Yowani 17
17
Yisu li mu usambila mu bayihi ba nde
1Nde amana utoyo buuna, Yisu asimbuli miisu hu yulu na aleeli: «Taata, taangu yimiito. Yusa Mwana a we, mana Mwana a we kaka ayusa we! 2We aviidi nde lituma ŋa yulu a baatu boosi, mana nde ava moonyi wu bilima na bilima huli boosi ba we ava nde. 3Ka moonyi wu bilima na bilima ni uyaaba we Nzambi, wu li Nzambi ndulu mosi wa mbuli, na uyaaba wu we atsindihi, Yisu Kristo. 4Me minzuusa we ŋa toto, mu tooni ati, me miimana isalu hi we atuma me usa. 5Bunuubu, Taata, yusa me ŋa busu bwa we. Yusa me mu biyusili bi me amba na byo ŋa pedu a we, tswamina pangili a toto. 6Me anzabisi nduhi a we huli baatu ba we apalisi mu tsi, ba we aviidi me. We abahi bo, ka we ava me bo, na bo baasingili mikuma mya we. 7Bunuubu, bo bamiitsikaha ti byosi bi we ava me, huli we byamata. 8Mu tooni ati, me apa bo mambu ma we ava me. Bo baayaka mo, bo baayaba ti mu mbuli me mu we apala. Na bo baasa imiinu ti we ni wu atsindaha me. 9Ni mu tooni a bo, me ndi mu utsambila we. Me a handi mu utsambila mu baatu ba tsi ve, ka mu ba we ava me, bu bo bali ba we abaha. 10Baatu boosi ba me ndi na bo, bali ba we. Na boosi ba we bali ba me. Na muyusu a me li mu umonehele mu bo. 11Mwana taangu hoole, me a humbwemba mu tsi ve, me upfutaha huli we Taata. Ka uto ti bo, bo bali ba tsi. We wu li wa ngidi, keelese bo itwadi na we, we wu li itwadi na me. Mana bo baba muutu mumosi, we bu we na me lili muutu mumosi. 12Ŋa me mbeedi na bo, me akeelisi itwadi hya bo na we, we wu li itwadi na me. Me akalana bo, na tso muutu mumosi mu bo a hanyambana ve, vengo muutu mumosi wu baanenge mu unyambana, mana Mabasonehe mu Mabuuku ma Ngidi matswiha#Mkg 41.10 . 13Na bunuubu, me ka mu unza huli we, na me ndi mu unzabisa mambu mo maniima bu me kini ŋa tsi. Me ndi mu unzabisa mo, mana bo baba na kinya yi yili na me, ni kinya yi yasupahana. 14Me apa bo mikuma mya we, na baatu ba tsi na piinga mu bo. Mu tooni ati, bo a bali ba tsi ve, we bu me avele wa tsi mo yiniiyi. 15Me a handi mu upondo huli we mu umaasa bo mu tsi ve, ka mu ukeelese bo ŋa busu bu mubungi. 16Bo a bali ba tsi ve, we bu me avele wa tsi.»
17«Mambu ma we ni imbuli, tsyemese bo mu imbuli hya we. 18We bu we atsindihi me mu tsi, me kaka miitsindaha bo mu tsi. 19Na me, me ndi mu utsyeme me mwakulu mu bo, mana bo kaka baba ba baatsyeme mu imbuli. 20Me a handi mu utsambila we ndulu mu bo ve, ka napa mu ba buusiila me imiinu mu ma bo buuleele mu me. 21Me ndi mu utsambila, mana boosi baba we muutu mumosi. Taata, nyaha bo baba itwadi mu we na me, we bu we li itwadi na me, na me ndi itwadi na we. Nyaha bo baba muutu mumosi, mana baatu ba tsi basa imiinu ti ni we atsindaha me. 22Na me miipa bo muyusu wu we aviidi me, mana bo baba muutu mumosi, we bu we na me lili muutu mumosi. 23Me ndi moonyi mu bo, na we li moonyi mu me. Buuna, bo buuba muutu mumosi we bu hwafwana, mana baatu ba tsi bayaaba ti we atsindaha me, na ti we atondo bayihi ba me we bu we atondo me.»
24«Taata, me tondi ti baatu ba we ava me, baba na me ŋa me umba. Me tondi ti bo bamono muyusu a me. Ni muyusu wu we ava me, mu tooni ati, we atondo me tswamina pangili a tsi. 25Taata Nga Butsiitsa, baatu ba tsi a bayaaba we ve. Ka me, me anzaaba we, na bayihi ba me bamiisilasa ti we ni wu atsindaha me. 26Me anzabisa bo nduhi a we, na me tsa mbwenzabisa bo yo, mana litondo li we atondo me liba mu bo, na me mba me mwakulu mu bo.»
Zvasarudzwa nguva ino
Yowani 17: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.