Mavaanga 5
5
Mapfuta ma Ananya na Safila
1Ka hwaba na muutu mumosi, nduhi a nde Ananya. Nde ayuhisini na mukadi a nde Safila, mu usumbasa toto a bo. 2Nde aswehi kabu la mbongo lina humbisa uyuhasana na mukadi a nde, na nde ayava ibadi hina huli biluumbi. 3Peetelo aleeli nde: «Ananya, mu hima Saatana hamiituma we mu uvanga buuna? We miipfuta Livupu la Ngidi na uswehe ibadi hya mbongo a toto. 4Tswamina we sumbasa toto a we, we aba uswehe yo mu we mwakulu. Napa humbisa usumbasa yo, we aba bunyanga mu usalila mbongo mo yiina mu lituma la we. Buni we bahi tsimi a pila yiniiyi mu mutima a we? We a pfuti baatu ve, ka Nzambi we pfuti.» 5Bu Ananya hayuhi mambu mo maana, nde abwidi na akwidi. Na boosi babaayuhi musamu mo wunuuwu, baamoni boomo bu bwafulala. 6Mu taangu mo yiina, pfudu-mbahala yaayidi, yaapoti mvumbi a nde lileeso, na yaayadiiha yo.
7Humbisa mangunga we matatu, mukadi a Ananya ayakoto, hwavele uyaba ma maavyohi. 8Peetelo afuuli nde: «Leele me, mu mbuli ni mu lifunu mo linili benu lisumbisi toto?» Nde afutili: «Eye, ni mu lifunu mo liina.» 9Buuna Peetelo aleeli nde: «Buni benu liyuhisini mu uyehele Livupu la Pfumu? Tala! Ba bamiiyadiiha mulumi a we ŋa munywa a nzo baaka, na bo bu ubita we kaka.» 10Mawasa-mawasa, Safila abwidi ŋa miilu mya Peetelo na akwidi. Pfudu mbahala yaakoti, yaabiisi nde wu akwa. Yo yaabiti nde kaka hu uyadiiha ŋa pedu mulumi a nde. 11Libundu loosi na boosi ba baayuhi musamu mo wunuuwu, baamoni boomo bu bwafulala.
Biluumbi byakasa bimangu bi bilahi
12Biluumbi byakasa biliimbu na bimangu bi bilahi bya kimuhili, ŋa hati la baatu. Basambili boosi mu itwadi, baakatsonzomo ŋa mbongi yi baakateele «Mapombo ma Soolomo». 13Muutu wu avele a hiitu tso mumosi, a hakayehele ukoto mu konge a bo ve. Tso bu baatu boosi baakayusa bo. 14Babahala na bakaasu ba banzuhisini baakasa hiitu mu Pfumu. Baatu mo baana baapfunisi litangu la banga hiitu. 15Baatu baakabehe babeedu mu manzila na baakalasa bo ŋa yulu mataangi na bipooyi. Mana bu Peetelo huvyoho, inzinza hya nde ifuha tso mumosi mu bo. 16Makonge ma baatu baakamata ka hu misyenge mya bebele na Yeruselemi. Bo baakabehe babeedu, na baatu ba mavupu ma mabi maakakwamisa, na boosi baakabeloho.
Baamiikwamisa biluumbi
17Ni mu buuna, mukuutu bangaanga ba Nzambi, na boosi ba baaba na nde, kabu loosi li Basaduki, laluuli mu nyengi biluumbi. 18Bo baatumi mu ukaanga biluumbi na baabwahi bo mu kondaayi yinene. 19Ka ŋa butsuhu, pofi a Pfumu adibuli bidibuhu bya kondaayi, nde apalisi biluumbi. Na nde aleeli bo: 20«Yenaani hu nzo a Nzambi. Ni huuna benu lu uyabisa baatu, mambu moosi ma maatala moonyi wu munyatihi.» 21Biluumbi byasiingi, byo byayeni hu nzo a Nzambi tsumba a ngwali, na byabandihi ulongese baatu.
Mukuutu bangaanga ba Nzambi, na boosi ba baakasala na nde, baateeli bakuutu ba Isereli mu utsonzomo mu pfuundu yinene. Na baatumisi masadaadu, mu uyavolo biluumbi hu nzo a kondaayi. 22Mu taangu yi masadaadu mayato hu nzo a kondaayi, mo a maabiisi biluumbi ve. Masadaadu maafutihi hu pfuundu, maayava ikuumbu mo hinihi: 23«Bisu liyabiisa nzo a kondaayi baadibuha bubwe, na bakeedi baa yo, mu mambuha ma bo ŋa busu bu minywanzo. Ka bu bisu lidibuli bidibuhu, bisu a limoni muutu hu hati ve.» 24Mu uyuha ikuumbu mo hinihi, mutumi masadaadu wa nzo a Nzambi na bakuutu ba bangaanga ba Nzambi, matsimi maasuki. Na baakafulasana ti: «Dyambu mo linili, buni livyohi?» 25Titswene muutu mumosi ayayabisa bo: «Yuhaani! Baatu ba benu laabwaha mu kondaayi, babanaa mu litandala la nzo a Nzambi mu ulongese baatu.» 26Buuna mutumi masadaadu ayeni na bakeedi ba nde, mu usaha ubwebehe biluumbi. Ka bo a baayeni na lwanisa ve, mu tooni ati bo baaba na boomo ti baatu balanga bo mamanya.
27Bu bo baabehi biluumbi, mu utsundasa byo ŋa busu bwa pfuundu, mukuutu bangaanga ba Nzambi akava byo byuhu. 28Nde aleeli bo: «Bisu laasa benu mukele mu mifudi mu ubwevelelongese mu nduhi a muutu mo wuuna. Ka benu ki lo livaangi? Benu limiitsala ndongisili a benu mu musyenge a Yeruselemi woosi, na benu litondi ususa pfuta lipfu la nde ŋa yulu a bisu!»
29Buuna Peetelo na biluumbi bikima baafutili bo: «Hwafwana mu usiingala Nzambi, ka a baatu ve. 30Nzambi bakaaha ba bisu amiisuula Yisu mo wunuuwu, wu benu laadubi mu ukomene ŋa muti a kuruwa. 31Nzambi asyenuli nde mu matwala ma nde, abyalisi nde we Pfumu na Muyobili. Nzambi hasiidi buuna, mana bisu Isereli basobo mbiili a bo, na bayaka nyahulili masumu ma bo. 32Bisu lili bambangi baa misamu mo miina, bisu na Livupu la Ngidi, li Nzambi havidi ba bali mu usiingala nde.» 33Baatu ba pfuundu banzonzi badasuhi mu mifudi, bu bo baayuhi mambu mo maana, na bo baakatondo uduba biluumbi.
34Ka hwaba ŋa hati la bo, mufarisi mumosi nduhi a nde Ngamalyeli. Nde aba mulongisi mikele, wu baatu boosi baakakiinza. Nde atelimi ŋa hati la pfuundu banzonzi, na atumi mu upalisa biluumbi mu mwaana taangu. 35Titswene nde aleeli huli boosi: «Kebaani! Benu bisu Isereli, mu ma benu luvangila baatu mobaniba. 36Hwavyohi mwaana a taangu yindahi, muutu mumosi nduhi Tedaasi, akamonehele ti nde muutu wu munene. Baatu bebele na makama mana (400), baakaduukala nde. Ka bu baadubi nde, baatu boosi ba baakasa hiitu mu nde, baatsamuhi na buli la nde laanyambini. 37Ŋa mbisa a nde, mu taangu yi usonehe litangu la baatu ba mutsi, hwabwepala Yuda musi Ngalili. Nde kaka abwetelemese baatu ba banzuhisini, mu uduukala nde. Nde kaka baadubi, na boosi ba baakasa hiitu mu nde, baatsali bo. 38Bunuubu, me ndeele benu: Nyahaani utsundana mu baatu mobaniba, nyahulaani bo bayene. Ka umono ti, matsimi ma bo na mavaanga ma bo mali ma imuutu, mo mu udimbala mu nzila. 39Ka tso mbuli mo mamati huli Nzambi, benu a lutwala utsala mo ve. A liyehele ulwanisa Nzambi ve!»
Baatu ba pfuundu banzonzi, baasilisi matsimi ma Ngamalyeli. 40Bo baateeli biluumbi, baatumi masadaadu mu utete biluumbi bikooti, na baaviidi byo mukele mu ubweveletoyo mu nduhi a Yisu. Titswene, bo baanyahuli byo. 41Biluumbi byapali mu nzo a pfuundu banzonzi na kinya yoosi, mu umono ti bo baakwasi iteesi hi ubiingala munyongi mu nduhi a Yisu.
42Na pasi ilumbu, mu nzo a Nzambi na mu manzo ma bo, bo baakahwada mu ubaalongese na ubaayabisa Musamu wu Mubwe ti Yisu ni Masiya.
Zvasarudzwa nguva ino
Mavaanga 5: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.