Korɛntitɔnŋ kiri (1) 5
5
Korɛnti egilisi ki ciiru bi nɔɔmaan ki
1Yibɛɛ i ǹʼnama de-a mani mwɔɔnna nu, tu nankulunbi ki ma-a ábɛɛ kanfɛ, nwɔ̀ bishi yɛri ma-a shiya tɔri kiri kanfɛ kì, tu ábɛɛ ru, tu ǹʼbɛɛ a jitiŋ wɔ mari shi ji awɔ. 2Niŋ fa a fɔn na, ábɛɛ i ji faa á yɛri rakali-la! Niŋ bi ki kakan wuru-i niŋ i ábɛɛ ŋununshuuli, nwɔma konwɔtiŋ niŋ bijɛ ki ma-i, niŋ i kwɔ po san ábɛɛ kanfɛ. 3Míŋ ábɛɛ kanfɛ nmaŋ kì, nka míŋ ciiru ɲakili ki i ábɛɛ fan. Míŋ kiti ki kwuru-i nintiŋ sun kɔ miŋ tu míŋ a ji ábɛɛ kanfɛ.
4A manja tan Yesu tɔ ki bira, míŋ ɲini ki a ji ábɛɛ fan. Ŋuntiŋ Yesu wɔ sotinbi ki a tu yibɛɛ fan. 5Niŋ koŋ kwuru ki kakan-i ntiŋ i wɔri shitaanni tɛ, ntiŋ firi ki i haliki, nwɔma ntiŋ ɲini ki i a mwu Ŋuntiŋ Yesu ki na shikaŋ ki ru.
6Ábɛɛ ragbɛ ŋuŋ ki shɔ kì dɛ! Ábɛɛ ǹʼtɔ tu lenfe pyaanŋ ki fani nusumaan mwɔɔnna bataa tuutuu-ra kì wa? 7Niŋ ki ra, á niŋ bijɛ ki bataa po san á kanfɛ, nwɔma á i ji miŋ tu fani ŋunaŋ nusumaan ni, lenfe bo nwɔ̀ri ru kì. Ábɛɛ fɔɔmaan ni yɛ miŋ tu fani lenfe bali li, sabu Kirisa kilɛn-i, ntiŋ i ji yibɔɔ jonbikɔ ki saraka ki i.#Pobi ki 12.3–11. 8Niŋ ɲaan ki tɛ, yi fa niŋ ɲaannabyɛ ki ma bwuru wu lenfe bwuumaan ki bo-i nwɔ̀ ru kì, ninwɔ̀ i juubi ki fa kakaalibi ki i. Nka yi ɲaannabyɛ ki ma bwuru wu lenfe bo nwɔ̀ ru kì, ninwɔ̀ i fɔɔbi fa sɛli ki i.
9Míŋ ǹʼbi-i ábɛɛ tɛ ńʼwɔ sɛbɛ tɔri ru, ńʼtu á fa nankulinŋ kiri fa dɛbɛ bi tɔri tenŋ sun kì. 10Míŋ ka juniɲa ka ru nankulinŋ kiri fa a ru fyikatiŋ kiri fa a ru kwunŋ kiri fa a ru pɛli tantɔnŋ kiri wulubi-a kì dɛ! A nini wulu ji wuru-i, ábɛɛ wuru-ra ji po san-a juniɲa ki ru.
11Míŋ i nwɔ̀ bi-a, niŋ i kaa : Konwɔtiŋ ǹʼbi-a tu afinŋ bilinatɔnŋ i, ntiŋ i ji nankulinŋ i, walima fyikatiŋ i, walima pɛli tantɔnŋ i, walima koŋ tɔ bitɔnŋ i, walima lɔ mwunutɔnŋ sinaŋ i, walima kwunŋ i, ńʼtu á fa nintiŋ fa dɛbɛ bi tɔri tenŋ sun kì. Á fa niŋ bishi konaŋ ki fa hali nufinŋ nu ámaŋ fan kì.
12-13Ábɛɛ cirasun tu míŋ kiti ki kwuru-ra taannatɔnŋ kiri sun wa? Aayi, Kirinŋ i nini wɔ kiti ki kwurutɔnŋ ki i. Ábɛɛ ǹʼtɔ tu ábɛɛ fa koŋ wɔ̀ri i ámaŋ fan, tu ábɛɛ kakan á i kiti ki kwuru nini sun kì wa? Á ǹʼma miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ tu : « Á bi kulinŋ matɔnŋ ki kwɔ po san á kanfɛ. »#Sariya kiri 17.7.
Zvasarudzwa nguva ino
Korɛntitɔnŋ kiri (1) 5: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.