१ कोरिन्थी 2
2
1हे मोरिक विश्वासी भैयो, मै तुहुरिन्के थेन ना ते बातके चलाँखी प्रयोग करे अइनु, और ना ते मै धेउर जन्नाहाँ बतुँ कहिके देखाई अइनु। पर मै ते तुहुरिन्के थेन परमेश्वरके बारेम सन्देश देहे आइल रहुँ। 2काकरेकी मै येशू ख्रीष्ट और क्रूसमे हुँकार मुलक बारेमे किल बोलम कहिके मै अपन मनमे पक्का करलेले रहुँ।
3और तुहुरिन्के थेन अइनु ते मै कमजोर रहुँ, और डरकमारे थरथरैती बैठ्नु। 4और मोरिक शिक्षा और मोरिक प्रचार मनैनके ज्ञानके चलाँख बोलीसे नै रहे। पर पवित्र आत्मा तुहुरिन्हे एकथो शक्तिशाली तरिकासे देखैलाँ कि जोन सन्देश मै तुहुरिन्हे बतैनु, उ सन्देश सच्चा रहे। 5ताकि तुहुरिन्के विश्वास मनैनके बुद्धिमे नै होके परमेश्वरके शक्तिमे भर परे।
पवित्र आत्मक ज्ञान
6तभुन फेन मै उ विश्वासीनके थेन ज्ञानके घोषणा करथुँ, जेने आत्मिक रुपमे परिपक्क बताँ। पर यी ज्ञान यी संसारसे सम्बन्धित नै हो, या यी संसारमे शासन करुइया शक्तिनके नै हुइतिन। काकरेकी आब ओइने शासन नै करहीँ। 7पर जोन ज्ञानके हम्रे बात कर्थी, उ परमेश्वरके ज्ञान हो, जोन ज्ञान नुकल रहे। अभिनसम यी ज्ञानहे केऊ फेन नै जानल रहे। पृथ्वी बनैनासे पैलेहेँ परमेश्वर अपन ज्ञानसे निर्णय लैलेले रहिँत कि ऊ हम्रिहिन्हे अपन महिमामे साझेदार बनैहीँ।
8यी संसारके कौनो फेन शासकहुँक्रे परमेश्वरके योजनाहे नै बुझ्लाँ। काकरेकी यदि ओइने उ बात बुझल रताँ कलेसे महिमक प्रभुहे क्रूसमे नै टंग्ना रहिँत। 9पर पवित्र शास्त्रमे जसिके लिखल बा, कि
“ना कबु केऊ देख्ले हो,
और ना कबु केऊ सुन्ले हो,
और ना ते केऊ कबु फेन उ अद्भुत चिजके बारेमे सोँचल बा,
जोन चिज परमेश्वर हुँकिन्हे प्रेम करुइया मनैनके लग तयार कर्ले बताँ।”
10पर परमेश्वर यी चिजहे हमारमे अथवा हम्रे निउतरह्यनकेमे पवित्र आत्मक माध्यमसे प्रकट करलाँ। काकरेकी असिन कौनो फेन चिज नै हो, जोन पवित्र आत्माहे पता नै हो। यहाँसम कि परमेश्वरके गहिँर विचारहे फेन पवित्र आत्मा एकदम सहिसे जानत। 11जसिके कौनो फेन मनैया जात्तिकमे उ का सोँचता कहिके उ बाहेक दोसुर केऊ फेन नै जानत। ओस्तेहेँके परमेश्वरके विचारहे पवित्र आत्मा बाहेक दोसुर केऊ फेन नै जानत।
12हम्रे ओसिके नै सोँच्थी जसिके संसारके दोसुर मनै सोँच्थाँ; बेन हम्रिहिन्हे परमेश्वरके देलक वरदान हम्रे बुझे सेकी कहिके परमेश्वर हम्रिहिन्हे पवित्र आत्मा देले बताँ। 13तबेकमारे हम्रे निउतरह्यन यी बातहे दोसुर मनैनहे बतैथी। हम्रे मनैनके ज्ञानसे सिखाईल शिक्षा नै बोल्थी। पर पवित्र आत्मक सिखाइल अनुसार पवित्र आत्मक ज्ञानसे हम्रे आत्मिक बातके बयान कर्थी।
14पर जोन मनैयकमे परमेश्वरके आत्मा नै हुइतिस, उ मनैया पवित्र आत्मक शिक्षाहे स्वीकार नै करत। और यी बात ओकर लग मूर्खता भरल हस लग्थिस, काकरेकी ऊ उहिहे बुझे नै सेकत। काकरेकी पवित्र आत्मा किल एकथो बा, जे मनैनहे परमेश्वरके बात बुझ्नामे सहयोग करत। 15जोन मनै पवित्र आत्मा भेटैले बताँ, ओइने पवित्र आत्मक सिखाइल सक्कु बात बुझे सेक्थाँ। पर जोन मनैनके थेन पवित्र आत्मा नै हुइतिन, ओइने पवित्र आत्मा भेटाइल मनैनके विचारहे बुझे नै सेक्थाँ। 16यी बात सच्चा बा, काकरेकी पवित्र शास्त्रमे असिके लिखल बा,
“प्रभुक मनमे का बतिन कहिके केऊ फेन जाने नै सेकत।
और हुँकिन्हे केऊ फेन सिखाई नै सेकत।”
पर ख्रीष्टके मनमे का बतिन कहिके हम्रे विश्वासीन बुझे सेक्थी।
Zvasarudzwa nguva ino
१ कोरिन्थी 2: DVGNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.