साल्तेङ दिङगिल्का 26
26
1इङकोन्हुअ्सो आग्रिपास पावलहेङ दोअ्हि, “एला नाङको काथा ताअ्लि द्वाना।” कालाउ ताइको खुर पासारपातेङ पावल ताइमिहेङ बान्चिपालि एसापा धुइलि तेङहि, 2“राजा आग्रिपास, यहुदिगेलाइ कासेहेङ दुसिका काथाको बारेता का नानि ताइको काथा नाङकोङ आगाता दोअ्लि निङकाता का ताइमिहेङ भाग्यमानि फोमपाखा। 3नासेहेङ यहुदिगेलाइको गोताङ रितिथिति, बादबिबाद पाका काथाको बारेता रेम्फा गिनाङसिङ का ताइमिहेङ झन भाग्यमानि फोमपाखा। एन्साजेङलाउ काङको काथा रेम्फा हिम्पि दोअ्तेङ का बिम्ति पाखा।
4“का ताइको मुलुकता कालाउ यरुसलेम पुरता यहुदि जात्याको माझाता दोङ बाराघा। एन्साजेङलाउ यहुदिगेलाइ कासेहेङ जामालसो दोङ रेम्फा नाल्खे। 5का फरिसि दोअ्का झाराङखान्तेङ कारा धरम मन्डलिको द्याङ हिघाखा रो का इङकोङ मन्डलिता हितेङ काङको जिबन बान्चिघाखा। एम्बालाइ मन पानु इदोइ काथाको दासि ताइमिङ बुङ दोअ्लि द्वावा।#साल्तेङ दिङगिल्का २३:६; फिलिप्पि ३:५ 6परमेस्वर केलाइको आजुखालगेलाइहेङ केरा चाकाता का आस ताअ्नाङसिङ नानि का एसापा नेलाइको नियाको आगाता जाअ्का हिघा। 7राजा आग्रिपास, इङकोङ केरा निङका आसता केलाइ यहुदिगेलाइको तेन्हे खालगेलाइ बुङ नितिमान्हिसिङता एलोङ मन जेङतेङ परमेस्वरहेङ पुजितेङ भक्ति पाखे। का बुङ इङको आस पानाङसिङ यहुदिगेलाइ कासेहेङ दुसिदोङखे। 8परमेस्वर सिकालाइहेङ सिन्हुपाखे दोअ्का काथाता नेलाइ हाइपालि खान्धुर पालि मादोसुखेना?
9“का बुङ दोकाझोको नासरतको इसुहेङ बिरोध पालिगोयाङ दोअ्तेङ फोम पाका हिघाखा। 10का यरुसलेमता एन्साङपातेङ खिलाप पाघा। का मुल धामिगेलाइसो खाबारा निङतेङ हेन्जाङ परमेस्वरको पुनित द्याङगेलाइहेङ थुनिपाघा। कालाउ एम्बालाइहेङ सेअ्का कामता सुदाङ साघाइका हिघाखा। 11हेन्जाङखे का ओबालाइहेङ इसुको बारेता मारेम्का काथा दोअ्लि लागाइघा कचहरिसाअ्गेलाइता जबरजस्ति पातेङ दार पिलि लागाइघा। का ओबालाइदोफा चेरताम्पातेङ बोमुलुकको पुरगेलाइता बुङ हानितेङ का ओबालाइहेङ सान्ताइघा।”#साल्तेङ दिङगिल्का ८:३; २२:४,५
पावलको मन फेरेन्हाका
(साल्तेङ दिङगिल्का ९:१-१९; २२:६-१६)
12“एसापा एअ्नि मुल धामिगेलाइको खाबारा रो हुकुम निङतेङ का दमस्कस पुरभारि हानिदोङघाखा। 13राजा आग्रिपास, इङको दिना नितिमा दामाता हानिकाताङ पालाउ सानेको फाइसालाम्काखान्तेङ बुङ हेन्जाङ फाइसालाम्का आकाससो का रो काङको सानाइतिगेलाइर्हुता चिल्कालाउ केलाइ झाराङ भोनोता लोङन्हाहि। 14इङको दोङ पहर हिब्रु राउता का एसा दोअ्का हिङघा, ‘साउल ओइ साउल, ना कासेहेङ हाइपालि सान्ताइखेना? सुइसुइकाता लाअ्थेन्हा पानु नासेहेङ दोङ तु:कावा।’ 15कालाउ का हिअ्घा ‘प्रभु, ना हासु हिन्हा?’ प्रभु कासेहेङ दोअ्हि, ‘का इसु, जाइहेङ ना सान्ताइखेना। 16एला ल्हो, का नासेहेङ काङको कामत्या रो दासि पिका बान्हाइलि भोखा। इदोइभाअ्सिङ का नाङकोता देखाल जेङका हिघा। ना काङको बारेता तिङका काथा रो का नासेहेङ न्हुअ्सो तिम्पिका काथागेलाइसुदाङ बो द्याङगेलाइहेङ हिङपालिगोयाना। 17का नेलाइहेङ यहुदिगेलाइ रो बोजात्यागेलाइकोता दिङगिल्दोङखा रो का नासेहेङ एम्बालाइसो जोगायाङका। 18ना एम्बालाइको मिँ हेपितेङ एम्बालाइहेङ कितिकितिकासो फाइसालाम्काता, साइतानको सरबङसो परमेस्वरभारि घुरिपालि गोयाना। एम्बालाइ कार्हुता खान्धुर पाखे कालाउ एम्बालाइको पाप माअ्न्हावा रो एम्बालाइ परमेस्वरको साल्तेङ दिङगिल्का द्याङगेलाइको निङका एअ् बाखारा निनावा।’
19“इदोइभाअ्सिङ राजा आग्रिपास, स्वरगसो तिङका इदोइ दरसनहेङ का मामानेसा हिलि मादोघा। 20झाराङखान्तेङ लाम्फा दमस्कस रो यरुसलेमता कालाउ गोताङ यहुदिया मुलुकता रो बोजात्याको मुलुकगेलाइता बुङ हानितेङ का द्याङगेलाइहेङ पास्ताइसु रो परमेस्वरपाहा घुरितेङ रेम्का काम पासु दोअ्तेङ पारचार पाघा।#साल्तेङ दिङगिल्का ९:२०; २८:२९ 21एन्साङपातेङ यहुदिगेलाइ कासेहेङ थानता रिम्तेङ सेअ्लि भोहि। 22कालाउबुङ नानिको दिनाथिकापा कासेहेङ परमेस्वरदोङ खाङका हि। इङकोङभाअ्सिङ का इता हिकालाइ बारका म्हुइका झाराङहेङ दासि पितेङ जाअ्तेङ हिघा। कालाउबुङ परमेस्वर पाहासो धुइका रो मोसा सुदाङ न्हुअ्सो जेङलि ल्वाङ दोअ्का काथा बाहेक का बो हेन्जा काथा हाइ बुङ दोअ्नाङ मान्थुघा। 23परमेस्वर पाहासो धुइकालाइ ख्रिस्ट पिर भोगितेङ सिलिगोयाङ, वा सिकासो सिन्हुकालाइता झाराङखान्तेङ लाम्फा ज्यावा। एसापा वा ताइको फाइसालाम्का यहुदिगेलाइता बुङ रो बोजात्याको द्याङगेलाइता बुङ चुमावा दोअ्लिदोका हिघाखे।”#१ कोरिन्थि १५:२०; यासाइया ४२:६; ४९:६
24पावलको दोअ्का इदोइ काथा हिङतेङ फेस्तस र्हिकाइतेङ दोअ्हि, “ओइ पावल, ना उधाइहोइना! नाङको हेन्जाङ आकिलसो नासेहेङ उधाइका बान्हाइहि।”
25पावल दोअ्हि, “माननिय फेस्तस! का उधाइका मान्थुघा, का रेम्फाङ हिघा रो सत्ते काथागेलाइ दोङ पादोङखा। 26राजा आग्रिपास इदोइ गोताङ काथा गिखे, जाइको आगाता का माथिसिङ धुइदोङखा। हाइपानु इदोइ हिदिङ काथा वासो म्होअ्न्हाका मान्थु रो इदोइ काथागेलाइ सिकापा पाकाङ माको।” 27पावल दोअ्हि “ना राजा आग्रिपास, हाइ ना परमेस्वर पाहासो धुइकालाइहेङ खान्धुर पाखेना? एइ, ना खान्धुर पाखेना दोअ्का काथा का गिखा।”
28राजा आग्रिपास पावलहेङ दोअ्हि, “हाइ आतुइसा पहरता ना कासेहेङ ख्रिस्टियन बान्हाइलि बिचार पाखेना?”
29पावल दोअ्हि, “आतुइसा काथासो ज्याको ना हेन्जासो, इदोइ काङको खुरता लागाइका झिन्झिरिगेलाइ लाअ्पितेङ, ना खिनिङ माको कालाउबुङ नानि काङको काथा हिङका झोको झाराङ का भाइकाङ ज्याको दोअ्तेङ का परमेस्वरता पारथाना पाखा।”
30कालाउ राजा आग्रिपास, बारका हाकिम फेस्तस, बरनिकि रो एम्बालाइदोफा लोका झाराङ द्याङगेलाइ जाराकजुरुकपा ल्होहि 31कालाउ एम्बालाइ बाहार ओल्हितेङ ताताइमिता एसा दोअ्तेङ काथा पाहि, “इदोइ द्याङ थुनिन्हातेङ सिका दार निङलिगोइका हिदिङ काम पाकाङ मातिङखे।”
32आग्रिपास फेस्तसहेङ दोअ्हि, “इदोइ द्याङ रोमि बाराराजाकोता बिम्ति पालि मार्हेका हिनुते लाअ्पिलाउ बुङ जेङधावा!”
Zvasarudzwa nguva ino
साल्तेङ दिङगिल्का 26: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.