्हाहि। इदोइ चिजाहाजचाहिँ चुङदिङ माहिनाथिकापा माल्टा टापुताङ र्हुमतेङ हिघाहि। इङको चिजाहाजको आगा भागता जाउठ्या दिरको मुरति खोपिका हिघाहि। 12केलाइ सुराकुसाइ दोअ्का पुरता थुकातेङ इन्ता सुम्निथिकापा हिन्हाहि। 13इन्तासो हानिकान्हुअ्सो केलाइ रेगियन दोअ्का पुरता थुकान्हाहि। जुम्निदिना माहेँपाहासो भेरमा लोनाङसिङ केलाइ इतिनिखिनिङ पटिओलि दोअ्का पुरता थुकान्हाहि। 14इन्ता केलाइ प्रभु इसुता खान्धुर पाका आधिमि दादाओनेगेलाइहेङ दुसुन्हाहि। ओबालाइ केलाइहेङ एअ् आथारथिकापा हिपिसु दोअ्तेङ बिम्ति पानाङसिङ, केलाइ एम्बालाइदोफा एअ् आथारथिकापा हितेङ रोम पुरभारि दामा लाअ्न्हाहि। 15प्रभु इसुहेङ खान्धुर पाका रोमता हिका दादाओनेगेलाइ केलाइ लोदोङन्हाखे दोअ्का हिङतेङ आप्पियस हाते थिकापा रो तिनपाटि दोअ्का थामेता केलाइहेङ दुसुलि लोहि। पावल एम्बालाइहेङ तिन्तेङसाङ लेङचातेङ परमेस्वरहेङ च्याबास पिहि।
पावल रोम पुरता
16केलाइ रोमता थुकालिलोकान्हुअ्सो पावलहेङ पलटनको जिम्माता ताइकोङ कोठा र्हुतेङ एकालाङ हिलि पिहि।
17सुम्नि दिनान्हुअ्सो पावल रोमता हिका यहुदिगेलाइको आगुवागेलाइहेङ काइगिल्हि। एम्बालाइ जोम्कान्हुअ्सो पावल दोअ्हि, “दादाओनेगेलाइ, का केलाइको जात्या रो केलाइको आजुखालगेलाइसो पातेङ लोका चलनगेलाइको खिलापता हाइदोङ मापालाउ बुङ यहुदि दादाओनेगेलाइ कासेहेङ यरुसलेमता रिम्तेङ रोमिगेलाइको खुरता सुम्पिहि। 18रोमिगेलाइ हिअ्कान्हुअ्सो कासेहेङ लाअ्पिलि भोहि हाइदोनु एम्बालाइ कासेहेङ सेअ्लि गोइका हिदिङ दुस मानिङहि। 19कालाउ यहुदि दादाओनेगेलाइ कासेहेङ लाअ्पिलि मापिनाङसिङ का रोमि माहाराजा काइसरकोता बिम्ति पालि करदोङ लागिहि। कालाउ काङको ताइको यहुदि दादाओनेगेलाइको खिलापता दुसिलि गोइका हिदिङ काथा मान्थुघाहि।#साल्तेङ दिङगिल्का २५:११ 20इदोइ काथा नेलाइहेङ गिपालि रो नेलाइदोफा दुसुलि भाअ्सिङ का नेलाइहेङ इता काइका हिघाखा। हाइदोनु केलाइ इस्राएलिगेलाइको आस ताअ्का ख्रिस्ट#२८:२० ख्रिस्ट ख्रिस्ट लाम्फाङ लोहोइ दोअ्तेङ पावल खान्धुर पाघाखे। यहुदि द्याङगेलाइ बुङ ख्रिस्टहेङ खान्धुर पाघाखे कालाउबुङ वा लोहोइ दोअ्तेङ खान्धुर मापाघाखे। को भाअ्सिङ दोङ का एसापा झिन्झिरिहोइ धेउन्हाका हिघा।”
21इदोइ हिङतेङ एम्बालाइ दोअ्हि, “नाङको बारेता केलाइ यहुदियासो हिदिङ चिथि निङनाङ मान्थुन्हाहि। कालाउ हिदिङ दादाओनेगेलाइ लोतेङ नाङको खिलापता हिदिङ मारेम्का काथा धुइका रो हिङपाका मान्थु। 22कालाउबुङ केलाइ नाङको बिचारगेलाइ हिङलि भोन्हाखे हाइदोनु नाङको मन्डलिको खिलापता जेसोकोसोङ काथा जेङका चाहिँ केलाइ गिका हिनाहि।”
23इङकोन्हुअ्सो ओबालाइ पावलको काथा हिङलि दिना तोकिहि। तोकिका दिनाता लाम्फाखान्तेङ हेन्जा यहुदिगेलाइ जोम्तेङ पावलको हिका थामेता लोहि। इङको दिना पावल र्हिमासो दिलिमाथिकापा स्वरगको सारभिको बारेता धिरपाहि। धरमकिताबता मोसा रो परमेस्वर पाहासो धुइकालाइको लेखिका काथा चुमतेङ वा इसुको बारेता गिपातेङ एम्बालाइहेङ खान्धुरता चुमालि भोहि। 24पावलको काथा हिङतेङ आधिमि खान्धुर पाहि कालाउबुङ आधिमिचाहिँ खान्धुर मापाहि। 25ताताइमिताङ काथा मामिलितेङ एम्बालाइ एन्साङ इन्तासो हानिलि तोमलाउ पावल एम्बालाइहेङ एसा दोअ्हि, “पुनित हाङसा नेलाइको आजुखालगेलाइहेङ दोअ्का काथा जातिङको हि हाइदोनु यासाइया परमेस्वर पाहासो धुइकासो वा एसापा धुइहि:
26‘इदोइ द्याङगेलाइकोता हानितेङ दोअ्,
हिङनुते नेलाइ हिङसुखेना, कालाउबुङ मागिसुखेना,
खाङनुते नेलाइ खाङसुखेना, कालाउबुङ मातिङसुखेना!
27हाइदोनु इदोइ द्याङगेलाइको मन उन्ठुइ भाइका हि,
एबालाइको न्हातोङ बाम्तेङ हि
कालाउ एबालाइ ताइको मिँ चिम्तेङ हि!
माकुनु एबालाइ तिङधावा, हिङधावा रो मनसो गिधावा।
कालाउ एम्बालाइ ताइको मन काभारि घुरिपाधावा
रो का एम्बालाइहेङ एल्पाधाङका।’#यासाइया ६:९-१०”
28न्हुअ्सो पावल दोअ्हि, “इदोइभाअ्सिङ एला का नेलाइहेङ दोअ्लि भोखा, छुटकारा पिका रेम्काबानाल परमेस्वर बोजात्यागेलाइकोता पिगिल्का हि रो एम्बालाइ हिनावा।” 29[पावल इदोइ काथा दोअ्कान्हुअ्सो, यहुदिगेलाइ ताताइमिता बादबिबाद पातेङ रो चेरसुतेङ हानिहि।]#२८:२९ इदोइ पद आधे पुरना स्रोत बाइबलता मान्थु।
30पावल न्हे बाअ्सारथिकापा भाराता र्हुका साअ्ता हि। वा ताइमिहेङ दुसुलि लोका झाराङ द्याङगेलाइहेङ स्वागत पाघाखे। 31वा माथिसिङ स्वरगको सारभिको पारचार पातेङ प्रभु इसु ख्रिस्टको बारेता धिरपाघाखे रो हासु बुङ वासेहेङ मारोकिघाखे।
Zvasarudzwa nguva ino
साल्तेङ दिङगिल्का 28: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.