Looma 4
4
Ifwaani hi imiinu hya Abrahami
1Buuna, hima bisu luuleele mu Abrahami kaaha a bisu mu musunya? Hima nde habahi? 2Tso Nzambi asiingi ti Abrahami bibaayaka wu akuha mu tooni mavaanga, Abrahami utwala ubula mabyoho. Ka a ŋa busu bwa Nzambi ve. 3Eye! Mabasonehe ma Ngidi buni mu uleele: «Abrahami asiidi imiinu mu Nzambi, na Nzambi asiingi ti nde bibaayaka wu akuha mu imiinu#Mba 15.6.» 4Woosi wu ubasala, ubayaka pfuta a nde. Pfuta mo, a yili huli nde we hyese ve, ka yo yili mukanu. 5Ka ŋa muutu wu avelesa isalu, ali na hiitu mu Nzambi wu ubakitusa nga masumu wu akuha, Nzambi miisiinga ti nde wu akuha ali mu imiinu. 6Ni bumosi kaka, Davidi bibaayaka mu uyabisa kinya yi yili na muutu wu Nzambi ubasiinga ti nde wu akuha ali, hwavele utala mavaanga ma nde:
7«Kinya yili huli baana, ba Nzambi hamiisa kolo-kolo mu ma mabi ma bo,
na ba masumu ma bo bamiinyahula!
8Kinya yili huli muutu wu Pfumu havelesiinga lisumu la nde#Mkg 32.1-2!»
9Kinya mo yiina, ndulu ya ba bali Bayudaayo, vo ti, yo yili kaka yi bangoyi? Mu mbuli, bisu libaleele ti: «Nzambi asiingi ti Abrahami wu akuha ali, mu tooni imiinu hya nde.» 10Mu ki taangu musamu mo wuuna hatswihi? Tehele bakete Abrahami, buuve humbisa a ketili a nde? Naana! A humbisa a ketili a nde ve, ka ŋa habedi kini a baketi ve. 11Na titswene, Abrahami ayaki ketili we iliimbu. Hyo hyaba we matala mu umweese ti Nzambi asiingi ukuha hwa nde mu imiinu. Ni buuna, bu Abrahami haba kini a baketi ve, Nzambi abyalisi nde taata a boosi ba bubasiila imiinu mu Nzambi. Baatu mo baana, Nzambi ubasiinga bo kaka we ba bakuha, tso bu bo babeedi kini a baketi ve. 12Nde bibaayaka kaka taata a ba bakete, ka a ba bubabingalala ndulu ketili ve, ka ba bubaduukala ifwaani hi imiinu hya taata a bisu Abrahami, bu haba kini a baketi ve.
Lahi la Nzambi huli ba bubasa imiinu mu Yisu
13Ni mu buuna, Nzambi asiidi lahi huli Abrahami na imbisa hya nde, ti bo sa babyalila tsi. Lahi mo liina basiidi lo, a mu tooni ati Abrahami asiingili Mikele ve, ka mu tooni ati, Nzambi asiingi ti nde bibaayaka wu akuha mu imiinu. 14Tso ubyalila hwa tsi hu basa lahi, bali mu ubyalila yo mu lisiingala bibaayaka Mikele, buuna imiinu hikiiba hi hyavele a kaluha, na lahi la Nzambi likiiba bibaayaka laavele a tsoongo. 15Mikele mibateele kesi a Nzambi. Ka ŋa hwavele Mikele, kene mu Mikele ka yove.
16Ni mu buuna, basiidi lahi mu nzila yi imiinu, mana hyo hiba hyese hi Nzambi ubava, na basilasa hyo huli imbisa hya Abrahami hyoosi. Lahi a lili mu utala ndulu ba bubasiingala Mikele ve, ka napa boosi ba bubasa imiinu we bu Abrahami hasiidi imiinu. Abrahami ni taata a bisu boosi, 17we bu Mabasonehe mali mu uleele: «Me atsoolo we taata mabuli ma malahi ma baatu ba tsi.» Nde bibaayaka taata a bisu ŋa busu bwa Nzambi wu nde ubasiila imiinu, Nzambi wu ubafutala moonyi huli babakwa na wu ubatsunda bi byavele. 18Tooni yi ubwesa hiitu aba aka yove, ka Abrahami asiidi hwa nde hiitu. «Nde akituhi kaaha mabuli ma malahi ma baatu.» Nde asiidi imiinu mu Nzambi, we bu Nzambi haleeli nde: «Buuna ni bu huba litangu bibaayaka imbisa hya we#Mba 15.5.» 19Abrahami aba aka bebele a kama (100) bibaayaka bilima. Ka imiinu hya nde hyaba a hyakolo ve, bu nde hakatsima ti linyutu la nde aba laaka bebele na lipfu, na mukadi a nde Sara wu akiibwevelebuta. 20Ŋa busu bwa lahi la Nzambi, Abrahami a habwisi hiitu hya nde na usa paha ve. Imiinu hya nde hyahwadisi nde, na nde ayusi Nzambi. 21Nde aba na tadi ti Nzambi na matwala ma ukuhasa ma nde hasiidi lahi. 22Ni mu buuna, bubaleele mu Abrahami ti, mu tooni imiinu hya nde, «Nzambi asiingi ti nde wu akuha.»
23Mikuma mo miniimi: «Nzambi ubasiinga Abrahami, muutu wu akuha», a mu tooni a Abrahami siha basonehe ve. 24Baasonehe mikuma mo miina kaka mu bisu. Bisu ba buusiinga ti imiinu hya bisu hili hi hyakuha, mu tooni ati libasa imiinu mu Nzambi wu asuuli Yisu Kristo Pfumu a bisu, ŋa hati la babakwa. 25Nzambi aviidi Yisu mu lipfu, mu tooni masumu ma bisu. Na Nzambi asuuli nde, mana bisu liba ba bakuha.
Zvasarudzwa nguva ino
Looma 4: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.