မဿဲ 28
28
ရှင်ပြန်ထမြောက်တော်မူခြင်း
1ဥပုသ်နေ့ကုန်လွန်ပြီးနောက် တနင်္ဂနွေနေ့ နံနက်စောစော#28:1 မူရင်းဂရိကျမ်းတွင် “ရက်သတ္တပတ်၏ ပထမနေ့” ဟု ဖော်ပြထားသည်။ မိုးလင်းစအချိန်တွင် မာဂဒလမာရိနှင့် အခြားသော မာရိတို့သည် သင်္ချိုင်းဂူသို့ သွားကြ၏။
2ထိုအခါ အလွန်ပြင်းထန်သောငလျင် လှုပ်လေ၏။ ထာဝရဘုရား၏ ကောင်းကင်တမန်တစ်ပါးသည် ကောင်းကင်မှ ဆင်းသက်လာ၍ သင်္ချိုင်းဂူဝတွင် ပိတ်ထားသောကျောက်တုံးကို လှိမ့်ဖယ်ပြီးလျှင် ထိုကျောက်တုံးပေါ်၌ ထိုင်လေ၏။ 3သူ၏ မျက်နှာသည် လျှပ်စီးကဲ့သို့ လက်၍ အဝတ်သည်လည်း နှင်းပွင့်ကဲ့သို့ ဖြူ၏။ 4အစောင့်တပ်သားများသည် ကောင်းကင်တမန်ကို မြင်သောအခါ ကြောက်လန့်တုန်လှုပ်၍ လူသေကဲ့သို့ ဖြစ်သွားကြ၏။
5ကောင်းကင်တမန်က အမျိုးသမီးတို့အား “မကြောက်နှင့်။ လက်ဝါးကပ်တိုင်ပေါ်တွင် အသတ်ခံရသည့်ယေရှုအား ရှာနေကြသည်ကို ငါသိ၏။ 6ထိုအရှင်သည် ဤနေရာတွင် မရှိပါ။ မိန့်တော်မူခဲ့သည့်အတိုင်း သေခြင်းမှ ရှင်ပြန်ထမြောက်တော်မူပြီ။ အလောင်းတော်ထားသည့် နေရာကို လာ၍ ကြည့်ကြလော့။ 7ထို့နောက် အမြန်ပြန်၍ ‘ယေရှုသည် သေခြင်းမှ ရှင်ပြန်ထမြောက်တော်မူပြီ။ သူသည် သင်တို့ထက်ဦးစွာ ဂါလိလဲပြည်သို့ ကြွတော်မူမည်။ သင်တို့သည် သူ့ကို ထိုနေရာ၌ တွေ့မြင်ကြရလိမ့်မည်’ ဟူ၍ တပည့်တော်တို့အား ပြောကြလော့။ ငါပြောသောစကားကို မမေ့ကြနှင့်” ဟု ဆိုလေ၏။
8အမျိုးသမီးတို့သည် ကြောက်လန့်ကြသော်လည်း အလွန်ဝမ်းသာ၍ သင်္ချိုင်းဂူမှ အမြန်ထွက်လာကြ၏။ ထို့နောက် ကောင်းကင်တမန်၏ စကားကို တပည့်တော်တို့အား ပြောပြရန် ပြေးသွားကြ၏။ 9ထိုစဉ် ယေရှုသည် သူတို့ရှေ့မှ ပေါ်လာ၍ “မင်္ဂလာပါ” ဟု နှုတ်ဆက်တော်မူ၏။ အမျိုးသမီးတို့သည်လည်း ယေရှုထံတော်သို့ ချဉ်းကပ်၍ ခြေကို ဖက်ယမ်းပြီးလျှင် မြေပေါ်၌ ဝပ်တွားခယလျက် ရှိခိုးကြ၏။ 10ယေရှုက “မကြောက်ကြနှင့်။ သွား၍ ငါ့တပည့်တို့#28:10 မူရင်းဂရိကျမ်းတွင် “ငါ့ညီအစ်ကိုတို့” ဟု ဖော်ပြထားသည်။အား ဂါလိလဲပြည်သို့ သွားရန် ပြောကြလော့။ သူတို့သည် ထိုနေရာ၌ ငါ့ကိုတွေ့မြင်ရကြလိမ့်မည်” ဟု မိန့်တော်မူ၏။
အစောင့်တပ်သားများ သတင်းပို့ခြင်း
11အမျိုးသမီးတို့သည် ထွက်ခွာသွားကြစဉ် သင်္ချိုင်းဂူ အစောင့်တပ်သားတို့သည် မြို့ထဲသို့ ဝင်၍ ယဇ်ပုရောဟိတ်ခေါင်းဆောင်များအား အဖြစ်အပျက်အားလုံးကို ပြောပြကြ၏။ 12ယဇ်ပုရောဟိတ်ခေါင်းဆောင်တို့သည် အကြီးအကဲတို့နှင့် စုဝေးတိုင်ပင်ကာ အစောင့်တပ်သားတို့အား လာဘ်ထိုးငွေအမြောက်အမြားပေး၍ 13“သင်တို့သည် ‘ကျွန်ုပ်တို့ ညအချိန် အိပ်ပျော်နေစဉ် ယေရှု၏တပည့်တော်များက လာ၍ အလောင်းကို ခိုးယူသွားကြပါသည်’ ဟု ထွက်ဆိုရမည်။ 14ဘုရင်ခံက ဤအကြောင်းကို ကြားသိလျှင်လည်း သင်တို့ဒုက္ခမရောက်စေရန် သင်တို့ဘက်၌ ငါတို့ ရပ်တည်ပေးမည်” ဟု စေခိုင်းကြ၏။ 15ထို့ကြောင့် အစောင့်တပ်သားတို့သည် လာဘ်ထိုးငွေကို လက်ခံ၍ သူတို့စေခိုင်းသည့်အတိုင်း ထွက်ဆိုကြ၏။ ထိုစကားသည် ဂျူးလူမျိုးတို့ကြားတွင် ယနေ့တိုင်အောင် ပျံ့နှံ့လျက်ရှိ၏။
မဟာစေခိုင်းချက်
16ထို့နောက် တပည့်တော်ဆယ့်တစ်ပါးတို့သည် သူတို့အား ယေရှုမှာကြားတော်မူသည့်အတိုင်း ဂါလိလဲပြည်ရှိ တောင်ပေါ်သို့ တက်ကြ၏။ 17ထိုတောင်ပေါ်၌ တပည့်တော်တို့သည် ယေရှုကို မြင်သောအခါ ဝပ်တွားခယလျက် ရှိခိုးကြ၏။ သို့ရာတွင် တပည့်တော်တချို့သည် အမှန်တကယ်ယေရှုဖြစ်သည်ကို သံသယဖြစ်ကြ၏။
18ထိုအခါ ယေရှုသည် တပည့်တော်တို့ထံ ချဉ်းကပ်တော်မူ၍ “ငါ့ခမည်းတော်သည် ကောင်းကင်နှင့် မြေကြီးပေါ်၌ ရှိသမျှသော အခွင့်အာဏာအားလုံးကို ငါ့ထံ အပ်နှင်းတော်မူပြီ။ 19ထို့ကြောင့် သင်တို့သွား၍ လူမျိုးအပေါင်းတို့ကို ငါ့တပည့် ဖြစ်စေကြလော့။ ခမည်းတော်၊ သားတော်နှင့် သန့်ရှင်းသောဝိညာဉ်တော်တို့၏အမည်နာမ၌ သူတို့ကို နှစ်ခြင်းမင်္ဂလာပေးကြလော့။ 20သင်တို့အား ငါပေးသမျှသော ပညတ်တော်အားလုံးကို သူတို့အား သွန်သင်လော့။ ငါသည်လည်း ကမ္ဘာကုန်ဆုံးသည့်တိုင်အောင် သင်တို့နှင့်အတူ အစဉ်အမြဲရှိနေမည်” ဟု မိန့်တော်မူ၏။
ရှင်မဿဲခရစ်ဝင်ကျမ်းပြီးပါပြီ။
Zvasarudzwa nguva ino
မဿဲ 28: BCB
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.