Levitikus Nuarin-tas alupas 6.
Nuarin-tas alupas 6.
1 Nitai ahlap va nedo ahnag er ago jam ato. 8 Intas alep va nitai ahlap er atnamud, 14 im lep va nitai ahlap an nitai caig. 19 Nitai ahlap u natimi ahlap an nadiat inig er aspi yin. 24 Intas alep va nitai ahlap va nedo has.
1IS tas a Ihova ehele Moses, um ika,
2El et ago nedo has tah natimi, um imipalea intas o Ihova, um asan tas ahcil ehele etwan vaig tah nitai is ati ehelen aien par aminjinaig, ka tah nitai erau asipiaig arau, ka tah nitai eris atoraliak, ka el et ago nedo efaifa vai etwan aien;
3el et lep ecetai tah nitai aien is etjo, um ateri, um asan tas aktit o un vaig jam ahcil; el et ago tah nitai iji igki asega tah natimi, um ago nedo has:
4et wat ago nedo inigki aien, et lep amen nedo has iran vaig, etmu lep alupaig nitai inig aien is atoraliak aien, ka nitai inig is leh aien an nedo efaifa, ka nitai inig eris ati ehelen par aminjinaig, ka nitai inig is etjo ja is ecetai aien,
5ka nitai iji igki asega is asan tas aktit o un vaig aien jam ahcil; etmu lep alupaig nitai iji igki asega aien, um lep ati nahaijin fifd pan iran, um alupai natimi ohuun an nadiat iyehki etpu ahlap aien va nedo ahnag o un.
6Etmu imiapam nitai ahlap o un vai Ihova ehele natimi ahlap aien, va nedo ahnag o un, siip atamaig yi ethi irai siip o un, et ti nitai has iran, inyi tup apapa pan an nimtan inig napu asaig aiek, mika yi itai ahlap va nedo ahnag o un:
7etmu ahlap va nedo has o un a natimi ahlap an nuhup u Ihova: ja uhpu eti aru iran va nedo ahnag o un an tah nitai iji igki asega is ago aien.
8Is tas a Ihova ehele Moses, um ika,
9Namu tas aiek ehele Eron im ilpu hal o un, um ika, Intas alep va nitai ahlap atnamud nigki: Etmu amen nitai ahlap inigki er atnamud an cap an natau an nepig asega um yetpan an nuhialeg, etmu lep amen incap an natau, um cas.
10Etmu aso yin a natimi ahlap an napelumai yilyil o un, im incetpoi eduon, um leh nohpa an cap im nitai ahlap an natau, um ati an nahaijin natau.
11Etmu iknipagki apelumai o un aien, um aso yin ira apelumai et eche, um ahre nohpa an nuarin amen u atimi, um imiapan itac an nuarin lah.
12Etmu cas incap an natau; uhmu jim ahni: etmu atnamud incai iran a natimi ahlap irai iji uhialeg, um ati upene nitai ahlap atnamud ijinies iran; etmu lep atnamud iran nagako irai iji itai ahlap naaurinig aien.
13Etmu cas incap an natau irai iji adiat; eri jim lep ahni.
14Intas alep va nitai ahlap an nitai caig nigki: erumu ahlap iran a ilpu halav atamaig u Eron an nuhup u Ihova, an nuhup u natau.
15Etmu leh flaur an nikman aien yi ohua an nitai ahlap eh caig, im narakei iran, im nide cai auanipin upene asega et amen an nitai ahlap eh caig, um atnamud an natau mika yi itai imiehva, im nitai auanipin upene vai Ihova.
16Ja erumu caig inuarin inig et eled a Eron im ilpu halav atamaig o un: uhmu caig pan ira areto et ti leven iran an nuarin itap; erumu caig ara anliin nokoro an neom er asjapicnaig o un.
17Uhmu jim ati leven iran. Ek mun alupai ra ainyak inuarin imi ra irai iji itai ahlap unyak er ago an cap; et idim itap esjilid et idivaig nitai ahlap va nedo has, um idivaig nitai ahlap va nedo ahnag.
18Erumu caig a ilpu halav atamaig asega u Eron. Etmu amen aktit intas alep inigki imi caua im ilpu mapomia irai iji mesese, va niji itai ahlap vai Ihova er ago an cap: erumu itap ara sji igki asega era ubli ara.
19Is tas a Ihova ehele Moses, um ika,
20Nitai ahlap u Eron im ilpu hal o un nigki, erumu ahlap iran ara vai Ihova an nadiat inig eri aspi yin; nikavaig, nahaijin tend irai ifa et ethi irai flaur upene, mika yi itai ahlap eh caig irai iji mesese, nahaijin yi ethi an nuhialeg im nahaijin yi ethi an jupura.
21Uhmu ahen flaur inig an narakei a pani; etu wit yap, namu imiapam aiek: um ahlap irai iji uarin yap an nitai ahlap eh caig, mika yi itai auanipin upene vai Ihova.
22Etmu ahlap iran a inhal o un inig eri aspi yin mika yi isjeupigmoig yin aien, um atimi ahlap: intas alep u Ihova nigki irai iji mesese; uhmu atnamud ehni.
23Uhmu atnamud ehni niji itai ahlap asega an nitai caig va natimi ahlap: uhmu jim caig.
24Is tas a Ihova ehele Moses, um ika,
25Namu tas aiek ehele Eron im ilpu hal o un, um ika, Intas alep va nitai ahlap va nedo has nigki: Uhmu atgei nitai ahlap va nedo has an nuarin inig er atgei nitai ahlap atnamud iran an nuhup u Ihova: et idim itap esjilid.
26Etmu caig a natimi ahlap inig et ahlap iran aien va nedo has: uhmu caig an nuarin itap anliin nokoro an neom er asjapicnaig o un.
27El et ubli nohun tah nitai inyi itap: uhu wit lep ohan ja iran an tah napelumai, namu yiri napelumai inig aiek er ohaig iran an nuarin itap.
28Ja uhmu ahtagrei nipjinitai inig er atho iran: el eh atho an nipjiuru bras, uhmu ahpamud an nohpa, um yiri an wai.
29Erumu caig a ilpu atamaig asega irai ilpu atimi ahlap: et idim itap esjilid.
30Uhmu jim caig tah nitai ahlap va nedo has, er imiapam inja iran anliin neom er asjapicnaig o un par asa nigpa iran an nuarin itap: uhmu atnamud an cap.
Zvasarudzwa nguva ino
Levitikus Nuarin-tas alupas 6.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)