मत्ती 5
5
यीसू गो प्हाड़ पर उपदेस
1यीसू जद मोटी भीड़ नै देखगे प्हाड़ पर चडगे बेठग्यो। अर बिनै मानण आळा सारा बिंगै कनै आया। 2जद यीसू बानै उपदेस दियो।
धन्य बचन
(लूका 6:20-23)
3“धन्य है बे झिका मन गा दीन है।
सुरग गो राज बां खातर है।
4धन्य है बे झिका दुख करै।
परमेसर बानै होंसलो देवै।
5धन्य है बे झिका दीन है
क्यूंकै बे धरती गा अधिकारी होवैगा।
6धन्य है बे झिका नीती कानी भूखा अर प्यासा है।
परमेसर बानै धपावैगो।
7धन्य है बे झिका दया करै है
क्यूंकै दया बां खातर सुरग ऊं बरसैगी।
8धन्य है बे झिका मन में खोट कोनी राखै।
बे लोग परमेसर नै देखैगा।
9धन्य है बे झिका मेळ मिलाप कराण आळा है,
बे परमेसर गा बेटा कुहासी।
10धन्य है बे लोग झिका आच्छै कामां खातर सताया जावै
क्यूंकै सुरग गो राज बांगो ई है।”
11“अर धन्य हो थे क्यूंकै मेरै खातर लोग थारी बेजती करै, दुख दैय अर थारै पर झूठो दोस लगावै है। 12सुरग में थारै खातर एक मोटो फळ है। थे बिं खातर भोत आनंद मनाइयो अर मन में राजी होईयो। क्यूंकै जिंया अब थानै लोग तंग करै है बिंयाई पेलां परमेसर गी बात बताण आळा नै बी तंग करया हा।”
लूण अर चानणो
(मरकुस 9:50; लूका 14:34,35)
13“थे सारी मिनख जाति खातर लूण तरियां हो। जे लूण गो स्वाद बिगड़ जावै तो बो कीं काम गो कोनी रेवै अर बिनै बारै फेंकणो पडै़ अर लोग बिंगै उपर पग मेल गे टिपै। 14थे संसार गो चानणो हो। एक हिस्यो नगर प्हाड़ गी चोटी पर बसेड़ो होवै बो लुकै कोनी। 15लोग दीयो जगागे बालटी नीचै कोनी मेलै। पण बिनै आळै में राखै झिकै ऊं सारा नै चानणो मिलै। 16लोगां गै सामै थारो चानणो इंयाई चमकै कै लोग थारै आच्छा कामां नै देखगे थारो पिता परमेसर झिको सुरग में है बिंगी बडाई करै।”
नेम विधान गी सिक्सा
17“थे ओ ना सोचो कै मैं मूसा गो नेम विधान अर परमेसर गी बात बताण आळां गी लिखेड़ी बातां नै खत्म करण आयो हूं पण मैं तो बांगी बात पूरी करण आयो हूं। 18मैं थानै साची केऊं जद तांई धरती आसमान खत्म ना हो'ज्यै मूसा गै नेम विधान गी एक एक बात पूरी होण तांई बणी रेवैगी। 19ईंखातर आ आग्या मू कोई घटागे बधागे सिखावैगो तो बो सुरग में छोटो मानिज्यैगो। पण झिको आं पर चालगे अर दूसरां नै चालण खातर सिखावैगो बो सुरग में सारां ऊं मोटो मानिज्यैगो। 20मैं थानै साची केऊं कै जद तांई फरीसियां अर नेम विधान सिखाण आळा लोगां गै धरम ऊं आ'गै ना निकळया तो सुरग गै राज में कोनी जा सकोगा।”
रीस अर हत्या
21“थे जाणो हो कै आपणै बडेरां नै बताएड़ो हो कै थे हत्या ना करियो जे थे करोगा तो थानै कचेड़ी में जबाब देणो पड़सी।#निरगमन 20:13 22पण मैं थानै केऊं झिको आपगै भाई पर रीस करै तो परमेसर बिंगो न्याय करसी अर झिको आपगी भाई गी बेजती करसी तो बिनै पंचायत में जबाब देणो पड़सी अर कोई दूसरै नै माड़ो बतासी बिनै नरक में जाणो पड़सी। 23-24ईंखातर जद तूं बेदी पर भेंट चढावंतो होवै तो तनै याद आवै कै तेरै भाई खातर मन में कोई पाप है तो पेलां आपगै भाई नै मनाई अर फेर आ'गे भेंट चढाई। 25जद तेरो दुसमण तनै कचेड़ी में ले जावंतो होवै तो रा में बिनै बेली बणा लेई। कठै इंया ना होवै के बो तनै न्याय करण आळै गै सामै ले जा'गे जेळ में बंद करा दैय। 26मैं साची केऊं कै तूं जेळ ऊं जद तांई कोनी छूट सकैगो जद तांई बिंगो हिसाब पूरो ना कर दैय।”
बेबीचार
27“थे जाणो हो कै थानै केयेड़ो है बेबीचार ना करो।#निरगमन 20:14 28पण मैं थानै केऊं कै जे कोई आदमी पराई लुगाई नै गळत नजर ऊं देख बी लियो तो बण आपगै मन में बेबीचार कर लियो। 29ईंखातर तेरी आंख जे तेरूं पाप करवावै तो बिनै काड गे बारै फेंक दे क्यूंकै तेरी आंख गै कारण सारो सरीर नरक में ना जावै। 30जे तेरो हात गळत काम करवावै तो बिनै बाडगे फेंक दे क्यूंकै तेरै हात गै कारण सारो सरीर नरक में ना जावै।”
तलाक
(मत्ती 19:9; मरकुस 10:11,12; लूका 16:18)
31“नेम विधान में ओ बी केएड़ो है कै जे तूं आपगी लुगाई नै तलाक दैय तो लिखगे देई।#व्यवस्ता विवरण 24:1 32पण मैं थानै केऊं जे कोई आपगी लुगाई नै बेबीचार गै बिना कोई ओर बात गै कारण तलाक देवै तो बो बिंऊं बेबीचार करवावै अर जे कोई छोडेड़ी लुगाई ऊं ब्या करावै तो बो बेबीचारी है।”
सोगन
33“थे ओ बी सुणयो कै आपणै बडेरां नै केयेड़ो हो, सोगन ना खाई। जे खावै तो बिनै प्रभु खातर पूरी करियो।” 34पण मैं थानै केऊं, “थे सुरग गी सोगन ना खाईयो क्यूंकै बठै परमेसर गो आसण है। 35अर धरती गी सोगन ना खाईयो क्यूंकै बिनै परमेसर संभाळै है। अर ना यरुसलेम गी क्यूंकै बो महाराजा गो नगर है। 36अर ना सिर गी सोगन खाईयो क्यूंकै थे एक बी बाळ काळो अर धोळो कोनी कर सको। 37जद बी तूं बोलै तो साच्ची बात बोली इंऊं जादा झिको कीं होवै बो सैतान गी ओर ऊं है।”
बदळो
38“नेम विधान में केयेड़ो है कै जे कोई आदमी दूसरै गी आंख अर दांत खराब कर दियो तो आप आळो देणो पड़सी।#निरगमन 21:24; व्यवस्ता विवरण 19:21 39पण मैं थानै केऊं कै जे कोई आदमी थारै सागै बुरो काम करै तो बिंगै खिलाफ थे कीं ना करियो। जे थारै एक गाल पर थपड़ मारै तो दूसरो बी आगै कर दैयो। 40जे कोई तेरै पर मुकदमो कर'गे कुड़तो लेणो चावै तो बिनै ओडण खातर चादर बी दे दे। 41जे कोई तनै एक कोस चलावै तो तूं बिंगै सागै दो कोस उड़जा। 42जे तेरूं कोई कीं मांगै तो बिनै दे दे। अर झिको उधार लेणो चावै बिनै मना ना कर।”
दुसमणां सागै प्रेम
(लूका 6:27,28,32-36)
43“थे नेम विधान गी आ बात सुण चुक्या हो कै पड़ोसी ऊं प्रेम अर दुसमणां ऊं बैर राखो। 44पण मैं थानै केऊं कै थे थारै दुसमणां ऊं प्रेम करो अर झिका थानै दुख दैय बां खातर पराथना करो। 45जिंऊं थे थारै पिता परमेसर गी आच्छी उळाद बण सको क्यूंकै बो आच्छै अर माडै़ नै एक बरगो समझै। 46जे थे आपगै सागै प्रेम करण आळां ऊं प्रेम करो तो थानै के फळ मिलसी इयां तो चुंगी लेण आळा बी करै। 47जे थे आपगै बेलियां सागै प्रेम करो तो के मोटो काम करो? इंया तो गेर यहुदी लोग बी करै। 48ईंखातर थे पूरी तरियां आच्छा बणो क्यूंकै थारो पिता परमेसर बी आच्छो है।”
Zvasarudzwa nguva ino
मत्ती 5: BGQ
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023 (Active), Wycliffe Bible Translators, Inc. All rights reserved. © WIn Publishing Trust