Kèʼlo 38
38
Kimfèr ke Juda wùn Tamar
1Wáa dzə e ghan see shooy, Juda nèn màʼtì afə́r və́, e dù, a dzə wùn wìr woó Adullam wùmòʼ wo yírí‑iì dzəə̀n ji Hira. 2Juda lòo dzə fo bèy, e yèn wánlè ŋgòn woó Kanan wùmòʼ wo tàr wov‑iì dzəə̀n Shua, e wày é lav. Wùn wun shiíy, 3wù bóŋ bvəm, e fùm wán lumèn. Juda shù yír ji Er. 4Wiíy kfən bòŋ bvəm yímóʼó, e dzə̀ə́ wán lumèn, nen shù wun yír woo shooy ji Onan. 5Wù kfən siì bòŋ bvəm, e dzə̀ə́ wán lumèn, e nèn shù yír ji Shela. Vé‑eè dzə̀ə́ Shela, a Juda dzə̀ é kirə̀ʼ kímóʼ kí, aá yoŋ ji Kesiv.
6Er woo wan Juda wo mbìy kúy, wù nəə́ wiíy, e fò shó, aá yoŋ ji Tamar. 7Er nèn dù fəə̀ é nyàm kwaʼ, a yiì joonè, kí wáa ten Nyùy Tàr. Nyùy Tàr nèn yiì, wù kpú. 8Mo wù kpuun bey, Juda suúy e Onan jii, «Lèm wiíy və̀n, é vèn wun wáa dzəə́ wón, áà bóo fíʼ dzəə́ njìlaʼ ŋkfə fər wò.» 9Onan kiíy ji wun bèn sí lem a dzə̀ á vitsə́ʼ vé ŋkfə fər və, wù lóo lì wiíy və̀n, wù nèn a fəə́r shindzə́v a dzə̀ é kwaʼ ji lá ŋkfə fə̀r yòʼ wìy a ker a wán. 10Joonè wo Onan‑eè yiìn və́ne bír Nyùy Tàr é ŋàŋ, wù nèn yiì, Onan kpú sá. 11Juda nèn sùúy e Tamar woo wiiy ŋkfə wan və woo Er jii, «Dù, a dzə wún wóo vèn tàr won ji wiiy ŋkfə, e meé e ghan se wan wom woo Shela wíy kuy.» Wù‑uù wóvri bèy, bìʼ fo wù‑uù fan ji Shela kfə̀n yíi kpu a mo afə́rí‑iì kpukin. Tamar nèn dù, a dzə wùn tàr wov.
12Viyá vi lòo shaà, yeè lav Juda woo wan Shua və̀y nèn màʼtì sa wun. Wù dìy kpú, e màysì, wùn ŋkar rə yee Hira woo wír woó Adullam lò, e kòʼ é Timnaa fo vé‑eè kóm wuy anjìi Juda. 13Wìr nyáʼtí, e sùúy e Tamar jii, «Tàr à ŋkfə lum wò yíi a shaà, a koʼ e Timnaa fóo dù, e kom wúy anjiì və́.» 14Wù yú bey, e shòʼtí ndzə̀y sé kpu se wù‑uù maʼà, e sə̀tí sí rə́ e ndzə̀y sí ji lá wìr yòʼ kìíy a wun, e nèn dzə̀ʼə̀m e dzəə ye yì nəə e Enayim, tósin, du e Timnaa. Wù‑uù yii bèy, bìʼ fo wù‑uù kiiyin ji wan Juda bàm woo Shela kùy á ne, kitàr kí tén fo wù lem wun.
15Juda wìy, e tò e wiíy və̀y wùn, a kwàʼ ji dzə̀ á sàkì, bìʼ fo wù‑uù sətin sí rə́. 16Wù nèn tùmsín e kibàr ke dzəə fo wù‑uù dzə́, e sùúy sho jii, «Wòsò ku dù, e shìíy.» Wù‑uù suuy bèy, a bó wù yòʼ‑oò kì ji dzə̀ á wiiy ŋkfə wan və.
Wiíy dzə́r shó jii, «A wòsò shìíy, à kaànè mo é le?»
17Juda suúy jii, «M yíi tsənsí wan bvəy e wò.»
Tamar kfən dzə̀r shó jii, «À lo tiír a dzə̀ ka e mò, e bóo dù, e tsənsí?»
18Juda dzə́r jii, «À kì leey ké ji dzə̀ m tìír ka e wò?»
Tamar bìnèr jii, «Tiír ŋwey vifa yee wò kilòŋ ye yí kér kifin ké, à kitoómé ké ki.» Wù fó vifá vìn sho, wùn wun shiíy, wù nèn bòór. 19Tamar kfə́n fó laʼ, e shòʼ ndzə̀y se wù‑uù sətin kitú sho sìy, e siìr sé vikǐy ŋkfə e wùn.
20Juda siíy kfə́, e tàʼ wan bvəy, e tùm ŋkar rə yee wír woó Adullam rə̀y ji wù du, e fò á e wiíy və̀y, e sə̀ vifá ve wù‑uù tiirin shó. Wù dù, e tàʼ ntéŋ. 21Mo wù tàʼàn ntéŋ, e dzə̀r e vilum veé kiliŋe jii, «Sàkì#38.21: sàkì: Ke kí dzəə̀n é Lǎm Hibru ki dzə̀ jii, sàkì woó virə̀ʼ vé anyùy, a kí din a dzə̀ jooně kineŋ wo wír veé Kanane‑eè yii bìʼ anyùy vév. (Leéy: Jov 36.14). wo wù‑uù dzə́ e dzəə yeé Enayim bèé?»
Á bìnèr jii, «Sàkì yòʼ yii dzə́ e gwaané fen.»
22Wù bìnkìr, e kfə̀n, e sùúy e Juda jii, «M dù ne, e tàʼ ntéŋ, e dzə̀r, vilum vee fóo sháʼnín ji bó sàkì yòʼ yii dzə́ a aáwuné gwaané.»
23Juda bìnèr jii, «Bòŋ, aá maʼti vifá vee shooy sho. Wòsò dzə̀ a múm ji á fó bvə́y rə, e bóo tàʼ wun ntéŋ. Aá kfə̀n fó, wíri kiíy nsàv, é ntèʼ wáa sheʼ wòsò.»
24Ŋwee shaà moo taár bèy, shinyáv shí nyáʼtí, e sə̀mrì e Juda jii, «Yeè lav ŋkfə wan wò woo Tamar ghàn ne visàkì, e bòŋ bvəm.»
Juda suúy jii, «Vèn səŋ, e fə̀ə́r e kirə̀ʼ ké kitar, e tòn, é wù kpú.»
25Á lòo dù sho e kisəə, wù tsə́nsí vifá ve Juda‑aà tiirin e wun, e kfə̀n tiìsí ntum fo ghaŋ ji tàr à ŋkfə lum və leéy ó a ji ŋwey vifa rə̀n, wùn à kitoómé kí sà dzə̀ ké la á? Bòór a ŋgaà vifa vee shoon wun.
26Á dù, e dìn, Juda leéy, e kìíy. Lámé kèʼ, a boorí, wù wáa suúy jii, «Wiíy və̀n dzə̀ wir suuyrú, e shaà mo, bìʼ fo bó m yòʼ‑oò lo fò wun ji wan wom woo Shela lem.» Bó Juda yoʼ dzəə shìíy e Tamar, e kèʼ fo kishiíy fóo fèy.
27Ghán se wù‑uù yíi dzəə́ si gheén, á nèn yèn ji wù waà yíi san a wón. 28Wù kèʼ, e lòo lum, wàn woo mòʼón fəə́r kóy fo ndzə, máŋkooy ghár, e sə̀ə́y làv wo baar shó, e yòŋ ji woo shooy dzə̀ á wo mbìy. 29Wù kfən siìr kóy və́ é bàm, fə̀r nen fəə̀ fó mbìy. Máŋkooy njàʼàm jii, «Ábáy, á mo à toʼon ké dzə́ə a?» Wù nèn shù yír woo shooy ji Peres#38.29: Peres: Nsàv yìr rən dzə̀ jii, «tóʼ, e fəə̀.». 30Fə̀r və̀y nèn fəə̀ lèn e làv wo baar é koy, á shù rə́ yee yír ji Sera#38.30: Sera: E Lǎm Hibru, yír rə́ne koó fo kisuŋnìn moo kinyo kee jii, «mbàʼ ye baar yeé kintoshùy.».
Zvasarudzwa nguva ino
Kèʼlo 38: LNB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2022 CABTAL