Korɛntitɔnŋ kiri (1) 2
2
Pooli wɔ waajulu ki Korɛnti kili ki ru
1Ńʼtindaŋ ni, míŋ ta-i ábɛɛ tɛ waaci wɔ̀ ru, míŋ ta ǹʼji ábɛɛ wu tu míŋ wulu tɔ-a ŋí i fwuu koŋ bataa sun kì, walima ńʼtu míŋ ɲakilitiŋ i, ŋí i fwuu koŋ bataa sun kì dɛ! Miŋ ta-i Kirinŋ wɔ gonto ki bi ábɛɛ tɛ, 2sabu míŋ ǹʼbo wuru ńʼciiru, ńʼtu ŋì i míŋ tu ábɛɛ kanfɛ, ńʼtu míŋ a finŋ tɔri bi ábɛɛ tɛ Yesu Kirisa bi ki fa ntiŋ wɔ kpinkpi suu sun beŋ ki bantenŋ ciniŋ kì. 3Niŋ fa míŋ wuru ábɛɛ kanfɛ waarinŋ wɔ̀ ru, míŋ baraka ki kuru wuru ńʼyɛri ɲaanna, ŋí i kɛni-ni, ŋí i sɛrɛsɛrɛ-ri. 4Mɔ́ɔ́n wulu ki fa ńʼwɔ waajulu ki wuru konaŋ wɔ ɲakilitinbi wulu kì, nka Ɲiniwɔlinŋ ki wɔ so ki wuru ǹʼji-a wulu u, koŋ wuru-ra so a gbɛ bili-i nwɔ̀ sun. 5Nwɔma ábɔɔ bilinabi ki cɛ fa sɔɔ konanmini wɔ ɲakilitinbi wulu sun kì, nka fɔ ǹʼcɛ sɔɔ Kirinŋ wɔ sotinbi ki sun.
Kirinŋ wɔ ɲakilitinbi ki bi ki
6Nka nwɔ̀ri tiri-i jɛŋ bilinabi ki ru kɔ, yibɔɔ waajulu ki i ɲakilitinbi i nini ɲaanna. Niŋ ɲakilitinbi ki fa juniɲa wɔ ki tenŋ i kì, ǹʼdumiŋ fa ka juniɲa ka ŋununtiŋ kiri wɔ ki tenŋ i sɛbɛ kì, niŋ ŋununtiŋ kiri bataa i kɔ-a. 7Nka yibɛɛ i Kirinŋ wɔ ɲakilitinbi ki sunjo-a konaŋ ki tɛ, niŋ i gonto o, ninwɔ̀ radumaan yɛ juniɲa nu konaŋ kiri sun. Kabi juniɲa tɔnpa ki jɛŋ, Kirinŋ niŋ ma sɔɔ wuru yibɛɛ jɛŋ, nwɔma yibɛɛ i na so awɔ nɔɔri ki kila-i. 8Ka juniɲa ka ru ŋununtiŋ kiri tɔri ka ɲakilitinbi ka tɔ kì, kí ji wuru ǹʼtɔ-ri, kí wuru-ra Ŋuntiŋ nɔɔritiŋ ki kpinkpi suu sun kì. 9Miŋ tu ǹʼsɛbɛ-i Kirinŋ wɔ wulu ki ru tu :
« Konanmini ɲaniŋ finŋ wɔ̀ri ja kì,
ntiŋ tɔɔn wulu wɔ̀ri rama ja kì,
bi wɔ̀ri jɛri ntiŋ ɲakilila sun kì,
Kirinŋ niŋ finŋ kiri ramɔni-i kpeeri tɛ, ǹʼbidi-i nwɔ̀ri tɛ. »#Esayi 64.3.
10Niŋ ɲaan ki tɛ, Kirinŋ niŋ finŋ kiri ji-i yibɛɛ wu Ɲiniwɔlinŋ ki baraka ra. Ɲiniwɔlinŋ ki i bi kiri bataa rufɔɔ-ra, fɔ ŋì i ta so Kirinŋ wɔ gonto sinaŋ kiri sun. 11Koŋ tɔri tenŋ so-a konanmini ciiru tɔ-i kì, duu ntiŋ ɲini ki yɛrima kì. Mìŋ ɲaan tenŋ ki tɛ sɛbɛ, koŋ so-a Kirinŋ wɔ bi kiri tɔ-i Kirinŋ ɲini ki ciniŋ kì. 12Yibɛɛ ɲini wɔ̀ kila-i, niŋ ka juniɲa ka wɔ kì, niŋ po-i Kirinŋ nu, nwɔma Kirinŋ kafinŋ wɔ̀ri wɔri-i yibɛɛ tɛ, yi i nini tɔ. 13Yibɛɛ ninki sunjo-a yi i ǹʼkɛɲɛ konanmini wɔ ɲakilitinbi wu kì, duu Kirinŋ Ɲiniwɔlinŋ ki i nwɔ̀ ji-a yibɛɛ wu. Ɲiniwɔlinŋ ki i nwɔ̀ri gbɛ, niŋ bi kiri i ji-a nini wu Ɲiniwɔlinŋ ki wɔ wulu ki wu. 14Ɲiniwɔlinŋ ki konwɔtiŋ gbɛ kì, nintiŋ a tu-a ǹʼwɔ bi kiri ra kì, sabu ntiŋ i yìrì ji-a maannikɔnɔbi i. Ntiŋ yɛri so-a yìrì ɲaantɔ-i kì, sabu koŋ so-a Kirinŋ wɔ bi kiri ɲaantɔ-i Ɲiniwɔlinŋ ki bantenŋ baraka ra. 15Ɲiniwɔlinŋ ki i konwɔtiŋ gbɛ, nintiŋ i so-a bi bataa ɲaanpo san-i amaŋ nu, nka koŋ so-a ntiŋ wɔ kiri ɲaanpo san-i amaŋ nu kì. 16Sabu ǹʼsɛbɛ-i Kirinŋ wɔ wulu ki ru tu :
« Nkɛnŋ Ŋuntiŋ ki ɲakilila bi kiri tɔ-a,
ntiŋ i ǹʼbi tu afinŋ a ǹʼnacin? »#Esayi 40.13.
Nka Kirisa ɲakilila ki i yibɛɛ ciiru.
Zvasarudzwa nguva ino
Korɛntitɔnŋ kiri (1) 2: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.