Yowani 14
14
Yisu ni nzila yi yibaabita huli Taata
1Yisu aleeli bo: «A liba mitima helini-helini ve. Saani imiinu mu Nzambi, saani kaka imiinu mu me. 2Mambuha mali ma maasalila mu nzo a Taata a me. Me tsa nzyene mu ayavangila benu mambuha. Tso a buuna ve, me a hakinzabisa benu lo ve. 3Na tso me nzyeni hu uyavangila benu mbuha, me tsanzapfutaha. Me tsapolo benu, mana hu me umba, benu kaka liba huuna. 4Na hu me ndi mu unzyene, benu liyaabi nzila.»
5Tomasi aleeli nde: «Pfumu, bisu a liyaabi hu we li mu uyene ve. Buni bisu luuyaaba nzila?» 6Yisu afutili nde: «Me ni nzila, imbuli na moonyi. Muutu tso mumosi a huya huli Taata hwavele uvyohele mu me ve. 7Tso benu liyaabi me, benu likiiyaaba kaka Taata a me. Na bunuubu, benu limiiyaaba nde na limiimono nde.»
8Filipo aleeli nde: «Pfumu, mweese bisu Taata, na buuna bukuhi mu bisu.» 9Yisu aleeli nde: «Me ndi na benu umata beleve. We a hayaaba me ve, Filipo? Woosi wu miimono me, miimono Taata. Buni we utwala uleele: “Mweese bisu Taata”? 10We afwana usa imiinu ti me ndi mu Taata, na ti Taata li mu me. Mambu ma me ndi mu undeele, a mali mu umata huli me ve. Ka Taata wu li mu me, ni wu li mu ukuhasa mavaanga ma nde. 11Saani me imiinu, ŋa me ndi mu undeele ti: me ndi mu Taata, na Taata li mu me. Tso a buuna ve, saani imiinu mu tooni mavaanga ma me ndi mu utsa.»
12«Mu mbuli, mu mbuli me ndi mu undeele benu, woosi wu usa imiinu mu me, nde kaka sa akuhasa mavaanga ma me ndi mu utsa. Na nde sa akuhasa ma maalutala bunene, mu tooni ati me ndi mu unzyene huli Taata. 13Na byosi bi benu luuvondo mu nduhi a me, me tsa paanga byo, mana muyusu Taata amonehele mu Mwana. 14Tso benu livondi pasi isiha mu nduhi a me, me tsa paanga hyo.»
Yisu miisa nzuhisini li utsindaha Livupu la Ngidi
15«Tso benu latondo me, benu luusingala matumili ma me. 16Me tsa pondo Taata mu uva benu mukaliini mukima, wu ukumbasa na uba na benu mu bilima na bilima. 17Mukaliini ni Livupu li imbuli. Livupu li baatu ba tsi buuveletwala uyaka. Mu tooni ati, bo utwala umono tso uyaba lo ve. Ka uto ti benu, benu liyabi lo. Mu tooni ati lo lili ŋa hati la benu, na lo sa likwilala mu benu. 18Me a hutsiisa benu we bitsaana ve, ka me tsa nza huli benu. 19Mu mwaana a taangu hoole, baatu ba tsi a bubwemono me ve. Ka benu, benu sa limono me. Mu tooni ati me ndi moonyi, na benu kaka sa liba moonyi. 20Mu ilumbu mo hiina, benu sa liyaba ti me ndi mu Taata a me. Benu lili mu me, na me ndi mu benu. 21Muutu wu li mu uyaka matumili ma me, na wu li mu usiingala mo, ni nde wuuna wu atondo me. Muutu wu atondo me, Taata a me sa atondo nde. Me kaka tsa tondo nde, na me tsa monehele na nde.»
22Yuda, a Yuda Isikariyoti ve, afuuli Yisu: «Pfumu, mu hima we umonehele ndulu na bisu na uvelemonehele na baatu boosi?» 23Yisu afutili nde bunuubu: «Tso muutu tondi me, nde akeelese mikuma mya me, na Taata a me sa atondo nde. Bisu sa liya huli nde, na bisu sa livaanga nzo a bisu huli nde. 24Muutu wu aveletondo me, a hubaasiingala mikuma mya me ve. Na mikuma mi benu lili mu uyuha a mili mu umata huli me ve. Ka myo mili mu umata huli Taata wu atsindaha me.»
25«Me miinzabisa benu mo bu me kini na benu. 26Ka mukaliini, Livupu la Ngidi li Taata hutsindaha mu nduhi a me, luulongese benu mu bisiha byosi. Lo luusa ti benu liyibwala moonyi, mu moosi ma me andeele benu.»
27«Me ndi mu utsiisa benu hyenze. Ni hyenze hya me, me ndi mu upa benu. Me a handi mu upa benu hyo, we bu baatu ba tsi bubaava ve. Nyaha mitima mya benu mivelehelene, na a liba na boomo ve. 28Benu limiiyuha me mu uleele bu: “Me ka dwe, ka me tsa nzapfutaha huli benu.” Tso benu laatondo me, baani mu kinya bu benu limiiyuha ti me aka mu unzyene huli Taata. Mu tooni ati, Taata akulala me. 29Me miinzabisa benu misamu mo minimi mu taangu mo yiniiyi, tswamina myo mu uvangama, mana bu myo myuvangama, benu lisiila me imiinu. 30Me a hatsaali na taangu yindahi yi ubwetoyo na benu ve. Mu tooni ati, pfumu a toto aka mu uya. Nde a hali na matwala ŋa yulu a me ve. 31Ka baatu ba tsi bafwana mu uyaba ti me atondo Taata, na ti me ndi mu ukuhasa we bu Taata hatuma me. Telemaani, limataani ŋaniiŋa!»
Zvasarudzwa nguva ino
Yowani 14: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.