Mabikiri 27
27
Pooli bo ta-i Ɔrɔmu
(Korɛntitɔnŋ kiri (2) 11.25–26)
1Waaci bɛɛ na-i so, kí i ǹʼbi tu yi de kwurinŋ ki ru, yi i ta Itali. Kí i Pooli fa nkasudaŋ dama tɔri wɔri surudashi ŋununtiŋ bɛɛ tɛ, nwɔ̀ tɔ wuru tu Yuliyusi. Surudashi kwuru wɔ̀ i dɔri-ra tu « Masa ki wɔ Surudashi kiri », niŋ wuru nini wɔ kapitɛni ki i. 2Kwurinŋ sinaŋ bɛɛ wuru yirira Adaramiti, ŋì i ta-ri Asi sɔɔta ki kwuruntumaŋ kiri ra, yibɛɛ i de niŋ kwurinŋ ki ru. Arisitariki wuru yibɛɛ fan, niŋ wuru Tesaloniki kili ki ru tɔnŋ i, Maseduwanɛ sɔɔta ki ru.
3Niŋ sisarifuluntɔnŋ ki, yibɛɛ i so Sidɔnŋ kili ki ra. Yuliyusi i bi shɔɔrinŋ ma Pooli tɛ niŋ mani nu, ntiŋ i a tu Pooli i ta po awɔ wɔshuru kiri tɛ, nwɔma kí i ntiŋ maku shɔ. 4Yibɛɛ jɔrɔkɔ-i niŋ kili ki ra, yi i de yɔɔ kwurinŋ ki ru, yi i tiri. Ju faninmwuŋ tintiŋ wɔ̀ i dɔri-ra tu Sipirɛ, yibɛɛ i ta de, yi niŋ tu yi nɔrintɛ, sabu faa ki wuru yibɛɛ ŋununafu-a. 5Niŋ ɲaan ki tɛ, yibɛɛ i tu tiri-ra wɛɛlufinju ki sun, yi i ta de Silisi fa Panfili sɔɔta kiri kɛlina, yi i nini tu yi pantɛ. Yi i ta so Mira kili ki ru, ninwɔ̀ i Lisi sɔɔta ki ru. 6Niŋ kili ki ra, surudashi kiri wɔ kapitɛni ki i kwurinŋ tɔri ja niŋ mani nu, niŋ kwurinŋ ki po wuru Alɛkisandiri kili ki ra, ŋì i ta-ri Itali kɛniŋ ki ru. Ntiŋ i yibɛɛ de niŋ kwurinŋ ki ru, yi i tiri.
7Faa wɔ̀ wuru yibɛɛ ŋununafu-a, niŋ baraka pyiri wuru-i. Niŋ i niŋ kwurinŋ ki suu-ri bili sun. Niŋ ɲaan ki tɛ, yibɛɛ i jibi mwɔɔnna ma kwurinŋ ki ru, yi i waa-ri so-i Kinidi kili ki kilennu. Faa ki yibɛɛ suu wuru ta sun jɛŋ niŋ kili kɛlintɛ. Niŋ na, yibɛɛ i de Salamone kili ki ra, yi Kɛrɛti ju faninmwuŋ tintiŋ ki tu yi fa faa ki faninmwuŋ. 8Niŋ mani ki ru derama ki furu wuru kusɛbɛ. Yibɛɛ i ta so mani bɛɛ ru, nwɔ̀ tɔ i tu Kwuruntumaŋ Shɔɔrinŋ ni, niŋ mani ki i Lasi kili ki tɔntɛ. Yibɛɛ i tu niŋ mani nu.
9Yibɛɛ cin wuru yɔɔ saa ki fan kɔ, fɔ Yawutu kiri wɔ sunŋ de jibi ki fɔn i na fwuude, shii sinaŋ ki waaci ki i so, niŋ ɲaan ki tɛ ju fan tiri ki i na ji yɛri bomaanna beŋ nu. Niŋ ki ra, Pooli i konaŋ ki racin tu : 10« Ńʼwɔ wɔshuru ri, míŋ ɲaniŋ i ǹʼna ńʼtu ka tiri ka ra ji yɛri bomaanna beŋ nu, a yibɛɛ yi tɔɔn yi i de kwurinŋ nu tu yi i tiri-ra, kwurinŋ ki fa a ciiru finŋ kiri bantenŋ li bi ki i kì, yibɛɛ kiri yɛrima kiri ɲini kiri ra so tu-i ǹʼnu. »
11Nka surudashi kiri wɔ kapitɛni ki i bili kwurinŋ tiŋ kiri fa ǹʼbilitɔnŋ kiri wɔ wulu kiri ra, ŋì i fwuu Pooli wɔ ki sun. 12Niŋ kwuruntumaŋ ki shɔ-ri shii waari ki ru kì. Niŋ ki ra, kwurinŋ ki ru konaŋ kiri ru, koŋ mwɔɔnna i arì tu, tu kwurinŋ ki po san nmaŋ, a ǹʼji a so ma-i. Kí wuru ǹʼtɛ tu arì i arì banba, arì i tiri Fenikisi kili ki ra, arì i ta shii waari ki ma niŋ mani nu. Niŋ i Kɛrɛti kɛniŋ ki kwuruntumaŋ ki bɛɛ, nwɔ̀ ɲaannu pwulu ta-i sunfyirimwuŋ.
Faa sinaŋ bɛɛ jɔrɔkɔ-i ju ki sun
13Waaci wɔ̀ ru, shii fili bɛɛ na-i ji po-a, niŋ na, kíbɛɛ cirasun tu arìbɛɛ ra so tiri-i. Kí i kwurinŋ ki kanŋ cɛn#27.13 Pee sinaŋ bɛɛ i nmaŋ, yaa kɔlimaan i ji niŋ na, a kí ji ǹʼtɛ kwurinŋ ki i tu mani wɔ̀ ru, kí i niŋ pee ki kee bo-a ju ki ru, a niŋ ma kwurinŋ ki i tu-a. A kí na ji ǹʼtɛ kwurinŋ ki i tiri, kí i pee ki cɛɛn po san-a ju ki ru, kí nʼbo kwurinŋ ki ru. A niŋ ma kwurinŋ ki i a kanŋ cɛn-a.. Kí i kwurinŋ ki bili ta-ri Kɛrɛti tintiŋ ki tonfan nmaŋ. 14Nka, ǹʼcin kì, faa sinaŋ tɔri i yiri Kɛrɛti tɔnŋ kiri ru, niŋ i na bo yibɛɛ sun. Niŋ faa ki tɔ ki i tu Erakilɔn. 15Niŋ faa sinaŋ ki i na kwurinŋ ki shi. Yibɛɛ tu yi a kwurinŋ ki pwulu na tintiŋ ki tonfan ɲaan woo ɲaan tɛ, faa ki baraka i pyiri yibɛɛ sun, ǹʼna shɔ kì, yibɛɛ i yi fa kwurinŋ ki tu faa ki gbɛ nmaŋ, ŋì i yibɛɛ shi tiri.
16Yi i ta fwuude ju faninmwuŋ tintiŋ pyaanŋ bɛɛ kɛlina, nwɔ̀ tɔ i tu Kiloda, yi i niŋ de yi fa faa ki faninmwuŋ. Kwurinŋ pyaanŋ wɔ̀ kɔli wuru kwurinŋ sinaŋ ki ra, faa ki i niŋ fɛɛn ju ki ru. Yibɛɛ waa-ri niŋ po san-i ju ki ru. Yi i na yi banba, yi i so ǹʼpo-i, yi i ǹʼbo kwurinŋ sinaŋ ki ru. 17Yibɛɛ kwurinŋ pyaanŋ ki bo-i kwurinŋ sinaŋ ki ru waarinŋ wɔ̀ ru, yi i kwurinŋ sinaŋ ki kɔli a faninmwuŋ yaa ri ra, nwɔma ŋì fa waa san amaŋ na kì. Kwurinŋ bilitɔnŋ kiri wuru kɛni-na, tu faa ki a kwurinŋ ki shi, ŋì i ta ǹʼfyiri ɲɛniŋ maŋ ki ru Libi kɛniŋ ki ru. Niŋ ki ra, juulinŋ wɔ̀ri i kwurinŋ ki ta-a jɛŋ, kí i nini pili, kí i yi tu faa ki gbɛ nmaŋ, ŋì i tiri-ri yi wu.
18Nka, faa ki i tu ŋì i juu na-ni yibɛɛ sun, fɔ ǹʼna shɔ kì, niŋ sisarifuluntɔnŋ ki, kí i kwurinŋ ki ciiru finŋ kiri bɛɛ ri kee bo ju ki fan. 19Ǹʼsunŋ byantɔnŋ ki, kwurinŋ bilitɔnŋ kiri yɛrima kiri i kwurinŋ ki ra finŋ shɔɔrinŋ kiri bɛɛ ri kee ju fan sɛbɛ. 20Sunŋ dama ma-i, sunŋ po kì, sɔriniŋ ni po cii ki ru kì, faa ki, niŋ i juu na-ni. Niŋ ɲaan ki tɛ, ŋì i na yi bataa gbɛɛratɛɛ, yi tu yibɛɛ tɔri tenŋ na yi mwu kili kì.
21Kwurinŋ ciiru tɔnŋ kiri bataa i jibi mwɔɔnna ma nufinŋ nubali. Niŋ ki ra, Pooli i jɔrɔkɔ tu konaŋ ki faninmwuŋ, ntiŋ tu : « Ńʼwɔ wɔshuru ri, a ábɛɛ ji-ri á tɔɔnye-ri míŋ tɛ, yi i tu Kɛrɛti, yibɛɛ wuru-ra ji yɛli-la ka ɲaan ka tɛ fɔ yi i bɔni yɔɔ kwurinŋ nu finŋ kiri bataa ru kì. 22Nka dɔɔ, míŋ a ǹʼbi ábɛɛ tɛ ńʼtu, á á tɔnnafuru. Ábɛɛ bataa ra á mwu, kwurinŋ ki bantenŋ a li. »
23Pooli tu kí tɛ sɛbɛ : « Míŋ i Kirinŋ wɔ̀ wɔ, ŋí i baara ki ma-ni ǹʼtɛ, ǹʼwɔ mɛlɛkɛn ki bɛɛ a yɛri ji-i míŋ wu cii ki ru, ŋì i na ǹʼbi míŋ tɛ tu : 24‹ Pooli, fa kɛni kì, waajibi yɛ miŋ i so Ɔrɔmu masa sinaŋ ki, Sensaari tɛ. Niŋ ki ra, koŋ woo koŋ i miŋ fan kwurinŋ ki ru, Kirinŋ a miŋ fa nini bataa mwu awɔ shɔɔrinŋ ki baraka ra. › 25Niŋ ki ra, ńʼwɔ wɔshuru ri, á á tɔnnafuru. Míŋ bili-i ǹʼna, tu mɛlɛkɛn ki wulu wɔ̀ bi-i ńʼtu Kirinŋ a ninki ma. 26Nka yibɔɔ kwurinŋ ki a ta li, ŋì i yibɛɛ kee bo ju faninmwuŋ tintiŋ bɛɛ sun. »
27Yibɛɛ wuru wɛɛlufinju wɔ̀ sun, niŋ tɔ ki i tu Adiriyatiki. Yibɛɛ cii bwununpyiiraŋ ma wuru ju ki sun, faa ki i ji faa yi fifa de-a. Niŋ cii bwununpyiirantɔnŋ ki wɔkila ki ru, kwurinŋ bilitɔnŋ kiri wuru ǹʼbi-a tu yibɛɛ fa tankpiŋ ki bɛɛ nari kì. 28Kí i ju ki cuuka ki ki yaa ra, kí i ǹʼja tu ǹʼcuu fɔ mɛtɛri kɔniŋ fa bwununjɔnpɔni (37). Kí i ta jɛŋ, kí i ǹʼki sɛbɛ, kí i ǹʼja tu ǹʼcuuka ki mɛtɛri kɔniŋ fa fulupɔni (28) niŋ mani nu. 29Kɛmi i de kí ru, tu kwurinŋ ki cɛ ki fa na ta fali, faa kiri bɛɛ ri ra ju ki cɛru kì. Niŋ ki ra, pee pwunmaan wɔ̀ri i kwurinŋ ki tu-a, kí i niŋ pyiiraŋ jɛri ju ki ru kwurinŋ ki kɔɔtɛ, kí i sɔɔ kí i waa-ri sisari ki ra.
30Konaŋ kiri sɔɔmaan ki tu-i, kwurinŋ bilitɔnŋ kiri i kwurinŋ pyaanŋ ki po bo ju ki ɲaanna, kí i ǹʼji miŋ tu arì ra kwurinŋ ki tu pee pwunmaan ki bɛɛ bo ju ki ru kwurinŋ ki jɛŋ, nka kí wuru ǹʼtɛ arì i bili.
31Pooli kí ja-i waarinŋ wɔ̀ ru, ntiŋ tu surudashi kiri wɔ kapitɛni ki fa surudashi pyɛ kiri tɛ tu : « A kwurinŋ bilitɔnŋ kiri tu kwurinŋ ki ciiru kì, ábɛɛ ra á mwu kì dɛ. »
32Surudashi kiri i arì tu Pooli wɔ wulu ki ra, niŋ ɲaan ki tɛ, kí i kwurinŋ pyaanŋ ki yaa kiri tɛri san kwurinŋ sinaŋ ki ra, kí i ǹʼfɛɛn wɛɛlufinju ki ru nmaŋ.
33Sisarimantɔnŋ ki jɛŋ, Pooli i konaŋ ki tɔnnafuru, ntiŋ i kí rafɛ tu kí nufinŋ nu. Ntiŋ tu kí tɛ : « Ábɛɛ sunŋ bwununpyiirantɔnŋ ki i kaa, á ɲakili kiri sɔɔmaan i kì, á dumiŋ nufinŋ nu-a kì. 34Niŋ na, míŋ i ábɛɛ rafɛ-a, á nufinŋ nu. Ninki a ji sababu, ábɛɛ i baraka kila, á i á mwu. Hali ábɛɛ tɔri tenŋ ŋununshinŋ daŋ tenŋ a fɔni kì. »
35Pooli kɔ-i awɔ wulu ki ra waarinŋ wɔ̀ ru, ntiŋ i bwuru ki bɛɛ shi, ntiŋ i baraka bi Kirinŋ tɛ kí bataa ɲaanna, ntiŋ i ǹʼnayali taa-ri. 36Koŋ pyɛ kiri niŋ ja-i waarinŋ wɔ̀ ru, kí i tɔnnafurubi kila, kí yɛrima kiri i nufinŋ nu. 37Yibɛɛ wɔ̀ri wuru kwurinŋ sinaŋ ki ru, yibɛɛ bataa wuru koŋ yaabwununbyaŋ fa bwununtaanmani (276). 38Yi bataa nufinŋ ki nu-i yi i pyii waarinŋ wɔ̀ ru, kí i bilanaŋ pyɛ ki kee ju fan, ǹʼbɛɛ i san kwurinŋ ki pwunka ki ra.
Ju ki kwurinŋ sinaŋ ki li-i
39Niŋ ɲaan ki tɛ, si ki na-i sari, kwurinŋ bilitɔnŋ kiri tamaŋ tɔ arì yɛri ra kì. Kí wuru mani wɔ̀ tenŋ nu, kí niŋ tɔ-ri kì. Kí i tu kí i tintiŋ bɛɛ ja, ju saa bɛɛ i ta-ri niŋ na. Kí tu arì ra ta shɛɛli kwurinŋ ki wu niŋ mani nu. 40Niŋ ɲaan ki tɛ, kí i pee pwunmaan kiri ra yaa kiri pili, kí i yìrì tu ju ki ru nmaŋ. Kí i kwurinŋ ŋununapwulu bali ki kɔli yaa kiri bataa pili sɛbɛ, nwɔma arì i so ǹʼbili-i. Niŋ kɔɔtɛ, kí i kwurinŋ ki ra juulinŋ sinaŋ ki rupili tunpa kɔli kwurinŋ ki jɛŋ, nwɔma faa ki i so ǹʼshi tiri-i, kí i tiri-ri tintiŋ ki maŋ ki ru. 41Nka pyaanniŋ, kwurinŋ ki cɛ ki i ta sɔɔ ɲɛniŋ ki sun, jukwululuŋ fuuli ŋununfumaŋ bɛɛ ru. Kwurinŋ ki jɛŋ ki i fyiri ɲɛniŋ ki ru, ǹʼso po-i kì, jukwululuŋ kiri i kwurinŋ ki kɔɔtɛ ki bwɔ yali-li.
42Surudashi kiri niŋ ja-i waarinŋ wɔ̀ ru, kí wuru ǹʼtɛ arì i nkasudaŋ kiri bwɔ kilɛn, nwɔma ǹʼbɛɛ ri fa na arì fɛɛn ju ki ra, kí i ǹʼtɛri po, kí i bili tiri kì. 43Nka surudashi kiri wɔ kapitɛni ki wuru ǹʼtɛ kí i Pooli kilɛn kì. Niŋ ki ra, ntiŋ a tu surudashi kiri wɔ ɲakilila ki ra kì. Ntiŋ tu nwɔ̀ri ji ju tɔ-a, tu kí arì kee ǹʼna ǹʼjɔnɔ, kí i ǹʼtɛri tiri tankpiŋ ki ra. 44Tu koŋ pyɛ kiri i arì lɔ jirinŋ fɛrinŋ ni, walima kwurinŋ ki kɛlinŋ kiri bɛɛ ri ra, tu kí i arì banba, kí i po nini na. Kí i ǹʼma ninkunŋ, konaŋ ki bataa i so tankpiŋ ki ra, finŋ tɔri ǹʼtɔri tenŋ kila kì.
Zvasarudzwa nguva ino
Mabikiri 27: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.