साल्तेङ दिङगिल्का 22
22
1“आबा आमाइगेलाइ रो दादाओनेगेलाइ, नेलाइको आगाता काङको भाअ्सिङ दोअ्लिगोइका काथा एला हिङसु।” 2पावल हिब्रु राउता धुइका हिङतेङ झाराङ द्याङगेलाइ सिपापा हि।
कालाउ पावल दोअ्हि, 3“का किलिकियाको टारसस पुरता जोलोम जेङका यहुदि हिघा। कालाउबुङ का इदोङ यरुसलेम पुरता बारातेङ मास्टर गमलिएलको कोल्हेता बाराघा। केलाइको आजुखालसो दोङ मानितेङ लोका धरमकिताबको बिद्या का रेम्फा धिरका हिघा। नानि नेलाइ परमेस्वरहेङ जेथे हाउसाइका तिम्पासुन्हा, का बुङ इङकोझोकोङ हाउसाइका हिघाखा।#साल्तेङ दिङगिल्का ५:३४-३९ 4का प्रभुको छुटकाराको दामाता लागिका द्याङगेलाइहेङ सिलि तोम्पाङ सान्ताइका हिघाखा। का वाबालाइ रो बेबालाइहेङ रिम्पातेङ थुनिलि लागाइका हिघाखा। 5इदोइ काङको दोअ्का काथा जातिङको दोअ्तेङ झाराङखान्तेङ बारका धामि रो केलाइको बाराकचहरिको सदस्यगेलाइ बुङ दोअ्लि दोस्वाना। ओबालाइ दोङ कासेहेङ दमस्कसता हिका यहुदि दादाओनेगेलाइको मिङता चिथिगेलाइ पिहि रो इङको चिथिगेलाइता कासेहेङ प्रभु इसुता खान्धुर पाका द्याङगेलाइहेङ रिम्का खाबारा पिका हिघाहि। इदोइभाअ्सिङ एम्बालाइहेङ यरुसलेमता चुमातेङ साजाइ पिलिको भाअ्सिङ का दमस्कस हानिघा।#साल्तेङ दिङगिल्का ८:३; २६:९-११
ताइमि फेरेन्हाका पावल द्याङगेलाइहेङ हिम्पाका
(साल्तेङ दिङगिल्का ९:१-१९; २६:१२-१८)
6“जेलाउ का दमस्कस भेरपा थुकालि तोम्लाउ माझादिना जेङका हिघाहि, स्वरगसो एकासि एलोङ चोहोचोहोका जोल्का कार्हुता चिल्काहि। 7का भोनोता लोङघा। इङको दोङ पहर का एसा दोअ्का एलोङ गाला हिङघा, ‘साउल, ओइ साउल, ना कासेहेङ हाइपालि सान्ताइखेना?’ 8का दोअ्घा, ‘प्रभु, ना हासु हिन्हा?’ वा दोअ्हि, ‘का नासरतको इसु, जाइहेङ ना सान्ताइदोङखेना।’ 9कादोफा हिकालाइ फाइसालाम्काहेङ ते तिङहि कालाउबुङ धुइकाको गालाचाहिँ मागिहि। 10का दोअ्घा, ‘प्रभु, एला का हाइ पाङका?’ प्रभु कासेहेङ दोअ्हि, ‘ल्होतेङ दमस्कस पुरता हाने, परमेस्वर नासेहेङ आर्हाइका कामगेलाइको बारेता नासेहेङ इन्ताङ दोअ्प्यावा।’ 11इङको चिल्काका फाइसालाम्कासो का मिँ तिङलि मादोका जेङका हिघाखा इदोङभाअ्सिङ काङको सानाइतिगेलाइ कासेहेङ थोङतेङ दमस्कस थुकापाहि।
12“इङको पुरता हननिया मिङ हिका एअ्मि द्याङ हिघाखे। वा मोसाको पिका न्याम मानिका धरमाति द्याङ हिघाखे रो दमस्कसता हिका यहुदिगेलाइ झाराङ वासेहेङ मानिघाखे। 13इङकोङ द्याङ काङकोता लोतेङ काङको भेरपा जाअ्तेङ दोअ्हि, ‘साउल ओने, आरोङ तिङका जेङ।’ वा एन्सा दोअ्तेङसाङ का मिँ तिङका जेङघा रो वासेहेङ तिङघा। 14इङकोन्हुअ्सो वा कासेहेङ दोअ्हि, ‘ना केलाइको आजुखालको परमेस्वरको इछा गिलि दो दोअ्तेङ दोङ वा नासेहेङ साल्का हि। ना धरमाति कामत्या इसुहेङ तिङलि निङन्हा रो वाको नुइसो धुइका काथाहेङ हिङलि निङन्हा। 15हाइदोनु ना वाको दासि जेङतेङ ताइमिको तिङका रो हिङका काथा झाराङ द्याङगेलाइहेङ हिङपालिगोयाना। 16एन्सानु एला हाइपालि बेलोम पालि? ल्हो रो चिभुअ्लि र्हु कालाउ इसुको मिङता ताइको पापसो चोखाइन्हा।’
17“इन्तासो का यरुसलेम घुरिघा, कालाउ थानता पारथाना पाकापाताङ दरसन तिङघा। 18प्रभु कासेहेङ एसा दोअ्हि, ‘मारफा पातेङ यरुसलेमसो ओल्हे, हाइपानु ना काङको बारेता पिका दासि इताको द्याङगेलाइ माहिङप्यावा।’ 19का दोअ्घा, ‘प्रभु, काङको बारेता एम्बालाइ गोताङ काथा गिखे, का गोताङ कचहरिसाअ्ता हानितेङ नासेहेङ खान्धुर पाकालाइहेङ दान्हाइतेङ थुनिघा। 20नाङको दासि पिका स्तिफनसहेङ हितिहोपाङ दान्हाइतेङ सेअ्लाउ का इन्ताङ हिघाखा रो का बुङ वासेहेङ सेअ् दोअ्घाखा। वाको पारान र्हुकालाइदोसा मिलितेङ एम्बालाइको धाबा र्हुम्तेङ हिघाखा।’#साल्तेङ दिङगिल्का ७:५८ 21कालाउ प्रभु दोअ्हि, ‘ना हाने, का नासेहेङ दुरेदुरेथिकापा बोजात्यागेलाइकोता दिङगिलदोङखा।’”
22जेलाउ पावल बोजात्यागेलाइकोता हानिका काथा हिङहि, कालाउ एम्बालाइ र्हिकाइतेङ दोअ्लि तेङहि, “यासेहेङ सेअ्लिङगोयाङ! एला या सिन्हुपा हिलि योग्यको मान्थु!” 23एसापा जोसता लोतेङ एम्बालाइ ताताइको गुअ्का खाइतेङ आकासभारि धुला थालतेङ र्हिकाइलि तेङहि। 24इदोइ तिङतेङ रोमि पलटनको हाकिम लिअ्ता चुमपुतेङ पावलहेङ छरि लागाइलि हुकुम पितेङ दोअ्हि “यासेहेङ छरि लागाइलाउ या यहुदिगेलाइ हाइपालि चेरताम्पाका हिघाहि दोअ्तेङ दोअ्तावा बे?” 25पलटनगेलाइ छरि लागाइलि धेउलि तोमलाउ पावल भेरपाङ जाअ्का काप्तानहेङ दोअ्हि, “हाइ रोमि नागरिकहेङ दुस मालागाइसिङ छरि लागाइलि निङखे? हाइ रोमि कानुनता एसाङ पालि दोअ्का हि?” 26काप्तान रोमि पलटनको हाकिमकोता हानितेङ इदोइ काथा हिङपातेङ दोअ्हि, “ना हाइपालि भोदोङखेना? ना गिखेना? इदोइ द्याङते रोमि नागरिक कि हिनाउ!”
27इदोइ काथा हिङतेङ रोमि पलटनको हाकिम लिअ्ता दुल्तेङ पावलहेङ हिअ्हि, “हाइ ना जातिङकोङ रोमि नागरिक हिन्हा?” पावल दोअ्हि, “एइ।” 28रोमि पलटनको हाकिम दोअ्हि, “काते हेन्जा टाका तिरितेङ रोमि नागरिक जेङका हिघा।” पावल दोअ्हि, “काचाहिँ जोलोमसोङ रोमि नागरिक हिघा।” 29इस्का हिङतेङसाङ पावलहेङ हिअ्लि लोका द्याङगेलाइ पासाइहि। पावल रोमि नागरिक हिलाउ बुङ एसापा झिन्झिरिहोइ धेउलि लागाइकाता इङको रोमि पलटनको हाकिम बुङ थिहि।
पावल बाराकचहरिको आगाता
30यहुदिगेलाइ पावलहेङ हाइपालि दुसिहि, इङको काथा रोमि पलटनको हाकिम गिलि भोघाखे। एन्साजेङलाउ जुम्निदिना वा मुल धामिगेलाइ रो बाराकचहरिको झाराङ सदस्यगेलाइहेङ काइतेङ कचहरि पालि हुकुम पिहि रो पावलहेङ थुनासो ओल्हिपातेङ झाराङको आगाता जाअ्पाहि।
Zvasarudzwa nguva ino
साल्तेङ दिङगिल्का 22: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.