Looma 6
6
Ukwa mu masumu, uba moonyi mu Yisu Kristo
1Buuna hima luleelaani? Bisu a benu likwilalaani mu usa masumu, mana hyese hya Nzambi hisinzafulala iteesi? 2Naana ubila ve! Bisu ti laamiikwa mu masumu, ka buni lutwala ubweba moonyi mu masumu? 3Benu a liyaabi ve ti, bisu boosi ba laayaki tondihili mu Yisu Kristo, ni mu lipfu la nde batondihi bisu? 4Mu tondihili mo yiina yi lipfu, badiihi bisu kaka na nde. We bu Kristo hasuuhi mu babakwa mu muyusu a Taata, ni bumosi kaka, bisu luudyata mu moonyi wu munyatihi mu nde.
5Ni mu buuna, tso bisu laaba itwadi na nde mu lipfu bibaayaka laafwanina na la nde, bumosi kaka, bisu luuba itwadi na nde mu tsuuhili yi yafwanina na ya nde. 6Ni mu buuna, liyabani ti, imuutu hya bisu a benu hya tsikulu bakomini hyo ŋa muti itwadi na Kristo. Mana itwadi hya bisu na masumu hitabuha, na libwevelebani baviha ba masumu. 7Mu tooni ati, muutu wu miikwa itwadi na Kristo, aka wu akuha, na amiitahuha na masumu. 8Tso bisu a benu laakwa mu Kristo, bisu lili na hiitu ti bisu sa liba kaka moonyi na nde. 9Bu liyaabi ti Kristo wu asuuhi ŋa hati la babakwa a hubwekwa ve, lipfu a lisaali na matwala ŋa yulu a nde ve. 10Mu lipfu la nde, nde akwidi kwa limosi mu tooni masumu ma baatu. Ka bunuubu, nde bibaayaka moonyi, na nde bibaayaka moonyi mu Nzambi. 11Ni bumosi kaka mu benu, yaabaani ti, benu lili baatu babakwa mu masumu. Na ti, benu lili kaka moonyi mu Nzambi itwadi na Yisu Kristo.
12Ni mu buuna, masumu utwala ubwetuma nyutu a benu yi yukwa ve, mu ubwesiingala linyungi la yo. 13A liyeholo linyutu la benu mu masumu we bilwanili bi uvanga ma mabi ve. Ka yeholwaani nyutu a benu mwakulu huli Nzambi, we baatu ba moonyi ba bamiimata hutso lipfu. Na yeholwaani linyutu la benu loosi mu isalu hya Nzambi, we ilwanili hi uvanga mambu ma butsiitsa. 14Buuna, lisumu a lubweba na matwala mu benu ve. Mu tooni ati, benu a lili hutso lituma bibaayaka Mikele ve, ka hutso a hyese hya Nzambi.
Usala mu butsiitsa
15Ka buni? Bisu a benu ni libasumahani mu tooni ati a lisaali hutso Mikele ve, ka hutso a hyese hya Nzambi? Naana ubila ve! 16Benu liyaabi lo bubwe: tso benu lisalili muutu na usiingala nde we baviha, benu lika baviha ba pfumu wu benu lili mu usiingala. Tso hwaba lisumu bibaayaka libabita hu lipfu, buuve lisiingala bibaayaka libabita hu moonyi wu butsiitsa. 17Ka lifutalaani matondo huli Nzambi! Benu ba laabeedi hu tsikulu baviha ba masumu, bunuubu benu limiisiingala mu mutima woosi Mikele mya ndongisili yi benu laayaki. 18Na bunuubu, bu benu limiiyoboho mu masumu, benu ka baviha ba mavaanga ma butsiitsa. 19Me ndi mu unzambila mu imuutu, mana benu litsikaha ma me ndi ndeele. Ni bumosi kaka, benu layehuli binama bya benu mu buviha bu manzala ma bubembo, na bubi bu buli mu ubita muutu mu utuumbaha ŋa busu bwa Nzambi. Ni bumosi kaka, bunuubu,vaani linyutu la benu loosi mu buviha bu mavaanga ma butsiitsa, mu uba mu idiingu hi bungidi.
20Ka ŋa benu laaba kini baviha ba masumu, benu laaba bunyanga ŋa busu bwa mambu ma butsiitsa. 21Ka benu ki kaluha laabahi mu taangu mo yiina? Mavaanga ma benu lili na tsonyi mu mo loloyi. Mavaanga mo maana, tsukusu a mo ni lipfu. 22Ka bunuubu, bu lika bunyanga ŋa busu bu masumu, na bu lika baviha ba Nzambi, kaluha yi benu luubaha ni idiingu hi hyaluula mu nde, na tsukusu ni moonyi wu bilima na bilima. 23Ka pfuta a masumu ni lipfu, ka ikuuku hi Nzambi ubava mu bungodu, ni moonyi wu bilima na bilima itwadi na Yisu Kristo, Pfumu a bisu.
Zvasarudzwa nguva ino
Looma 6: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.